Wonderland - Massacro a Hollywood
|
C'l artìcul chè 'l è scrit in
Miranduléś |
 Wonderland
| ||
| Wonderland - Massacro a Hollywood | ||
 La Paris Hilton e Val Kilmer in na figùra dal film | ||
| Wonderland - Masèl a Hollywood 2003 | ||
|---|---|---|
| Regìa: James Cox | ||
| Scritōr: James Cox • Captain Mauzner Todd Samovitz • D. Loriston Scott | ||
| Atōr: Val Kilmer • Kate Bosworth • Lisa Kudrow Josh Lucas • Paris Hilton • Faizon Love • Franky G Carrie Fisher • Dylan McDermott • Ted Levine | ||
| Müsica: Cliff Martinez | ||
| Léngua: Ingléś | ||
| Dürä dal film: 104 minüt | ||
| Nasiōṅ: Stat Unî • Cànada | ||
Wonderland - Massacro a Hollywood (Wonderland - Masèl a Hollywood) 'l è 'n thriller dramàtic americàṅ e canadéś dal 2003 ad James Cox ch'al cònta i fat di masamènt ad Wonderland Avenue dal 1981.
Custâ sinc migliòṅ e mèś ad dòlar, al film al 'n à fat pò sù dū e mèś.
Sunt
La Dawn Schiller (Kate Bosworth) l'è la muróśa dal “rè dal pòran”, 'l atōr John Holmes (Val Kilmer). Cumpàgn a lò la pénsa sōl a gusàr e a far-'s ad dròga. Un dè la sènt a la televiśiòṅ ch'in na vila a Wonderland Avenue, quartēr ad Los Angeles, a gh'è stâ 'n masèl cun quàtar parsòni cupàdi: Ron Launius (Josh Lucas), fanàtig dal pistòli antìghi, la Joy Miller (Janeane Garofalo), Billy DeVerell (Tim Blake Nelson) e la Barbara Richardson (Natasha Gregson Wagner). In cal pòst lè la Dawn la gh'éra stada sōl pôc tèmp prima insém a Holmes.
Al caś al finìs in dal maṅ di detective dla pulisìa Sam Nico (Ted Levine) e Louis Cruz (Franky G) ch'insém a 'l ufisiàł Billy Ward (M.C. Gainey) i próan a 'ndàr-'g a fónd, sinténd qvél ch'al gh diś David Lind (Dylan McDermott), muróś 'd una dal vitmi.
Holmes al s éra fat amìg dal boss malavitóś Eddie Nash (Eric Bogosian) ch'al 'l iva cgnusû par via di sò film. Ron 'l iva dâ dgl'armi rubàdi a John par véndar-li a Eddie ma chi lò, faghénd al fùrub, 'l iva decìś invéci 'd tgnir-'s-li lò dgénd ch'a n è briśa fàcil dar-li via parchè i éran di pès ch'i scutàvan. John al strulga 'n piàṅ p'r andàr a rubàr a cà 'd Nash dand na piantìna dla vila a Ron, esénd ch'al gh'è stâ òspit un muć ad vòlti. Inólt'r al fà in manéra 'd lasàr 'l us dla cuśìna avèrt.
La matìna dòp Ron Launius, insém a Lind e Deverell, i vaṅ a rubàr in cà 'd Nash purtànd-ag via un migliòṅ e dū ad dòlar fra bèsi, armi, dròga e presióś, frénd in dal méntar la guàrdia dal còrp Greg Diles (Faizon Love).
Al grup al pòrta incòsa in dla sò cà a Wonderland lasànd na part anc a la stéla dal pòran p'r al sò ajùt ma Eddie Nash al capìs subìt ch'in dal cōlp a gh'è insaplâ John Holmes.