Uomini che odiano le donne (film)
|
C'l artìcul chè 'l è scrit in
Miranduléś |
 Män som hatar kvinnor
| ||
| Uomini che odiano le donne | ||
.png) Michael Nyqvist in na figùra dal film | ||
| Óm ch'i òdian cal dóni 2009 | ||
|---|---|---|
| Regìa: Niels Arden Oplev | ||
| Scritōr: Stieg Larsson Nikolaj Arcel • Rasmus Heisterberg | ||
| Atōr: Michael Nyqvist • Noomi Rapace • Lena Endre Sven-Bertil Taube • Peter Haber • Ewa Fröling Peter Andersson • Ingvar Hirdwall • Björn Granath | ||
| Müsica: Jacob Groth | ||
| Léngua: Śvedéś • Ingléś | ||
| Dürä dal film: 152 minüt | ||
| Nasiōṅ: Śvèsia • Danimàrca • Nurvégia • Germàgna | ||
Uomini che odiano le donne (Óm ch'i òdian cal dóni) 'l è 'n thriller dramàtic dal 2009 ad Niels Arden Oplev trat da 'l rumànś umònim ad Stieg Larsson. Al gh'à abû dū séguit in dal 2009, La ragazza che giocava con il fuoco e La regina dei castelli di carta, e 'n arfacimènt americàṅ in dal 2011, Millennium - Uomini che odiano le donne.
Cl'òpra chè, custàda trédas migliòṅ ad dòlar, la 'n à pò fat sù sènt-quàtar.
Sunt
Mikael Blomkvist (Michael Nyqvist) 'l è 'n giurnalìsta dla rivìsta Millenium. Dòp avēr scrit 'n artìcul ad denùnsia cónt'r al finansēr Hans-Erik Wennerström (Stefan Sauk), dgénd ch'l éra insaplâ in fiṅ a 'l còl in afâr muśnènt, al finìs a prucès par difamasiòṅ e 'l vîṅ cundanâ a tri méś ad parśòṅ spetànd 'l apèl che però lò al n gh'à minga intensiòṅ ad preśentàr. In cal méntar 'l industriàł Henrik Vanger (Sven-Bertil Taube) al gh dà 'l incàr'g ad far luś su la mòrt quarànt'an prima dla sò anvōda Harriet (Julia Sporre) ch'l'è sparìda durànt na fèsta par baghét. Al sò cadàv'r al n s è mai catâ, in tut al manéri Henrik 'l è sicûr ch'al sasèṅ al sia òṅ dla sò famìja.
In dgl'indàśin Mikael 'l è jutâ par na śōvna punk, la Lisbeth Salander (Noomi Rapace), ch'la fà la hacker e ch'la gh'à 'n pasâ tórbad tant ch'l'è in afidamènt a 'n tutōr, Nils Bjurman (Peter Andersson), che però al s prufìta dla sò cundisiòṅ par viulentàr-la. A salta fóra 'n diàri dl’Harriet in du la ragàsa la s éra nutàda di nóm ad soquànti dóni ch'i aṅ pò catâ la mòrt p'r avēr fat di pcâ cundanâ da la Bìbbia e Mikael al pénsa ch'anc lē la sia stada cupàda p'r avēr naśâ quèl.
In séguit al giurnalìsta al scampa a 'n tintatìṿ 'd umisìdi in dal bòsc pròpria quànd 'l iva fat a mènt ch'i nóm dal dóni masàdi i éran tut ebrèj, un fat suspèt esénd ch'in dla famìja di Vanger i gh'éran di sustenidōr dal naśìśum.