Barbara D'Urso
|
C'l artìcul chè 'l è scrit in
Miranduléś |
La Maria Carmela D'Urso (Nàpuli, 7 ad Maǵ dal 1957) l'è na cundutōra dla televiśiòṅ e atōra itagliàna. L'è cgusùda méj c'n al nóm 'd art ad Barbara D'Urso mo anc sōl cuma Carmelita o c'n al scutmàj ad Lady Cologno o 'd Barbarella[1].
Dòp ès'r-as fata i òs faghénd la valéta a Telemilano 58 e avēr tòlt part a 'l prugràma spurcaciòṅ Stryx su la Rete 2, in dal 1980 la lavóra cun Pippo Baudo a Domenica In in du la canta 'l pès Dolceamaro. A la mità di an Nuànta la preśénta Mattina in famiglia e Mezzogiorno in famiglia, prugràma 'd Michele Guardì.
Famóśa p'r al sò persunàǵ dla dutōra Giò in un telefìlm dla Mediaset, la Maria Carmela la s è fata cgnósar dabòṅ p'r avēr cundót da i an Dumìla in avànti soquànt reality show cuma al Grande Fratello, La fattoria, Reality Circus e Uno due tre stalla e prugràma più alśēr cuma Mattino Cinque, Pomeriggio Cinque, Domenica Cinque e Capodanno Cinque. In di ùlt'm an l'è la prutagunìsta di spetàcui 'd Canale 5 Domenica Live e Live - Non è la D'Urso, da la crìtica batśâ da spés cuma rusc[2] ma cun di ascōlt in gènar élt[3].
L'è stada spuśàda c'n al balarèṅ Michele Carfora e l'è stada ligàda a Memo Remigi, Miguel Bosé, Vasco Rossi e c'n al prudutōr ad cìnema Mauro Berardi ch'al gh'à dâ dū fiōi masć fóra da 'l matrimòni[4]. L'è dimóndi religióśa e la diś al ruśàri tut al siri[5].
Fra i persunàǵ ch'l'à fat cgnós'r a 'l pùblic itagliàṅ a 'rcurdém la spagnōla Aida Nizar, Rodrigo Alves dit „al Ken Umàṅ“, l'anvōda 'd Fabrizio De André, la Francesca, al dietòlug Alberico Lemme e la védva 'd Gino Bramieri, la Lucia.
Filmugrafìa
- 1982 - Erba selvatica, regìa ad Gianfranco Campigotto
- 1985 - Blues metropolitano, regìa ad Salvatore Piscicelli
- 1989 - Vogliamoci troppo bene, regìa ad Francesco Salvi
- 1992 - Non chiamarmi Omar, regìa ad Sergio Staino
- 1995 - Mollo tutto, regìa ad José María Sánchez
- 1995 - Romanzo di un giovane povero, regìa 'd Ettore Scola
- 1999 - Il manoscritto di Van Hecken, regìa ad Nicola De Rinaldo
- 1999 - Tutti gli uomini del deficiente, regìa ad Paolo Costella
- 2004 - Per giusto omicidio, regìa ad Diego Febbraro
- 2018 - Il vegetale, regìa ad Gennaro Nunziante
Culegamènt estéran
Nòti
- ↑ La riscòsa dal sinquantèni e 'l sò sfidi tv Il Giornale, 3 ad Nuvémbar dal 2016
- ↑ Salvini e 'l śōg di «rinfàs» in dal salòt dla Barbara D’Urso Il Corriere della Sera, 23 ad Setémbar dal 2019
- ↑ Barbara D’Urso, al filmâ un cicinèṅ “bujènt”: la léva in sù la stanèla e gl'ascōlt Voce di Napoli, 19 ad Mars dal 2018
- ↑ “Dū ragàs spléndid!”. Î'v mai vdû i fiōi dla Barbara D’Urso? La Carmelita la i tîṅ sèmpar luntàṅ da la tv: Giammauro al gh'à 32 an e Emanuele 30. Chi èṅ-i e csa faṅ-i in dla vita. Mamme Oggi, 2016
- ↑ Salvini e 'l vitmi dal curóna-vìrus: al rècita 'l Etéran ripóś in dirèta tv insém a la D’Urso La Stampa, 30 ad Mars dal 2020