Wacky Races
|
C'l artìcul chè 'l è scrit in
Miranduléś |
Wacky Races 'l è 'l tìtul 'd un cartòṅ animâ d'l Hanna-Barbera dla fiṅ di an Ssanta, ispirâ a 'l film La grande corsa 'd Blake Edwards. La série, in trénta-quàt'r epiśòdi, la cònta 'l vicéndi ad soquànt persunàǵ dimóndi strâṅ impgnâ in cursi 'd màchina in gir par l'Amèrica. Vist al sucès dal prugràma, i prudutōr i aṅ dâ pò vita a dū spin-off, da i tìtui Dastardly e Muttley e le macchine volanti e Le avventure di Penelope Pitstop, ólt'r a 'n reboot in dal 2017.
Persunàǵ
A la cursa i tōśan part ùndas màchini guidàdi da i cuncurènt chè 'd sóta:
- I fradèi Slag su la Maśàgna-mòbil (the Slag brothers in the boulder mobile) - màchina 'd préda guidàda da dū primitìṿ, Rock e Gravel, śmèj c'n i cavìi lung e cun dū bastòṅ in maṅ;
- I fradèi Big e Li'l Gruesome su 'l Diabòlic Coupé (The Gruesome Twosome in the Creepy Coupe) - caratòṅ di an Trénta cun di papastrèi ch'i gh vólan datóran e 'n drâg ad dèntar, guidâ da i fradèi Big e Li'l Gruesome ch'i vìnan da 'l mónd dla scarésa;
- Al prufesōr Pat Pending su la Multi-Ûś (Professor Pat Pending in the Convert-A-Car) - siensiâ ch'al guìda na màchina ch'l'è bòna ad trasfurmàr-as in śavàj difarènt quànd a gh'è biśógn;
- Red Max su 'l Scaravàś vulànt (Red Max in the Crimson Haybaler) - biplàṅ dla prima guèra mundiàla in du a gh cur 'n aviadōr c'n i bafi;
- La Penelope Pitstop su 'l Coupé Stimulèṅ (Penelope Pitstop in the Compact Pussycat) - màchina ròśa e śala cun umbarlèṅ par quaciàr-as da 'l Sōl ch'l'è anc bòna ad mét'r al rusét da par lē a la sò pruprietària, na ragàda dimóndi stimulìna;
- Al sergìnt Blast e 'l suldâ Meekly su l’Armàda speciàł (Sergeant Blast and Private Meekly in the Army Surplus Special) - cararmâ guidâ da 'l suldâ Meekly a gl'órdan dal sergìnt budlòṅ Blast;
- Clyde e la sò banda su la Anti-prujètil (The Ant Hill Mob in the Bulletproof Bomb) - limousine di an Vint guidàda da 'l boss mafióś Clyde e da àtar siē delinquènt a 'l sò servìsi;
- Luke e 'l ōrs Blubber su 'l Insèt ciucadōr (Lazy Luke and Blubber Bear in the Arkansas Chuggabug) - màchina da quàtar sòld cun na stua vècia cuma mutōr, guidàda c'n i pē da 'n muntanàr redneck e palandròṅ d'l Arkànsas, Luke, insém a 'n ōrs caga-sóta ciamâ Blubber;
- Peter Perfect su la Siē silìndar (Peter Perfect in the Turbo Terrific) - milurdèṅ c'n i mùscui ch'al guìda na màchina ch'la s giùsta da par lē cun na squasàda;
- Rufus Roughcut su la Śbraga-incòsa (Rufus Ruffcut and Sawtooth in the Buzzwagon) - màchina 'd légn cun dal rōdi a séga guidàda da 'n buscajōł e da 'l sò castòr Sawtooth;
Pò a gh'è la màchina Nùmar 00 ad Dick Dastardly e dal sò caṅ Muttley (Dick Dastardly and Muttley in the Mean Machine), un tisi catìṿ ch'al trapla sèmpar quèl cónt'r i sò rivài ma 'l finìs sèmpar p'r armét'r-ag lò esénd ch'al n gh và mai bèṅ gnint e 'l sò caṅ al gh rid adrē;
Piasamènt dal gari
.jpg)
| Cuncurènt | Màchina | 1m | 2nd | 3rs | Pòdi |
|---|---|---|---|---|---|
| fradèi Slag | Maśàgna-mòbil | 3 | 8 | 3 | 14 |
| Rufus Roughcut | Śbraga-incòsa | 3 | 6 | 4 | 13 |
| fradèi Big e Li'l Gruesome | Diabòlic Coupé | 3 | 3 | 6 | 12 |
| Clyde e la sò banda | Anti-prujètil | 4 | 5 | 2 | 11 |
| Penelope Pitstop | Coupé Stimulèṅ | 4 | 2 | 5 | 11 |
| Red Max | Scaravàś vulànt | 3 | 4 | 3 | 10 |
| prufesōr Pat Pending | Multi-Ûś | 3 | 2 | 5 | 10 |
| Luke e 'l ōrs Blubber | Insèt ciucadōr | 4 | 1 | 4 | 9 |
| Peter Perfect | Siē silìndar | 4 | 2 | 2 | 8 |
| sergìnt Blast e 'l suldâ Meekly | Armàda speciàł | 3 | 1 | 0 | 4 |
| Dick Dastardly e Muttley | Nùmar 00 | 0 | 0 | 0 | 0 |