Sotto falso nome
|
C'l artìcul chè 'l è scrit in
Miranduléś |
 Sotto falso nome
| ||
 Auteuil e la Greta Scacchi in na figùra dal film | ||
| Sóta 'n nóm fals 2004 | ||
|---|---|---|
| Regìa: Roberto Andò | ||
| Scritōr: Roberto Andò • Salvatore Marcarelli | ||
| Atōr: Daniel Auteuil • Greta Scacchi • Serge Merlin Anna Mouglalis • Giorgio Lupano • David O'Kelly Magdalena Mielcarz • Michael Lonsdale | ||
| Müsica: Ludovico Einaudi | ||
| Léngua: Itagliàṅ • Francéś • Pulàc | ||
| Dürä dal film: 105 minüt | ||
| Nasiōṅ: Itàglia • Frància • Śvisra | ||
Sotto falso nome (Sóta 'n nóm fals) 'l è 'n film dramàtic dal 2004 ad Roberto Andò preśentâ a 'l 57śum Fèstival ad Cannes in dla sesiòṅ dla Stmana Internasiunàla dla Crìtica.
La pelìcula, giràda c'n un budget ad sinc migliòṅ e siē 'd euro, la tōś ispirasiòṅ da la vita 'd Romain Gary, suicidâ in dal 1979, e dla sò auto-biugrafìa “Vie et mort d’Emile Ajar"[1].
Sunt
Daniel Boltansky (Daniel Auteuil) 'l è 'n scritōr francéś cun di urìgini pulàchi. Spuśâ cun n'avucàta itagliàna cun di bèsi, la Nicoletta (Greta Scacchi), 'l à catâ 'l sucès faghénd vgnir fóra di lìbar firmànd-i c'n al pseudònim ad Serge Novak.
Quànd al fiōl abû da sò mujēr prima ch'i dū i s mitìs'n insém, Fabrizio (Giorgio Lupano), al gh fà savēr ch'al stà par spuśàr-as, Daniel al partìs par l'Itàglia par tōr part a la serimògna anc se dal ragàs a n gh 'n è mai ciavâ gnint a dir dabòṅ. Rivâ a 'l pòrt ad Capri, al scritōr al cgnós na ragàsa ciamàda Mila (Anna Mouglalis) e 'l decìd 'd andàr-'g a lèt, pò la matìna dòp al và in céśa a Nàpuli p'r al matrimòni. Sintâ su 'n banc in prima fila darènt a la Nicoletta al gh'à però na bruta surpréśa quànd al s rénd cònt che sò nóra l'è pròpria la Mila. 'L óm al vrév daśmindgàr la nòt ad sès ch'al gh'à abû sèg ma la śuvnòta la n mòla briśa 'l òs e la 'l invìda a far di atri gusàdi insém.
Na matìna, mént'r al fà clasiòṅ in giardèṅ insém a sò mujēr, Daniel al vèra na busta ch'la gh'è rivàda par pòsta. Ad dènt'r a gh'è na fóto 'd lò ch'al ciùla la Mila in dla cà ch'la gh'iva lasâ n'amìga ad sò nóra, l’Ewa (Magdalena Mielcarz). Chi lē in séguit la s fà viva dmandànd-ag di bèsi par taśēr, fra 'l àtar la sà ch'l à scrit un rumànś cupiànd-al da 'n pulàc sò amìg che pò al s éra tòlt la vita. Daniel al dmanda ajùt a 'l sò agìnt, David Ginsberg (Michael Lonsdale).
Culegamènt estéran
- (EN) La schéda dal film in s'l IMDb
- (IT) La schéda dal film in sal FilmTV
- (IT) La schéda dal film in sal sit dla Cunferénsa Episcupàla
Nòti
- ↑ Sóta 'n nóm fals Cinecittà News, 17 ad Favràr dal 2004