Sara Tommasi
|
C'l artìcul chè 'l è scrit in
Miranduléś |
La Sara Tommasi l'è na showgirl e atrìs unbra nada a Narni al prim 'd Agóst dal 1982. L'è alta 1,70 e al sò miśùri i èṅ 87-61-87 (téti arfàti).
P'r al mutōr internet ch'al cata al ròbi Yahoo, chi lē l'è la dóna itagliàna più pascàda in dla réda in dal 2013[1].
Biugrafìa
Dòp avér ciapâ na làurea in ecunumìa a l'Università Bocconi ad Milàṅ, la s mét in bisàca anc un diplòma in recitasiòṅ e disiòṅ a 'l CTA e la fà 'n stage a 'l Actor's Studio ad New York.
La sò caréra la taca in televiśiòṅ faghénd la veejay p'r All Music. In dal 2002 la fà la valéta in dal Paolo Limiti Show su Rai 1 e l'inviàda in dal prugràma Con tutto il cuore.
L'è finalìsta a Veline in dal 2004, nadrìna a Paperissima e schedìna a Quelli che il calcio dla Simona Ventura. Pròpria chi lē la la manda in dal 2006 a l'Isola dei Famosi e la Sara la riva quàrta in cal reality show lè da drē a Paolo Calvani. Sōl sinc an dòp a s vîṅ a savēr che, p'r andàr là, l'è stada arcmandàda diretamènt par Silvio Berlusconi[2].
In dal 2006 la lavóra p'r Italia 1 in dal prugràma On the Road mént'r in dal 2007 la s fà tōr śò cavàda śò par la rivìsta Max faghénd al sò calendàri. Sèmp'r in dal 2007 la lavóra insém a Fabrizio Frizzi in dla cundusiòṅ dal dū puntàdi ad Mi fido di te.
In dal 2008 la taca a lauràr in dal cìnema in dal film Ultimi della classe dirèt par Luca Biglione. In dal 2009 la lèś i risultâ dal partìdi 'd balòṅ in dal prugràma ad Rete 4 ch'al fava védar i gòi dl'Europa League. In dal Luj dal 2009, durànt la traśmisiòṅ dal prèmi Persefone su Rai 1, la Sara Tommasi la và, invidàda p'r al cundutōr Pino Insegno, in sal palc par dar al prèmi a Alessandro Chiti e la diś: «A farò un film sul fasìśum, perìud stòric famóś di an Sinquànta...».
Al 31 ad Śnar dal 2011 la vîṅ intervistàda in dal prugràma dla ràddio Un Giorno da Pecora (Un dè da pégura) e la diś ch'in dal 2009 Silvio Berlusconi al la vliva candidàr a gl'elesiòṅ europei ma lē l'à dit ad no parchè la vliva a tut i cóst far caréra in dal giurnalìśum o in dal cìnema: «A gh'ò di rimòrs par l'ucaśiòṅ pardùda, a n ò minga ciapâ l'ufèrta ch'al m vliva dar al Cavalēr, ma mè a vój far dal showbiz». L'à pò dit ciàr e tónd ch'la n è mai stàda ad Arcore, cum a parév ch'a fus sucès stand a gl'intercetasiòṅ dal caś Rubygate, parchè di làdar i gh'aṅ rubâ al telefunèṅ tri vòlti e i èṅ stâ lōr a ciamàr da 'd là. La diś ad nò anc su 'l fat ch'la sia stada lē a mandàr di SMS daśnumóś a 'l presidènt dal cunsìli parchè, la diś lē, a sarà stâ un tisi ch'l à catâ al sò telefunèṅ daśmindgâ in dal taxi a mandàr di mesàǵ a caś[3].
Da 'l punt ad vista sentimentàl, dòp na storia cun 'l ex śugadór dal Milan Ronaldinho, la Sara Tommasi la diś al setimanàl Diva e Donna ch'l è drē tacàr na stòria cun Mario Balotelli, in alóra atacànt dal Manchester City: «Mario al m piàś dimóndi, a sòṅ cuntènta». Al dè dòp però Balotelli al la śmintìs: «Ca-la lè n'atra ch'la s invénta dal stòri mèg, a n gh'ò minga biśógn ad gossip, mè a pèns sōl a śugàr»[4].
In dal 2012 la taca na sò batàja cónt'r al signuràǵ bancàri cavànd-as śò sénsa mudàndi in pùblic par prutèsta. In Favràr la và a dascórar ad c'l argumènt lè a 'n cunvégn pulìtic da 'l tìtul «Gl'urìgini dal signuràǵ bancàri e 'l puśisiòṅ dal banchi sentràli» mis in pē da 'l unurévul Domenico Scilipoti[5].
Sèmp'r in dal 2012 l'à girâ un film pòran par la "Dive&Star Production Management" da 'l tìtul "Sara contro tutti" cun Manzo Del Toro e Leonardo Conti[6] e pò òṅ da 'l tìtul "I soliti noti". P'r i taramutâ dl'Emégglia invéci l'à preparâ un calendàri par catàr sù di bèsi, cun lē cavàda śò[7].
In dal 2018, dòp quàt'r an ad silénsi, la tórna a dascórar in n'intervìsta a 'l prugràma Le Iene in du la cunfèsa 'd èsar na parsòna bipulàra e ch'la pinsàva 'd murìr[8]. In d'l Utóbar dal 2019, òspit dla Barbara D'Urso, la precìśa che dimóndi di sò prubléma i èṅ tacâ da quànd di brut sugèt i gh'aṅ fat tōr dla dròga[9].
Filmugrafìa
- Ultimi della classe, regìa ad Luca Biglione 2008
- Il falco e la colomba, regìa ad Giorgio Serafini - Miniserie TV - Canale 5 2009
- Crimini: Neve sporca, regìa ad Davide Marengo - Film TV - Rai Due 2010
- I delitti del cuoco, regìa 'd Alessandro Capone - Miniserie TV - Canale 5 2010
- Sara contro tutti, regìa ad Guido Maria Ranieri - (film pòran) 2012
Nòti
- ↑ Al Mèteo e Sara Tommasi i èṅ al paròli più pascàdi in sal Yahoo! in dal 2013 Fastweb.it, 29 ad Nuvémbar dal 2013
- ↑ La Tommasi arcmandàda da 'l premier par l'Iśùla di famōś Corriere.it, 19 ad Setémbar dal 2011
- ↑ Sara Tommasi a Un giorno da pecora Corriere.it, 31 ad Śnar dal 2011
- ↑ Dichiarasiòṅ ad Mario Balotelli Corriere.it, 2 ad Favràr dal 2011
- ↑ La Sara Tommasi la s cava śò (incóra) cónt'r al banchi: a Róma cunvégn bujènt corrieredelmezzogiorno.corriere.it, 28 ad favràr dal 2012
- ↑ Sara contro tutti: l’anteprima sul web il 6 luglio Lastampadelmezzogiorno.it, 13 ad Śugn dal 2012
- ↑ Sara Tommasi incóra nûda, ma 'sta vòlta l'è p'r i taramutâ Modenaonline.info, 2 ad Nuvémbar dal 2012
- ↑ La Sara Tommasi la tórna a dascórar dòp quàt'r an: «A s éra bipulàra, a pinsàva 'd murìr» Corriere Della Sera, 19 'd Avrìl dal 2018
- ↑ La Sara Tommasi la tórn' in tv a “Live Non è la D’Urso”: “I m dàv'n un muć ad cucaìna custrinśénd-um a giràr di film hard” Il Fatto Quotidiano, 14 'd Utóbar dal 2019
Wikiquote contiene citazioni di o su Sara Tommasi
Wikimedia Commons contiene file multimediali su Sara Tommasi
