Urszula Radwańska
|
C'l artìcul chè 'l è scrit in
Miranduléś |
.jpg)
L’Urszula Radwańska (Ahaus, 7 ad Dicémbar dal 1990, IPA: [urˈʂula radˈvaɲska]
scólta'l chè) l'è na tenìsta pulàca, nada in Germâgna, ch'l'è stada la nùmar vint-nóṿ dal mónd 'l 8 'd Utóbar dal 2012. L'è élta 177 cm e la péśa 57 chilo. La dróa al bras dèstar e la tira 'l arvèrs (al cólp ch'a gh piàś da piò) a dū maṅ.
L'è prufesiunìsta da 'l 2005. La gh'à na surèla più granda, l'Agnieszka, ch'la śōga anca lē a tènis.
In dla sò caréra l'à purtâ a cà quàtar tìtui ITF ma gnanc òṅ ad qvéi WTA.
Caréra
Dòp avér tacâ a pistàr i camp dal sircùit ITF in dal 2005, in dal Favràr dal 2006 la tōś part a 'n turnèo ad Buchèṅ ma la n al vins minga lē. A gh và méj in Mars quànd la riva in semifinàl in d'l ITF ad Fuerteventura in Spaggna baténd in dū sét dal śugadōri cuma la Johanna Larsson, la Mandy Minella e la Carla Suárez Navarro. A la fiṅ dal méś la vins al tìtul a Bath (Régn Unî), turnèo ITF da déś-mila dòlar. In Maǵ i gh śibìsan na carta salvàdga par śugàr in dal WTA ad Varsàvia ma lē la gh pèrd subìt p'r òpra dla Venus Williams par 3-6 3-6. In séguit la s qualìfica p'r al turnèo 'd Ìstanbul in dua la pèrd in di utàṿ da la Shahar Peer. La fà cumpàgn anc a la fiṅ dla stagiòṅ a Stucólma ma in Śvèsia la pèrd da la rusa Anastasija Myskina par 6-7 3-6.
In dal 2007 la n gh la cava mai a pasàr al qualificasiòṅ dal sircùit WTA. La śōga però a Varsàvia cun na carta salvàdga ma la và fóra subìt cun l'Elena Vesnina par 6-2 6-7 3-6. A Tokyo in Utóbar la pasa 'l prim tùran par pò pèrdar da la Klára Zakopalová in tri sét. A Bangkok la ciàpa n'atra carta salvàdga e 'sta vòlta la la fà frutàr parchè la riva in di quàrt mandànd a cà prima la Sorana Cîrstea e pò anc la Virginie Razzano prima ad cédar par 2-6 3-6 a la Yung-Jan Chan. La finìs 'l an pardénd la finàl d'l ITF ad Kunming (Cina), 5-7 4-6 da la Yanina Wickmayer.
In dal 2008 la pòrta a cà pôc, la s fà però nutàr a Wimbledon quànd la bat la Klára Zakopalová 6-1 6-4 (prima ad cédar a la Serena Williams) e a Vancouver in dua la vins un tìtul ITF da vintsìnc-mila dòlar in Agóst. A la fiṅ d'l an la riva anc in di quàrt a Taškent pardénd par 6-3 5-7 6-7 da la Sabine Lisicki.
.jpg)
In dal 2009 la fà fóra la Francesca Schiavone in dal qualificasiòṅ dal turnèo austragliàṅ 'd Hobart, prima ad far al valìś anca lē in di utàṿ cun l'ungheréśa Melinda Czink. In Dubai la pasa incóra al qualificasiòṅ e a 'l prim tùran la manda a cà sò surèla Agnieszka par 6-4 6-3 ma in d'l incóntar a vgnir la gh'à da bandunàr in sal 6-7 7-5 2-0 par la Camille Pin. A Indian Wells l'è bòna ad dar la paga a la nùmar òt dal mónd, la Svetlana Kuznecova, e ad rivàr in di utàṿ in dua però la pèrd par 5-7 3-6 cun la Caroline Wozniacki. In Śugn a Birmingham la mét in riga la Marija Kirilenko 6-3 6-3, la Petra Cetkovská 6-3 7-5 e la Julia Görges 7-6 6-3 par pò lasàr via libra in di quàrt a la Magdaléna Rybáriková cun al puntéǵ ad 3-6 3-6. A Eastbourne la pasa 'l qualificasiòṅ pigànd l'Ayumi Morita, la Galina Voskoboeva e la Lucie Hradecká ma a 'l prim tùran la paga pégn cun l'Agnieszka ch'la la bat par 6-1 6-1. Dòp un secónd tùran a Wimbledon (2-6 4-6 da la Dominika Cibulková) e i quàrt a Ìstanbul, in Agóst la và a la granda a Los Angeles in du l'è bòna ad dar la paga a la Dominika Cibulková ma minga a la Marija Šarapova ch'la la spedìs a cà in di quàrt cun un 6-4 7-5 in sal cupét. La sèra 'l an baténd la Yvonne Meusburger a Linz, andànd pò fóra a 'l secónd tùran cun la Lucie Šafářová, e pardénd subìt in Lussembûrgh cun la Kirsten Flipkens.
Al sò 2010 l'è 'n diśàstar: la fà prim tùran a gl'Australian Open (2-6 1-6 da la Serena Williams) ma a Sydney, San Diego, Cincinnati e Montreal la n s qualìfica gnanc. A gl'US Open la bat l'Anna Čakvetadze ma pò la và a cà a 'l secónd tùran cun la Lourdes Domínguez Lino. A Seùl la pèrd subìt da la Marija Kirilenko par 3-6 1-6. La finìs 'l an śugànd dū finàli ITF in Frància e in Germâgna, vinsénd al tìtul a Ismaning cun l'Andrea Hlaváčková par 7-5 6-4.