Benoît Paire
|
C'l artìcul chè 'l è scrit in
Miranduléś |
Benoît Paire (Avignòṅ, 8 ad Maǵ dal 1989, a s lèś [bənwa pɛʁ] in Francéś) 'l è 'n tenìsta francéś prufesiunìsta da 'l 2007. 'L 11 ad Śnar dal 2016 'l è rivâ a ès'r al nùmar daśdòt dal mónd in singulàr.
'L è élt un mét'r e nuànta-siē, al pésa utànta chilo e 'l śōga tgnénd-as la barba. Al dróa 'l bras dèstar e al tira 'l arvèrs a dū maṅ.
L'è andâ a star a Ginévra in Śvisra e 'l gh'à 'n caràtar piutòst fumantèṅ in camp ch'al gh fà far di scat 'd arlìa da spés, rivànd anc a śbragàr la rachéta p'r al narvóś esénd pò ch'al n s cupatìs pròpria briśa i fisć dal pùblic[1].
In dla sò caréra, in du 'l à patî 'n brut infurtùni a 'l śnòć, 'l à vins dū tìtui ATP 250: a Båstad in dal 2015 baténd Tommy Robredo par 7-6 6-3 e Pablo Andújar in dal 2019 a Marrakech par 6-2 6-3, muciànd sù anc atri quàtar finàli. In di turnèo Slam 'l è rivâ in di utàṿ a gl'US Open (2015) e a Wimbledon (2017) mént'r a 'l Roland Garros e a gl'Australian Open a 'l màsim 'l à fat al tèrs tùran.
A gh piàś bév'r al bìbiti gaśàdi e magnàr a 'l fast food[2].
Caréra
Dòp avēr tacâ a śugàr a tènis a siē an, Benoît al fà 'l sò debùt in dal sircùit ATP in dal Maǵ dal 2010 pasànd al qualificasiòṅ a 'l Roland Garros ma andànd fóra subìt a òpra 'd Olivier Rochus par 6-3 6-7 4-6 5-7. A gl'US Open al pasa 'n tùran prima 'd pèrdar da Feliciano López in sinc set. 'L an dòp al fà 'l secónd tùr'n a Rotterdam e a Barcelóna.
In dal 2012 al riva in di quàrt a Auckland in du 'l céd par 3-6 7-6 6-7 a Olivier Rochus. In Maǵ al śōga la sò prima finàl ATP a Belgrâd baténd Fabio Fognini, Guillermo Garcia-López, Jarkko Nieminen e Pablo Andújar ma pardénd pò da 'l itagliàṅ Andreas Seppi par 3-6 2-6. In Śugn a riva invéci na semi-finàl a s-Hertogenbosch (6-7 6-3 1-6 da David Ferrer).
_(42077295625).jpg)
La stagiòṅ 2013 p'r al francéś la s vèra a Chennai in du al riva in semi-finàl baténd al cruàt Marin Cilić e pardénd da Roberto Bautista Agut. In Favràr al riva in finàl a Montpellier baténd prima Gilles Simon e pò Michael Llodra ma 'l tìtul al gh scapa via par maṅ ad Richard Gasquet ch'l al bat in séguit anc a Montcàrl. Sèmpar su tèra al patìs dū scunfìti da Rafael Nadal a Barcelóna e Madrid mént'r a Róma al céd sōl in semi-finàl a Roger Federer par 6-7 4-6. In Utób'r al bat Milos Raonic a Stucólma par pò pèrd'r in semi-finàl in tri set da Grigor Dimitrov, srand 'l an da nùmar vint-siē dal mónd.
In dal 2014 a gl'Australian Open al vins na batàja in sinc set cun Nick Kyrgios par pò lasàr strada fàcil a Roberto Bautista Agut a 'l tèrs tùran. In dal rèst d'l an al mùcia sù pôc, anc par via 'd un prubléma a 'n śnòć, e difàti al cróda śò in clasìfica finénd la stagiòṅ a la puśisiòṅ 118.
In dal 2015 'l è custrét dònca a pistàr incóra i camp di turnèo ITF in du 'l vins a Bèrgam e a Quimper. A 'l Roland Garros 'l è pò bòṅ ad bàtar Gastao Elias e Fabio Fognini prima 'd céd'r a Tomáš Berdych. In Luj a riva par lò al prim tìtul ATP a Båstad baténd dū specialìsta dla tèra cuma Pablo Cuevas e Tommy Robredo. Chi lò al céd sèg anc a Ambûrg, acsè cuma 'l padròṅ 'd cà Philipp Kohlschreiber a 'l prim tùran, e Paire al riva in di quàrt in du 'l cata Lucas Pouille ch'l al piga 6-3 6-2. A Cincinnati Benoît al pasa 'l qualificasiòṅ ma a 'l secónd tùr'n al pèrd da Novak Đoković par 5-7 2-6. Al fà méj a gl'US Open parchè al riva in di utàṿ dand la paga a Kei Nishikori, Marsel Ilhan e Tommy Robredo prima 'd andàr a cà cun Jo-Wilfried Tsonga. In Utób'r al śōga pò la sò prima finàl ATP 500 a Tòkyo pardénd-la cun Stanislas Wawrinka par 2-6 4-6. Cun chi riśultâ bòṅ chè, 'l avignunéś al finìs 'l an a 'l 19śum pòst.
In dal 2016 al mùcia sù quàtar semi-finàli a Chennai (3-6 4-6 da Stanislas Wawrinka), a Marsìglia (2-6 7-6 3-6 da Marin Cilić), a Barcelóna (3-6 2-6 da Kei Nishikori) e a Èsturil (3-6 3-6 da Pablo Carreno Busta) ma pò al s piànta in dal rèst dla stagiòṅ su cimènt.
In dal 2017 a gl'Australian Open al s férma a 'l tèrs tùran cóntar Dominic Thiem mént'r al pèrd in semi-finàl a Montpellier da Richard Gasquet e a Stucàrda da Lucas Pouille. A Wimbledon al fà gl'utàṿ farmànd-as quànd al cata 'l ustàcul 'd Andy Murray. In Setémb'r al céd invéci a Peter Gojowczyk in finàl par 5-7 2-6.
In dal 2018 al fà sù dū semi-finàli 'd fila a Pune e a Sydney pò a Miami 'l è bòṅ ad far fóra Novak Đoković prima 'd pèrdar da Filip Krajinović a 'l tèrs tùran. Anc a Róma al fà àtar tant cun però di sucès impurtànt su Richard Gasquet e Diego Schwartzman. A Wimbledon al lasa strada a Juan Martín del Potro a 'l tèrs tùran, riśultâ ch'al n è pò più bòṅ 'd far in tut 'l an.
'L inìsi dal 2019 'l è 'n diśàstar p'r al francéś ch'al vins sōl quàt'r incóntar su trédas in dal sircùit ATP ma pò a Marrakech al vins al turnèo baténd via via Aljaž Bedene, Pierre-Hugues Herbert, Jaume Munar, Jo-Wilfried Tsonga e Pablo Andújar par 6-2 6-3.
Culegamènt estéran
Nòti
- ↑ Tènis, la cumèdia 'd Paire in camp: al pèrd la tèsta e 'l śbraga tri rachéti La Repubblica, 1 'd Agóst dal 2018
- ↑ Benoît Paire: “Parchè a San Paolo? Par bévar tut qvél ch'a pòs” Tennis.it, 1 'd Maǵ dal 2016
Wikimedia Commons contiene file multimediali su Benoît Paire
