Simona Tagli

 Miranduléś

C'l artìcul chè 'l è scrit in Miranduléś

La Simona Tagli (Milàṅ, 22 ad Favràr dal 1964) l'è na showgirl itagliàna.

Biugrafìa

Dòp avér studiâ dansa clàsica a la Scala 'd Milàṅ e jazz mudéran a la scōla dla Luciana Novaro, la Simona la taca a lauràr prima cuma mudèla e pò in televiśiòṅ in dla traśmisiòṅ muśicàla 'd Canale 5 Popcorn e pò a Drive In insém a Zuzzurro e Gaspare. In séguit la pasa a Odeon TV par far M'ama non m'ama e 'l uróscup insém a Branko.

In dal 1991 la cata 'l sucès prilànd al tèsri dal cruśiverbòṅ in dl'edisiòṅ ad Domenica In cundóta p'r i Ricchi e Poveri e Gigi Sabani. La 'l fà faghénd di balét sexy c'n un stanlèṅ stric adòs su la mùśica ad You Can Leave Your Hat On ad Joe Cocker cuma l'iva fat la Kim Basinger in dal film 9 settimane e ½. Sèmp'r insém a Gigi Sabani, in dal 1992 la tōś part a 'l prugràma Piacere Raiuno e pò 'l an dòp a Il grande gioco dell'oca - Stasera mi butto 1993 cun la regìa ad Jocelyn.

In dal 1995 la lavóra a Giochi senza frontiere mént'r in dal 1996 la pasa a TMC par far Il grande gioco del mercante in fiera insém a Jocelyn, a la Sabrina Salerno, a l'Anna Valle e a l'Angela Melillo.

Dòp avér-ag dâ 'n taj c'n al lavōr par ciapàr la làurea in architetùra, la Tagli la próa a turnàr in televiśiòṅ in dal 2005 cuma cuncurènta dal reality show La Talpa ma la n gh la cava minga parchè la pèrd al balutàǵ cun la Bambola Ramona. 'L an dòp la gh próa incóra faghénd la risèrva in dla quìnta edisiòṅ 'd L'isola dei famosi ma la gh'à da ritiràr-as par di prubléma 'd salùt.

In dal 2011 la gh dà a muć definitivamènt e la decìd ad vèr'r un salòṅ ad belésa par màd'r e putèṅ. In dal 2016 la s càndida a gl'elesiòṅ ad Milàṅ p'r al partî di Fradèi 'd Itàglia. In dal sò prugràma la vōl tiràr via dal pisti ciclàbili par far giràr méj al màchini parchè a n sém mia in Ulànda, dar-'g un taj cun tut chi gay pride lè parchè i vōlan custrìnśar la gint a far i cònt cun la traśgresiòṅ e lē l'è par la famìja nurmàla e tōr i furastēr in Itàglia sōl i èṅ prònt a pargàr al nòstar Dio.

Nòti