Ti amerò... fino ad ammazzarti
|
C'l artìcul chè 'l è scrit in
Miranduléś |
 I Love You to Death
| ||
| Ti amerò... fino ad ammazzarti | ||
 La Ullman e Kevin Kline in na figùra dal film | ||
| A t vurò bèṅ... in fiṅ a masàr-at 1990 | ||
|---|---|---|
| Regìa: Lawrence Kasdan | ||
| Scritōr: John Kostmayer | ||
| Atōr: Kevin Kline • Tracey Ullman • River Phoenix Joan Plowright • William Hurt • Keanu Reeves Phoebe Cates • James Gammon • Jack Kehler | ||
| Müsica: James Horner | ||
| Léngua: Ingléś • Itagliàṅ • Sèrb-Cruàt | ||
| Dürä dal film: 96 minüt | ||
| Nasiōṅ: Stat Unî | ||
Ti amerò... fino ad ammazzarti (A t vurò bèṅ... in fiṅ a masàr-at) 'l è na cumèdia négra americàna dal 1990 ad Lawrence Kasdan ch'la tōś ispirasiòṅ da 'n fat sucès dabòṅ in dal 1984 a Allentown in dla Pennsylvania in dua na dóna, la Frances Toto, l'iva pruâ a masàr sò marè Anthony sénsa però cavàr-'g-la.
Al film 'l à muciâ sù da piò ad sédas migliòṅ ad dòlar a i butghèṅ dal nòrd Amèrica.
Sunt
Joey Boca (Kevin Kline) 'l è 'n americàṅ cun di urìgini itagliàni ch'al tira avànti faghénd dal pizzi. 'L è spuśâ cun la Rosalia (Tracey Ullman) e al gh vōl anc bèṅ ma, esénd un spurcaciòṅ, al sènt anc al biśógn dal vòlti ad far-ag un quàlc curnèṅ.
Un dè chi lē la gh'à la manéra ad véd'r-al impgnâ in una dal sò ciuladìni. Subìt la pénsa ad tōr-as la vita p'r al daspiaśēr ma pò, dascurénd cun sò màdar Nadja (Joan Plowright), la decìd ad vindicàr-as cupànd cal malnét ad sò marè. Dòp soquànt tintatìṿ andâ mâł, la ciàma Devo (River Phoenix), un ragàs inamurâ ad lē e ch'al lavóra in dla pizzerìa ad famìja, dmandànd-ag ad tiràr un cōlp a Joey e lò 'l al fà sénsa però cavàr-'g-la a finìr-al.
A n sinténd-as piò ad cuntinuàr da par lò, Devo a sò vòlta al ciàma dū drugâ pódag par far-al fóra, Marlon (Keanu Reeves) e Harlan (William Hurt), ma anc lōr dū i èṅ di inśdî e i fànan fiàsc. Cun un buśèṅ in dla tèsta, Joey al cònta a sò mujér ch'al n s sènt minga tant bèṅ ma lē la gh rispónd franca ch'a s trata 'd un vìrus.