Thelma & Louise
|
C'l artìcul chè 'l è scrit in
Miranduléś |
 Thelma & Louise
| ||
| Thelma & Louise | ||
 La Davis e la Sarandon in na figùra dal film | ||
| La Thelma e la Louise 1991 | ||
|---|---|---|
| Regìa: Ridley Scott | ||
| Scritōr: Callie Khouri | ||
| Atōr: Susan Sarandon • Geena Davis • Harvey Keitel Michael Madsen • Christopher McDonald • Brad Pitt Stephen Tobolowsky • Jason Beghe • Carol Mansell | ||
| Müsica: Hans Zimmer | ||
| Léngua: Ingléś | ||
| Dürä dal film: 124 minüt | ||
| Nasiōṅ: Stat Unî • Frància | ||
Thelma & Louise (La Thelma e la Louise) 'l è 'n film dramàtic dal 1991 ad Ridley Scott. 'L è stâ preśentâ fóra cuncōrs a 'l 44śum Fèstival ad Cannes e 'l à vins al Prèmi Òscar dal 1992 par la senegiadùra dla Callie Khouri.
Custâ sédas migliòṅ e mèś ad dòlar, al film al 'n à pò purtâ a cà da piò ad quarànta-sinc in di sōi Stat Unî.
Sunt
La Louise Sawyer (Susan Sarandon) la gh'à quarànt'an e la fà la camaréra in un fast food in dla campàggna dl'Arkànsas. La stà malvluntéra insém a Jimmy (Michael Madsen). La Thelma Dickerson (Geena Davis) invéci la gh 'n à trénta e l'è spuśàda cun Darryl (Christopher McDonald), un masć a 'l antìga ch'al gh mét da spés al maṅ adòs, quànd al n è minga fóra 'd cà. Par far quèl ad nóṿ, al dū amìghi i decìd'n ad pasàr-as un fiṅ 'd stmana in na cà 'd muntàggna, sénsa dir gnint a i marè lōr, druànd p'r al viàś la màchina vècia ad Louise, na Ford Thunderbird.
Durànt la strada, al dū dóni i s férman a tōr quèl in un bar. Amprufitànd-as 'd un malōr dla Thelma, 'n umòṅ ch'al s cata lè, Harlan (Timothy Carhart), al próa a viulentàr-la in dal parchéǵ ma in ajùt dla sò amìga a riva la Louise cun na pistòla e la 'l masa dòp che lò al gh'iva rispòst mâł. La Thelma la vrév ciamàr la pulisìa, dgénd ch'è sucès na daśgràsia in dal tintatìṿ ad difénd'r-as, ma cl'atra la n è minga 'd acòrd sèg parchè lē l'à patî bèla un quèl dal gènar e ninsòṅ al gh'à dâ a mènt. I decìd'n acsè ad scapàr via p'r al Mèsic in dal méntar ch'l ispetōr Hal (Harvey Keitel) al tōś al caś in maṅ.
Armàśi sénsa bèsi, la Louise la ciàma Jimmy par far-as mandàr di sôld in n'agensìa 'd Oklahoma City. Lung la strada la Thelma la fà muntàr sù 'n bèl śuvnòt ch'al fava 'l autostop, J.D. (Brad Pitt), anc s'la Louise la n éra minga persuàśa dal tut. Dòp avér mis in bisàca i bèsi che Jimmy al gh'iva purtâ personalmènt, la Thelma la pasa la nòt insém a J.D. che però al dè dòp al sparìs purtànd-as via incòsa. Par far-as perdunàr la casàda ch'l'iva fat, la ragàsa la decìd ad rapinàr un supermarcâ sénsa far a mènt che in dal negòsi a gh'éra na telecàmera ch'la l'iva tòlta śò. Al ròbi i s mét'n acsè mâł p'r al dū dóni.