Sleepers
|
C'l artìcul chè 'l è scrit in
Miranduléś |
 Sleepers
| ||
| Sleepers | ||
 Robert De Niro in na figùra dal film | ||
| Śōvan delinquènt 1996 | ||
|---|---|---|
| Regìa: Barry Levinson | ||
| Scritōr: Lorenzo Carcaterra • Barry Levinson | ||
| Atōr: Jason Patric • Kevin Bacon • Brad Pitt Billy Crudup • Jonathan Tucker • Robert De Niro Ron Eldard • Geoffrey Wigdor • Brad Renfro Joseph Perrino • Kathy Kinney • Dustin Hoffman Minnie Driver • Bruno Kirby • Vittorio Gassman | ||
| Müsica: John Williams | ||
| Léngua: Ingléś | ||
| Dürä dal film: 145 minüt | ||
| Nasiōṅ: Stat Unî | ||
Sleepers (Śōvan delinquènt) 'l è 'n film dramàtic dal 1996 ad Barry Levinson trat da 'l rumànś umònim ad Lorenzo Carcaterra ch'al cònta la sò vita.
Par cla pelìcula chè John Williams 'l è stâ candidâ a i Prèmi Òscar dal 1997 par la culòna sunóra 'd un film dramàtic. Al film 'l à muciâ sù da piò ad sènt-a-ssantasìnc migliòṅ ad dòlar, dimóndi da piò di quarànta-quàtar ch'l è custâ.
Sunt
Lorenzo Carcaterra dit "Shakes" (Joseph Perrino), Michael Sullivan (Brad Renfro), John Reilly (Geoffrey Wigdor) e Tommy Cohen Marcano (Jonathan Tucker) i èṅ di ragasèṅ e amìg ch'i vìv'n in dal quartēr malfamâ 'd Hell's Kitchen e Manhattan. In na situasiòṅ difìcila cuma la lōr, i quàtar i n pōlan gnanc cuntàr dimóndi su 'l sò famìji, piutòst su na ragàsa ciamàda Carol Martinez (Minnie Driver) e su 'n prēt ch'al gh fà sarvìr mésa, pàdar Roberto Carrillo (Robert De Niro). Purtròp chi lōr i tîn'n adrē anc a 'n boss malavitóś dal pòst, King Benny (Vittorio Gassman), faghénd-'g anc di lavursèṅ.
In na giurnàda bujènta dl'Istâ dal 1967, mént'r i próv'n a purtàr via un carèl pēś 'd hot dog a òṅ, i al màndan a 'l uśdàł cun dal bruti fridi e i vènan cundanâ a daśdòt méś ad rifurmatòri finénd a Wilkinson. Chè i i ciàpan da spés da quàtar guàrdi cmandàdi par Sean Nokes (Kevin Bacon) e i èṅ custrét anc a patìr di abûś sesuài da lōr. In tut al manéri i quàt'r i giùran 'd a n dir gnint a ninsòṅ.
Quatórd'ś an dòp John (Ron Eldard) e Tommy (Billy Crudup), in cal méntar dvintâ di drugâ pódag e anc di sasèṅ, i incróśan par caś Nokes in un bar la nòt di Sant e i al faṅ fóra par vindicàr-'s ad qvél ch'al gh'à fat patìr. Michael (Brad Pitt), dvintâ prucuradōr distretuàł, al s fà dar al caś par tgnir-'g adrē in prima parsòna. 'L in dà pò nutìsia anc a Carcaterra (Jason Patric) ch'adès al fà 'l giurnalìsta.