Pablo Andújar
|
C'l artìcul chè 'l è scrit in
Miranduléś |
.jpg)
Pablo Andújar Alba (Cuenca, 23 ad Śnar dal 1986, a s lèś [ˈpaβlo anˈduːhɑr] in Spagnōl) 'l è 'n tenìsta spagnōl manciàṅ prufesiunìsta da 'l 2004. Al 13 ad Luj dal 2015 'l è rivâ a ès'r al nùmar trénta-dū dal mónd in singulàr. In dla sò caréra 'l à vins tri tìtui ATP tut su tèra batùda: in dal 2011 e in dal 2012 a Caśablànca e in dal 2014 a Gstaad in Śvisra. In di an fra 'l 2006 e 'l 2010 'l à muciâ sù anc sinc tìtui Challenger. In dópi 'l à śugâ sinc finàli ma al li à pardùdi tuti.
'L è élt un mét'r e stanta-nóṿ e al pésa stanta-siē chilo. Al dróa 'l bras dèstar e al tira 'l arvèrs a dū maṅ. 'L à tacâ a śugàr a tènis a siē an. 'L è bòṅ ad dascórar in sinc léngui: Spagnōl, Francéś, Ingléś, Itagliàn e Catalàn.
_(9614612721).jpg)
In di turnèo dal Gran Ślam 'l è rivâ na vòlta a 'l tèrs tùr'n a 'l Roland Garros dal 2015 mént'r in chi àtar tri 'l à pasâ a 'l màsim un tùran, a Wimbledon in dal 2007, a gl'Australian Open in dal 2012 e 2014 e a gl'US Open in dal 2012, 2013 e 2014.
Caréra
Pablo Andújar al vins i sò prim tìtui in dal sircùit di Feature in dal 2005. In dal 2006 al vins al sò prim tìtul Challenger a Rìmin. In di an a vgnir, in fiṅ a 'l 2010, al in muciarà sù àtar quàtar.
In dal 2011 a Miami al bat Bernard Tomić e Fernando Verdasco prima 'd andàr fóra a 'l tèrs tùran cun Kevin Anderson. In Avrìl al vins al turnèo ad Caśablànca in Maròc baténd 'l itagliàṅ Potito Starace par 6-1 6-2. In Luj al pèrd la finàla ad Stucàrda cóntar Juan Carlos Ferrero e al fà àtar tant in Setémbar a Bùcarest cónt'r al tedésc Florian Mayer.
In dal 2012 al spagnōl al riva in di quàrt a Acapûlc baténd Leonardo Mayer par 7-6 6-3 e Florian Mayer par 4-6 7-5 6-4 ma pò al céd a David Ferrer par 2-6 4-6. La stmana dòp a Indian Wells al riva in di utàṿ ma al gh'à da pigàr-as a 'l nùm'r òṅ dal mónd Novak Đoković par 0-6 7-6 2-6. In Avrìl al vins incóra a Caśablànca, 'sta vòlta cónt'r Albert Ramos Viñolas. A Belgrâd in Maǵ al riva in semifinàl (3-6 6-1 3-6 da Benoît Paire) ma pò in dal rèst dla stagiòṅ al pèrd dagnóra sèmpar.
In dal 2013 al fà cagàr i pui in fiṅ in Avrìl (déś scunfìti su tréd's incóntar) pò in dal turnèo ad Montecarlo da qualificâ al bat al nùmar vint-sinc dal mónd, Jérémy Chardy, par 6-7 7-5 6-2 par pò pèrd'r in tri sét cumbatû da 'l tedésc Philipp Kohlschreiber. In Maǵ al riva par la prima vòlta in semifinàl in un Master Mila a Madrid (0-6 4-6 da Rafael Nadal) in dua 'l è bòṅ ad bàtar tri di prim vint-i-òṅ śugadōr a 'l mónd cuma Marin Čilić, John Isner e Kei Nishikori. A Nisa al bat 'l ìdul ad cà Gilles Simon prima ad lasàr strada a Gaël Monfils in semifinàl par 5-7 4-6.
In dal 2014 al pèrd in di quàrt a Buenos Aires cónt'r al lìgur Fabio Fognini pò, dòp avér dâ la paga par 6-1 6-1 a Tommy Robredo, al riva in semifinàl a Rio de Janeiro in dua al céd sōl déś punt a dódas in dal tie-break dal tèrs sét cóntar Rafael Nadal. In Luj al fà i quàrt a Ambûrg (0-6 2-6 da David Ferrer) ma pò la stmana dòp al vins al turnèo śvìs'r ad Gstaad baténd Juan Mónaco c'n al puntéǵ ad 6-3 7-5. A Valénsia al bat Tomáš Berdych par 6-3 6-2 e Dušan Lajović par 6-3 6-2 prima 'd catàr Tommy Robredo in di quàrt ch'l al manda a cà par 7-6 6-4.
'L inìsi dal 2015 'l è dimóndi brut par Pablo ch'al fà sù tri secónd tùr'n e òt prim tùran. Al s tira sù in Avrìl quànd al riva in finàl a Barcelóna baténd quàtar Top Trénta cuma Leonardo Mayer, Feliciano López, Fabio Fognini e David Ferrer prima 'd cédar par 4-6 4-6 a 'l giapunéś Kei Nishikori. In Maǵ, par la prima vòlta in caréra, al riva a 'l tèrs tùran 'd un Major in dua al pèrd in tri sét da Jo-Wilfried Tsonga.