Sorana Cîrstea
|
C'l artìcul chè 'l è scrit in
Miranduléś |
La Sorana Cîrstea (Târgovişte, 7 'd Avrìl dal 1990, a s lèś [soˈrana ˈkɨrste̯a]) l'è na tenìsta ruména prufesiunìsta da 'l 2006 ch'l'è stada bòna ad rivàr a èsar la nùmar vint-a-tri dal mónd (al 17 'd Agóst dal 2009), dòp avér śugâ i quàrt a 'l Roland Garros baténd in di utàṿ la Jelena Janković par 3-6 6-0 9-7. In di àtar Gran Slam la n è mai andàda da 'd là da 'l tèrs tùran.
L'è élta 176 cm e la péśa 59 chilo. La stà a Bucàrest e al sò cólp preferî 'l è al drit.
In dla sò caréra 'l à vins un turnèo dla WTA (al 5 'd Utóbar dal 2008 a Tashkent cóntar la Sabine Lisicki par 2–6 6–4 7–6) e sèt ad qvéi d'l ITF.
Caréra
In dal 2010 la taca mâl 'l an muciànd sù sōl di prim e secónd tùran. A Dubai la pèrd da la Francesca Schiavone par 2-6 5-7 mént'r a Monterrey la céd 2-6 3-6 a la Sara Errani. Finalmènt a Marbella la pasa 'n tùran cóntar la nùmar 31 dal mónd, la rusa Marija Kirilenko, ma pò la pèrd da cl'atra ruména, la Simona Halep. A Estoril la riva par la prima vòlta dimóndi avànti ma la pèrd in semifinàl da la Arantxa Parra Santonja. A Eastbourne la bat la Francesca Schiavone ma pò la ciàpa la paga da la Svetlana Kuznecova ch'la l'iva anc batùda a 'l prim tùran dal Roland Garros. Dòp avér pardû subìt a Wimbledon da la Petra Kvitová, la s cava pò la sudisfasiòṅ ad bàt'r-la a Cupenàghen ma in di quàrt la céd a la Klára Zakopalová. In Setémbar la śōga 'l ITF ad Las Vegas e là la riva in finàl ma la pèrd da la Varvara Lepchenko. La finìs 'l an pardénd in dal qualificasiòṅ dal Lussembûrgh da la Mona Barthel, piasànd-as a 'l 95śum pòst dal ranking.
Anc al 2011 al partìs mâl. La s fà nutàr a 'l Roland Garros pasànd dū tùran prima ad cédar a la Na Li par 2-6 2-6. In Istâ la taca a śugàr in s'l èrba ma a Wimbledon la và fóra subìt, a Eastbourne la n pasa gnanc al qualificasiòṅ e a Birmingham la pèrd a 'l secónd tùran da la Daniela Hantuchová. La gh và méj a Linz parchè prima la pasa al qualificasiòṅ e pò la bat l'Anastasija Pavljučenkova 4-6 6-0 6-4 rivànd a i quàrt in dua la strabùca cóntar la Lucie Šafářová. Cun i 70 punt purtâ a cà in Utóbar vinsénd 'l ITF ad Limoges la finìs 'l an a 'l ssantéśum pòst dla clasìfica.
Dòp al prim tùran 'd Auckland (batùda da la Flavia Pennetta), la Sorana la riva in dal 2012 in di quàrt a Hobart in dua la céd a l'Angelique Kerber par 0-6 6-3 5-7. La pasa dū tùran anc a gl'Australian Open, dand la paga prima a la Samantha Stosur e pò a l'Urszula Radwańska, ma la Sara Errani la la manda a cà cun al puntéǵ ad 7-6 0-6 2-6. La riva pò in semifinàl a Pattaya (pardénd da la Marija Kirilenko) e a Barcelóna (la s arénd a la śluvàca Dominika Cibulková 1-6 1-6). In sla tèra rósa la fà dal vitmi impurtànti: a Madrid la bat la Marion Bartoli e a Róma la Jelena Janković ma a Parì la pèrd da la Na Li (che pò la vinsarà 'l tìtul). La Cîrstea la s tōś l'arvìnsida sèg mandànd-la a cà a 'l secónd tùran ad Wimbledon. In sal cimènt ad Stanford la riva in semifinàl dand la paga a la Dominika Cibulková ma pò la pèrd 1-6 2-6 da la Serena Williams. Stès riśultâ anc a Cantón ma, dòp avér dâ la paga a l'Alizé Cornet, la pèrd da l'ingléśa Laura Robson. La finìs 'l an śugand par dū vòlti cóntar la cruàta Petra Martić (pardénd a Linz e vinsénd in Lussembûrgh) e śgranfgnànd al 27śum pòst in clasìfica.
In dal 2013 la pèrd a 'l tèrs tùran a gl'Australian Open da la Na Li 4-6 1-6 e a Pattaya in semifinàl da la Marija Kirilenko 0-6 2-6. A Doha la pasa 'l prim tùran ma pò la pèrd da la Caroline Wozniacki. Stés quèl anc in Dubai ma chè l'è la Sara Errani a dar-'g al cólp ad gràsia dòp che la ruména l'iva batû la semifinalìsta ad Melbourne, la Sloane Stephens. A Miami l'è bòna ad spasàr via (6-4 6-0) la nùmar siē dal mónd Angelique Kerber ma a 'l quàrt tùran l'è lē ch'la cata sù sōi quàtar śōg da la sèrba Jelena Janković (0-6 4-6). La sa spòsta pò in sla tèra vérda ad Charleston. Chè la cumbàt a 'l tèrs tùran cun la céca Lucie Šafářová ma la céd 3-6 7-5 1-6.