Supermarket horror
|
C'l artìcul chè 'l è scrit in
Miranduléś |
 Chopping Mall
| ||
| Supermarket horror | ||
 La Barbara Crampton in na figùra dal film | ||
| Supermarcâ scarésa 1986 | ||
|---|---|---|
| Regìa: Jim Wynorski | ||
| Scritōr: Jim Wynorski • Steve Mitchell | ||
| Atōr: Kelli Maroney • Tony O'Dell • Russell Todd Barbara Crampton • Suzee Slater • Nick Segal John Terlesky • Karrie Emerson • Mary Woronov | ||
| Müsica: Chuck Cirino | ||
| Léngua: Ingléś • Itagliàṅ | ||
| Dürä dal film: 77 minüt | ||
| Nasiōṅ: Stat Unî | ||
Supermarket horror (Supermarcâ scarésa) 'l è 'n film ad scarésa americàṅ dal 1986 ad Jim Wynorski scrit insém a Steve Mitchell.
'L è stâ girâ in di sèntar cumersiàł Sherman Oaks Galleria ad Sherman Oaks, in dla val ad San Fernànd (Califòrgna), c'n un budget stimâ 'd utsènt-mila dòlar.
Sunt
Al sèntar cumersiàł Park Plaza Mall 'l à péna mis in pē un sistéma 'd sicurésa da lcàr-'s i bafi cumpòst da tri robot high-tech ch'i èṅ bòṅ ad cuntrulàr ad nòt i tri piàṅ dla strutùra par dar la casa a i làd'r e anc a farmàr-i durànd di taser e la śdòrmia. Chi machinàri chè, cun dal rōdi da cararmâ, i èṅ bòṅ 'd arcgnós'r i dipendènt dal negòsi lśénd al sò tèsri da lavōr.
Na nòt quàtar còpi 'd śōvan, Rick Stanton (Russell Todd) e la Linda (Karrie Emerson), Greg Williams (Nick Segal) e la Suzie Lynn (Barbara Crampton), Mike Brennan (John Terlesky) e la Leslie Todd (Suzee Slater) ch'la gh'à na boutique lè dèntar, al “nerd” Ferdy Meisel (Tony O'Dell) e l’Alison Parks (Kelli Maroney), i decìd'n ad far na fèsta a 'l Plaza Mall par pò dar-ag dèntar c'n al sès a part gl'ùltim dū ch'i s èṅ péna cgnusû e ch'i preferìsan guardàr un film a la televiśiòṅ.
Par via 'd un tempuràł e dna silta ch'la culpìs la strutùra, al computer sentràł al taca però a 'l impruvìś a dar i nùmar e i tri robot culegâ i s mét'n a cupàr la gint ch'i incróśan, prima dmandànd «Pòs-j-a védar la tèsra 'd arcgnusimènt?» e pò dgénd, dòp i masamènt, «A t ringràsi e bòna giurnàda».
I robot i cùran fòrt e i pōlan sparàr di raś laśèr murtài da i òć ólt'r a druàr i sò bras ch'i sa ślùngan par tajàr al góli dal vitmi. Cun chi armi chè i fànan scupiàr p'r ària la tèsta dla Leslie e i vèran in dū al còl dal pòvar Mike. Chi àtar siē amìg i tàc'n a scapàr via ma i robot i gh 'n ànan anc par lōr.