Scusi, lei è normale?
|
C'l artìcul chè 'l è scrit in
Miranduléś |
 Scusi, lei è normale?
| ||
 L'Anna Maria Rizzoli in na figùra dal film | ||
| Pardunâ, sî'v nurmàł vò? 1979 | ||
|---|---|---|
| Regìa: Umberto Lenzi | ||
| Scritōr: Umberto Lenzi • Dardano Sacchetti | ||
| Atōr: Renzo Montagnani • Anna Maria Rizzoli Ray Lovelock • Enzo Cerusico • Sammy Barbot Jimmy il Fenomeno • Susanna Schemmari Aldo Maccione • Marco Tulli • Vinicio Diamanti | ||
| Müsica: Franco Micalizzi | ||
| Léngua: Itagliàṅ • Emigliàṅ • Francéś | ||
| Dürä dal film: 90 minüt | ||
| Nasiōṅ: Itàglia | ||
Scusi, lei è normale? (Pardunâ, sî'v nurmàł vò?) l'è na cumèdia itagliàna dal 1979 'd Umberto Lenzi ch'al l'à anc scrita insém a Dardano Sacchetti.
Sunt
Al pretōr piemuntéś ad Spulēt, Gustavo Sparvieri (Renzo Montagnani) 'l è 'n giùdas dimóndi sevēr e bigòt: quànd a s trata ad fat spurcaciòṅ o scandalóś lò al s dà da far subìt par far rigàr drit p'r al vèrs giùst la gint malnéta e visióśa anc parchè 'l è respunsàbil dla cinsùra in di film e in dal reclàm. Purtròp par lò al gh'à 'n anvōd, Franco Astuti (Ray Lovelock), ch'l è dl'atra spónda mo lò al n al sà mia. A 'l ragàs a gh piàś balàr dimóndi e 'l viṿ c'n un travestî ch'al s fà ciamàr Nicole invéci 'd Nicola Proietti (Enzo Cerusico).
A na gara 'd bal Franco al cgnós na śuvnòta ch'la n sa stufa mai 'd mōv'r-as su la pista, l’Anna Maria Immacolata (Anna Maria Rizzoli), ch'ad nascòst la mùcia sù quèl cavànd-as śò in soquànt fotorumànś malnét druànd al nóm 'd art ad Ninì Pom Pom. La Nicole la s ingeluśìs sèg e la decìd ad far finta 'd cupàr-as butànd-as śò p'r al pònt Milvio, al sit in du i s éran cgnusû prima 'd dvintàr muróś. Cardénd-la mòrta, par pagàr al funeràl Franco al dmanda sènt-mila franc a sò sîṅ che, par dar-'g-i, al vōl ch'al s méta insém a la fiōla d'l unurévul Grisaglia (Marco Tulli) ch'l'è pròpria l’Anna Maria.
Quànd da 'l Tévere a salta fóra 'l cadàvar dna dóna scurtlàda ch'la pâr la Carla (Susanna Schemmari), èx balarìna 'd Franco, al cumisàri Pecorella (Aldo Maccione) al créd ch'al sasèṅ al sia pròpria lò parchè soquànt dè prima al gh'iva dit ch'la sò muróśa l'éra andgàda in dal fiùm mént'r al pulisiòt al péns' invéci ch'al l'àppia cupàda.