Tradimento mortale
|
C'l artìcul chè 'l è scrit in
Miranduléś |
 Deadly Betrayal
| ||
| Tradimento mortale | ||
 La Nicollette Sheridan in na figùra dal film | ||
| Tradimènt murtàł 2003 | ||
|---|---|---|
| Regìa: Jason Hreno | ||
| Scritōr: Howard Friedlander • Ken Peragine | ||
| Atōr: Nicollette Sheridan • Andrew Jackson Robert Seeliger • Amanda Tilson • Leni Parker Larry Day • Richard Jutras • Morgan Kelly | ||
| Müsica: Pierre Denis Coté • James Gelfand | ||
| Léngua: Ingléś | ||
| Dürä dal film: 92 minüt | ||
| Nasiōṅ: Cànada | ||
Tradimento mortale (Tradimènt murtàł) 'l è 'n thriller cadadéś dal 2003 ad Jason Hreno, girâ par la televiśiòṅ.
'L è stâ girâ a Montreal.
Sunt
La Donna Randal (Nicollette Sheridan) l'è na raśdóra daspràda perchè sò marè, al giurnalìsta 'd guèra Jeff (Robert Seeliger), 'l è praticamènt sèmpar via par lavōr e acsè al sò matrimòni al rìsćia 'd andàr a gambi a l'élta, la gh al diś anc la sò amìga Roz (Leni Parker). Un dè la Donna la cgnóś al mìstar nóṿ 'd sò fiōla Melinda (Amanda Tilson), Adam Hamilton (Andrew Jackson). Faghénd dū ciàcri sèg, la sènt ch'l è drē a nàsar quèl cun 'l insgnànt e difàti soquànt dè dòp i dū i finìs'n a lèt.
A 'l impruvìś, p'r al fèsti 'd Nadâł, a tórna a cà Jeff ch'al s è stufâ 'd risćiàr la vita a 'l èstar, specialmènt dòp che 'n sò culéga, ch'l éra sèg, 'l éra mòrt in Bòśgna sóta 'l bómbi. La Donna, par salvàr al matrimòni, l'è custréta acsè a dar un taj a la sò relasiòṅ cun Adam che però al fà in tèmp a purtàr via d'l òr da 'l sò apartamènt, esénd lò 'n làdar patintâ ch'al s prufìta dal dóni spuśàdi par tacàr dal stòri sèg par pò rubàr-'g in cà. Lè lōr, par paùra 'd cumprumét'r-as, i tàśan sèmpar.
La Donna, ch'l'à capî ch'al làdar 'l è lò parchè l'à catâ 'l sò arlói par tèra, la gh diś ch'la 'l denunsiarà a la pulisìa. Adam al decìd acsè ad mandàr na caséta vìddeo dna sò gusàda sèg a Jeff par ruinàr-'g al matrimòni, avénd lò tirâ śò incòśa in dal méntar ch'i fàvan sès in cà sua. Jeff al fà 'l valìś andànd a star, insém a la baghéta, da sò màdar Mary (Una Kay). La Donna la próa a dmandàr ajùt a 'l detective Lentino (Larry Day) ma chi lò al n gh créd briśa.