C'l artìcul chè 'l è scrit in Miranduléś Emiliàn

Final Cut
The funeral

Jude Law in na figùra dal film
Al funeràł
1998
Regìa: Dominic AncianoRay Burdis
Scritōr: Dominic Anciano • Ray Burdis
Atōr: Jude LawRay WinstoneSadie Frost
John BeckettMark BurdisLisa Marsh
Ray BurdisWilliam ScullyPerry Benson
Müsica: Feelybooth • Wagen
Thierry Lang And His Trio
Léngua: Ingléś
Dürä dal film: 93 minüt
Nasiōṅ: Régn Unî


«
Pinsàv-at 'd èsar 'l ùnic a fargàr i tò amìg?»
(Tagline dal film)


The funeral (Al funeràł) 'l è 'n film dramàtic ingléś indipendènt dal 1998 ad Dominic Anciano e ad Ray Burdis. 'L è stâ prudót c'n un budget 'd un migliòṅ ad sterlìni a 'l incìrca.

Sunt

Al śōvan Jude (Jude Law) 'l è mòrt. Da dū an 'l éra drē a lauràr a na sò pelìcula ma al n à minga fat in tèmp a finìr-la. A 'l sò funeràł i rìv'n i sò amìg ch'i próan a tiràr sù la Sadie (Sadie Frost) armàśa védva. Chi lē la gh fà firmàr un fój p'r avér al parmés ad tiràr-i śò parchè la vōl far vgnir fóra lē 'l film, un film ch'al cònta la vita véra dla gint. Dòp avér-i fat sintàr tut insém in dal salòt, la mét dèntar la caséta par véd'r al lavōr ad Jude.

A 'l inìsi a s véd sōl di filmâ ad cretinìśia fra amìg, pò tut 'd un trat i partìsan dal séni tiràdi śò ad nascòst cun dal telecaméri lugàdi dapartùt, cuma la Lisa (Lisa Marsh) ch'la pisa in dal cèso. Ray (Ray Winstone), regìsta a sò vòlta e sò marè, al s arlìa dimóndi e 'l è lè lè par tōr-as sù e andàr via ma pò 'l armàgn a 'l sò pòst giùst par véd'r-as in televiśiòṅ piciàr la sò dóna e tiràr sù dla dròga p'r al naś insém a Dominic (Dominic Anciano), Jude e a Burdis (Ray Burdis). Chi lò al dà adòs a 'n sò amìg sōrd e mut ch'al fà sōl di sîg quànd al próa a dascórar méntar Dominic invéci 'l in diś quàtar su i sòp ch'i gìr'n in sna scrana a rudèli («giusà cuma faṅ-i a spasàr-'s al cûl dòp ch'i aṅ cagâ?») e John (John Beckett), ch'al gh'à 'l stés prubléma, al gh'armàgn mâł. Sò mujér Holly (Holly Davidson), surèla dla Sadie, la cata 'l burslèṅ dla Lisa e la 'l vóda tut par tgnir-'s i bèsi, pò la 'l buta via. Ray, vdénd cuś l'à fat, al s arlìa sèg e cun John dand dla rója e di stròns a tut dū ma dòp al s pintìs e al gh dmanda scuśa. Andànd avànti in di filmâ a s sènt l’Holly dir-'n ad tut i culōr c'n al sò amìghi dla bravitù ad sò marè a lèt, piutòst la s insfìlsa dū bucìni sù par la pèpa, e lò far-as na putàna davànti a i sò amìg méntar lē la n gh'éra mia.

In du èṅ-i sparìdi al mudandìni da lavàr dla Sadie? I li aṅ purtàdi via Burdis e Dominic par naśàr-li. Chi è ch'l è sèmp'r insaplâ quànd a gh'è dal casutarìi? Bill (William Scully), e s'un qualchidòṅ al pinsìs 'd alvàr al téndi prima ch'la pelìcula la finìsa, a gh pénsa lò a far-ag cambiàr idéa cun dū casòt.

Al film al cuntìnua e a s véd Mark (Mark Burdis) cun na sót-vèsta da dóna e calsét a réda adòs ch'al diś a Tony (Perry Benson), ch'al gh'à da far na fèsta cun di amìg, ad preparàr sōl un pôc ad pui frit e patatìni tant s'la gint la gh'à fam la và pò a 'l risturànt. Ma a part tut al cativèri ch'a gh'è in dla pelìcula a la fiṅ a s véd anc chi è ch'l à cupâ Jude.

Culegamènt estéran