Shia LaBeouf
|
C'l artìcul chè 'l è scrit in
Miranduléś |
_(cropped).jpg)
Shia Saide LaBeouf (Los Angeles, 11 ad Śugn dal 1986, a s lèś /ˈʃaɪ.ə ləˈbʌf/ in Ingléś) 'l è 'n atōr e regìsta americàṅ.
Biugrafìa
Fiōl 'd un pajàs cun di urìgini cajun, Jeffrey, e dna balarìna erbèja, la Shayna Saide, dū „hippies“ che pò i s èṅ divìś, Shia al crés in Califòrgna. Dòp avér ciapâ 'l diplòma in dal 2003 al s iscrìv a l’Hamilton Academy of Music ad Los Angeles c'n in tèsta l'idéa ad sfundàr in dal mónd dal spetàcul.
Dòp dū film dal 1998, LaBeouf al lavóra in dal 2003 insém a la Cameron Diaz in dal film Charlie's Angels - Più che mai. 'L an dòp al gh'à na part piculìna in Io, Robot 'd Alex Proyas e pò al gira in dal 2005 Constantine cun Keanu Reeves. In dal 2007 'l è sarnî p'r al prudutōr Steven Spielberg p'r al thriller Disturbia in dua al fà 'l prutagunìsta. In séguit al tōś part a la trilugìa di Transformers dvintànt acsè 'n atōr ad qvéi più cgnusû fra i śōvan.
In dal 2008 'l è 'l fiōl 'd Harrison Ford in Indiana Jones e il regno del teschio di cristallo pò in dal 2011 al lavóra insém a Robert Redford in dal suo La regola del silenzio - The Company You Keep. In dal 2013 al gira dū film dimóndi spurcaciòṅ par Lars Von Trier: Nymphomaniac: volume I e Nymphomaniac: volume II.
Vita privàda
.jpg)
Durànt la sò caréra Shia 'l à fat dascórar dimóndi ad lò par di fat ch'i n gh intràvan gnint c'n al sò mistēr.
In dal Nuvémbar del 2007 LaBeouf al vèṅ arestâ a Chicago p'r ès'r-as fisâ, imbariàg pódag, a n lasàr minga 'n negòsi dla cadéna Walgreens.[1]
In dal Favràr dal 2011 al s mét a dar di cupòṅ in un bar a 'n àtar cliènt. La casutarìa la finìs quànd a riva lè la pulisìa.[2] In Utóbar al fà àtar tant a Vancouver.[3]
In dal Favràr dal 2014 a Berlîṅ, durànt la serimògna dal fèstival dal cìnema, al gira in sal tapē rós c'n un sachét ad carta in tèsta cun scrit insìma „I am not famous anymore“ (A n sòṅ piò famōś).[4] In Śugn al finìs in manéti a New York durànt al spetàcul Cabaret tgnû a 'l Studi 54 p'r èsar curs adrē a 'n barbòṅ cun na maja sćiancàda adòs, avér ingusâ na dóna 'd fràguli e avér fumâ cuma 'n turc a 'l intéran dal teàtar.[5] In Nuvémbar al cònta che na dóna, durànt na sò performance artìstica ciamàda “I am Sorry” in dua al gh'iva 'd armàgn'r in śnòc cun la fàcia quaciàda da 'n sachét e cun na tuta ad tuxedo adòs, l'à druâ par déś minùt la scùria sèg par pò cavàr-al śò e viulentàr-al p'r al fat che lò al n psiva far gnint. “I gh'éran di sintunēr ad parsòni quànd l'è andàda via c'n i cavìi daspatnâ e c'n al rusét śbavśâ. A n è mia stâ 'n bèl quèl par mè e gnanc par sò marè” 'l à pò dit.[6]
Al gh'à abû dal relasiòṅ cun gl'atōri Megan Fox e Carey Mulligan e cun la stilìsta Karolyne Pho. Adès al s è mis cun l'atōra Mia Goth, cgnusùda in dal set ad Nymphomaniac. P'r avér la part 'l à dit ch'l à mandâ na foto dla sò béga a la prudusiòṅ. In dal film al s è anc fat muntàr na càmera insìma a 'l cas par giràr soquànti séni.[7]
Filmugrafìa
- 1998 - Monkey Business, regìa ad Michael Radford
- 1998 - The Christmas Path, regìa ad Bernard Salzmann
- 2003 - Holes - Buchi nel deserto (Holes), regìa 'd Andrew Davis
- 2003 - Scemo e più scemo - Iniziò così (Dumb & Dumberer: When Harry Met Lloyd), regìa ad Troy Miller
- 2003 - Charlie's Angels - Più che mai (Charlie's Angels: Full Throttle), regìa ad McG
- 2003 - La battaglia di Shaker Heights (The Battle of Shaker Heights), regìa 'd Efram Potelle e Kyle Rankin
- 2004 - Io, Robot (I, Robot), regìa 'd Alex Proyas
- 2005 - Constantine, regìa ad Francis Lawrence
- 2006 - Il più bel gioco della mia vita (The Greatest Game Ever Played), regìa ad Bill Paxton
- 2006 - Guida per riconoscere i tuoi santi (A Guide to Recognizing Your Saints), regìa ad Dito Montiel
- 2007 - Bobby, regìa 'd Emilio Estevez
- 2007 - Disturbia, regìa ad D. J. Caruso
- 2007 - Transformers, regìa ad Michael Bay
- 2008 - Indiana Jones e il regno del teschio di cristallo (Indiana Jones and the Kingdom of the Crystal Skull), regìa ad Steven Spielberg
- 2008 - Eagle Eye, regìa ad D. J. Caruso
- 2009 - New York, I Love You, di registi vari (segmento di Shekhar Kapur)
- 2009 - Transformers - La vendetta del caduto (Transformers 2: Revenge of the Fallen), regìa ad Michael Bay
- 2010 - Wall Street - Il denaro non dorme mai (Wall Street: Money Never Sleeps), regìa 'd Oliver Stone
- 2011 - Transformers 3 (Transformers 3: Dark of the moon), regìa ad Michael Bay
- 2012 - Lawless, regìa ad John Hillcoat
- 2012 - La regola del silenzio - The Company You Keep (The Company You Keep), regìa ad Robert Redford
- 2013 - Charlie Countryman, regìa ad Fredrik Bond
- 2013 - Nymphomaniac: volume I, regìa ad Lars Von Trier
- 2013 - Nymphomaniac: volume II, regìa ad Lars Von Trier
- 2014 - Fury, regìa ad David Ayer
Nòti
- ↑ Shia LaBeouf arestâ a Chicago spaziofilm.it, 6 ad Nuvémbar dal 2014
- ↑ Shia LaBeouf in manéti dòp na casutarìa repubblica.it, 7 ad Favràr dal 2011
- ↑ Shia LaBeouf incóra imbariàg, piciâ in na casutarìa a Vancouver cinema-tv.guidone.it, 18 'd Utóbar dal 2011
- ↑ Berlîṅ, LaBeouf c'n un sachét ad carta in tèsta: "A n sòṅ piò famōś" repubblica.it, 10 ad Favràr dal 2014
- ↑ Al cur adrē a 'n barbòṅ e 'l ingòsa na dóna 'd fràguli: in manéti 'l atōr Shia LaBeouf rainews.it, 27 ad Śugn dal 2014
- ↑ Shia LaBeouf viulentâ: "Na dóna la m à stuprâ mént'r a s éra drē a far na performance artìstica" cinema.excite.it, 28 ad Nuvémbar dal 2014
- ↑ Shia LaBeouf: "Par Nymphomaniac a-j-ò vlû muntàr na càmera insìma a 'l uśèl" cinema.excite.it, 12 ad Favràr dal 2014