Sola nella trappola
|
C'l artìcul chè 'l è scrit in
Miranduléś |
 Picture Claire
| ||
| Sola nella trappola | ||
 Mickey Rourke in na figùra dal film | ||
| Da par lē in trapla 2001 | ||
|---|---|---|
| Regìa: Bruce McDonald | ||
| Scritōr: Semi Chellas | ||
| Atōr: Juliette Lewis • Gina Gershon • Kelly Harms Mickey Rourke • Peter Stebbings • Raoul Bhaneja Camilla Rutherford • Callum Keith Rennie | ||
| Müsica: Paul Haslinger | ||
| Léngua: Ingléś • Francéś | ||
| Dürä dal film: 91 minüt | ||
| Nasiōṅ: Stat Unî • Cànada | ||
Sola nella trappola (Da par lē in trapla) 'l è 'n film thriller dal 2001 ad Bruce McDonald preśentâ a 'l Toronto International Film Festival e girâ dagnóra tut a Turònt. In Itàglia 'l è pasâ in s'l Udinese Channel[1].
A 'l èstar 'l è cgnusû cuma “Uma Inocente em Fuga” in Braśìl e “Lost in Toronto” in Germâgna.
Sunt
La Claire Beaucage (Juliette Lewis) l'è na ladra ch'la viṿ da par lē a Montreal (Quebec) e ch'la lavóra anc par la pulisìa ch'la sèra 'n òć sèg quànd lē la vèra 'l bèc faghénd i nóm di spaciadōr ch'i gh pòrtan la dròga. Quànd chi lōr i dànan fōg a 'l sò apartamènt, cun lē ch'la pèrd incòsa, la decìd 'd andàr a Turònt da 'n ragàs cgnusû in un bar soquànt tèmp prima, Billy Stuart (Kelly Harms), òṅ ch'al fà dal móstri 'd futugrafìa e ch'al gh'è anc andâ a lèt. Lē la s éra inamuràda ma par lò l'éra stada sōl na gusàda.
Al prubléma par la dóna 'l è ch'la dascór sōl in Francéś. Quànd la riva a destinasiòṅ la n cata ninsòṅ in cà e alóra la và in un bar ad donuts par dmandàr a la negusiànta in du pōl-la catàr la móstra dal sò ex muróś ma a n gh'è mia vèrs parchè par lē 'l Ingléś 'l è Àrab. Méntar l'è in bagn, un cuntrabandēr c'n un stusigadènt in bóca ch'l iva dascōrs sèg, Eddie (Mickey Rourke), al vèṅ strusâ da la sò muróśa, la Lily Warden (Gina Gershon), a séguit 'd 'n afâr muśnènt fra i dū. La dóna dla butéga (Elena Kudaba) la créd ch'la masadōra la sia la Claire e la 'l diś a i detective Sweeney (Tracy Wright) e Lee (Raoul Bhaneja).
La sasìna la pasa pò in dal negòsi 'd 'n arvindrōl (Gary Reineke) par far-as far in présia 'n pasapòrt fals par scapàr via tulénd 'n aparéć al giōran dòp. In cal méntar dū delinquènt ch'i lavóran p'r Eddie, Laramie (Callum Keith Rennie) e Culver (Peter Stebbings), i la péscan par far-as dar indrē di rulèṅ. I pàsan prima da 'l arvindrōl e i al màsan, pò i vaṅ a cà dla Lily ch'la stà a 'l secónd piàṅ dal cundumìni in du a viṿ anc Billy. In cà sua adès a gh'è la Claire ch'la s éra stufàda 'd aspetàr-al e alóra 'l iva vèrt 'l us cun na fursìna da cavìi. Quànd al sò ex muróś al riva in cà cun la sò dóna 'd adès, la Cynthia Lacey (Camilla Rutherford), lē la taja la còrda purtànd-as via la sò burséta. P'r a n far-as védar da lōr, la s buta 'd sóta pardénd al scarpi e finénd in dal tras dla Lily. Chi lē la pònsa in sal divàṅ cun na pistòla in maṅ e la Claire la pénsa bèṅ ad purtàr-ag via la burséta c'n i rulèṅ dèntar prima ad scapàr dascàlsa ciamànd un taxi. Ma la Lily la fà in tèmp a daśdar-as, a cur'r-'g adrē e a ciapàr a 'l ùltim la burséta méntar la màchina dal tasìsta (Charles Officer) l'éra férma a 'n incróś.
La Claire la decìd pò 'd andàr a fargàr dal scarpi rósi ch'l'à vdû in na vadrìna, pròpria qvéla 'd 'l arvindrōl cupâ, quànd a s diś al caś, e pò ad turnàr a Montreal ma a la stasiòṅ di trên la cata la Lily ch'la vōl i sò rulèṅ e anc 'l agìnt Lee ch'al gh dà la casa. In dal salòṅ dla móstra dla Patricia (Barbara Eve Harris), in dua a gh'è 'l foto ad Billy, a riva Laramie parchè al créd ch'i rulèṅ la gh i àppia la Cynthia parchè l'à catâ la burséta che la Claire la gh'iva fargâ cl'atra nòt e dènt'r a gh'éra 'n sò documènt. 'L óm al và a far dū pas sèg e pò Billy, in pinsēr parchè al n la véd piò, al la ciàma a 'l telefunèṅ. In cal mumènt lè, da l'atra part dla sità, la Claire la sènt sunàr un telefunèṅ da 'n casunét dal rusc. La ragàsa la cur subìt a ravanàr in dal spasadùri par rispóndar e la gh finìs dèntar. A surpréśa la cata anc la burséta ch'la pascàva la Lily, và mò là, qvéla che lē 'l àtar dè l'iva casâ via parchè dènt'r a n gh'éra gnint 'd interesànt. Vrénd al bucét di rulèṅ la gh cata di diamànt: i éran qvi lè che Eddie e i sò óm i vlìvan da la Lily. La ragàsa la decìd ad rénd'r-i a la Lily ma quànd l'è là la cata in cà la Cynthia ligàda in sna scrana e la Lily parśunēra ad Laramie che pò al gh spara masànd-la. La Claire la fà àtar tant cun lò e pò la scapa via c'n i diamànt sèg sénsa libràr la Cynthia che però la gh la cava listés a fadìga a ciamàr la pulisìa faghénd al nùmar dal telèfun c'n al naś. In strada la Claire l'incróśa Billy ch'al gh dmanda in du l'andrà e pò al gh rigàla subìt al ciàṿ dla sò màchina acsè lē la pōl turnàr da in du l'è daśvgnùda.