Blue State - Un democratico in cattivo stato
|
C'l artìcul chè 'l è scrit in
Miranduléś |
 Blue State
| ||
| Blue State - Un democratico in cattivo stato | ||
 Breckin Meyer e la Paquin in na figùra dal film | ||
| Stat Blù - Un demucràtic in un stat catìṿ 2007 | ||
|---|---|---|
| Regìa: Marshall Lewy | ||
| Scritōr: Marshall Lewy | ||
| Atōr: Breckin Meyer • Anna Paquin • Tim Henry Adriana O'Neil • Leigh Enns • Nicolas Ouellette Bryan Terrell Clark • Joyce Krenz • Sean O'Brian | ||
| Müsica: Nathan Johnson | ||
| Léngua: Ingléś | ||
| Dürä dal film: 88 minüt | ||
| Nasiōṅ: Stat Unî | ||
Blue State - Un democratico in cattivo stato (Stat Blù - Un demucràtic in un stat catìṿ) l'è na cumèdia americàna e canadéśa dal 2007 scrita e dirèta par Marshall Lewy, chè a 'l sò debùt in un lungumetràǵ.
Al tìtul uriginàł al fà riferimènt a i stat blù ch'i èṅ i stat da la banda di demucràtic tgnénd a mènt ch'in di Stat Unî i culōr fra la dèstra e la sinìstra i èṅ arbaltâ rispèt a l'Itàglia. Da 'l nòstri bandi i stat blù i èṅ cuma 'l nòstri regiòṅ rósi (Emìglia-Rumàgna, Tuscàna, etc...). Qvél itagliàṅ invéci al gh'à na śuntàda ch'l'è 'n dópi sèns parchè la s riferìs a 'l fat ch'al prutagunìsta al n stà minga bèṅ ma anc ch'al viṿ in un brut stat.
Sunt
John Logue (Breckin Meyer) 'l è 'n vuluntàri califurgnàṅ ch'in dal 2004 al partìs par 'l Ohio par far na campàgna “us a us” p'r al candidâ demucràtic John Kerry. Durànt na fèsta cun di sò amìg, cun dal telecàmeri dna televiśiòṅ dal pòst ch'i al tìran śò, lò mèś ciùc al prumét che se George W. Bush al sarà cunfermâ presidènt lò al spatinarà in Cànada par prutèsta. Purtròp par lò al partî republicàṅ al vins dabòṅ gl'elesiòṅ e lò 'l pèrd al lavōr ad gràfic a San Francisco e anc la muróśa.
Cuntatâ par la Gloria O'Neill (Adriana O'Neil), na dóna ch'l'à mis sù 'n sit internet ch'al prumét ad catàr da spuśàr-'s a i put americàṅ ch'i decìdan 'd alvàr al téndi delùś da la pulìtiga dal sò paéś, John al fà 'l valìś e 'l partìs in màchina cun na ragàsa ad San Diego cgnusùda miténd 'n anùnsi. Chi lē la s ciàma Chloe Hamon (Anna Paquin) e la gh'à 'n anèl a 'l naś e i cavìi mèś blù. Prima 'd rivàr in Cànada, John al gh'à da farmàr-as lung la via par catàr i sò genitōr ch'i stàn'n in dal stat ad Washington. Purtròp la séna la finìs mâł parchè sò pàdar (Richard Blackburn), republicàṅ sfegatâ e c'n un fiōl partî par la guèra in Iràq, al s litga sèg mandànd-al via.
Rivâ in Cànada però al ròbi i n èṅ minga cuma John al pinsàva e pò la Chloe la vōl turnàr indrē parchè l'è na suldàda e la gh'iva partìr par la guèra.