Roba da ricchi
|
C'l artìcul chè 'l è scrit in
Miranduléś |
 Roba da ricchi
| ||
 La Serena Grandi in na figùra dal film | ||
| Ròbi da ric 1987 | ||
|---|---|---|
| Regìa: Sergio Corbucci | ||
| Scritōr: Bruno Corbucci • Sergio Corbucci Mario Amendola • Massimo Franciosa Gianni Romoli • Bernardino Zapponi | ||
| Atōr: Laura Antonelli • Francesca Dellera Lino Banfi • Renato Pozzetto • Paolo Villaggio Serena Grandi • Maurizio Micheli • Milena Vukotic Vittorio Caprioli • Claudia Gerini • Rosanna Banfi | ||
| Müsica: Carmelo La Bionda Michelangelo La Bionda | ||
| Léngua: Itagliàṅ • Francéś | ||
| Dürä dal film: 110 minüt | ||
| Nasiōṅ: Itàglia | ||
Roba da ricchi (Ròbi da ric) l'è na cumèdia itagliàna a epiśòdi dal 1987 ad Sergio Corbucci, ambintànda in dal sud-èst dla Frància fra Nisa e 'l Prinsipâ 'd Mònag.
Sunt
Prim epiśòdi
'L imbalsâ e minciòṅ asicuradōr Attilio Carbone (Paolo Villaggio) 'l incróśa in dla strada par Nisa cla furba stramaladìda dla Dora (Serena Grandi) ch'la naśa subìt che chi lò 'l è óm giùst ch'a gh vōl par fargàr di migliàrd a l'asicurasiòṅ. Faghénd-ag crédar 'd ès'r inamuràda 'd lò, la dóna la gh diś ch'la vōl pasàr la vita sèg in n'ìśula da sógn ma prima chi lò al gh'arév da jutàr-la a far fóra sò marè, al piemuntéś Guidobaldo (Maurizio Micheli), ch'al gh'à 'n bras ad légn e ch'al vōl far na pòlisa su la sò barca. La Dora la vōl invéci far-'g-la far su la vita par pò butàr in mâr al sò còrp e tgnir-'s i bèsi. Ma la dóna la n gh'à minga intensiòṅ ad ciulàr sōl l'asicurasiòṅ.
Secónd epiśòdi
Al cumendadōr pugléś Aldo Petruzzelli (Lino Banfi) 'l à fat i bèsi vindénd la pasta in gir p'r al mónd. Durànt i sò viàś 'd lavōr al cata sèmpar la manéra 'd gusàr-as na quàlc bèla figa. Adès che finalmènt al vōl punsàr par soquànt dè in vacànsa in Frància cun la sò famìja a salta fóra 'n prubléma: sò mujēr, la Mapi (Laura Antonelli), l'è andàda in depresiòṅ parchè, a dita dla psicòluga (Milena Vukotic), a fòrsa 'd avēr-ag tut adès la gh'à biśógn ad far vgnir fóra la sò part più muśnènta e malnéta, in pôchi paròli 'd far-as dar dū cōlp da 'n cantànt da strada, cgnusû c'n al scutmàj Napuleòṅ (Maurizio Fabbri), p'r armét'r-as in salùt. Aldo 'l è custrét a cédar dimóndi malvluntéra ma l'éra tuta na bala strulgàda da sò mujēr par far-ag pagàr i sò còran.
Tèrs epiśòdi
Don Vittorino (Renato Pozzetto), in dal méntar ch'l è drē a turnàr in Itàglia dòp un viàś a Lourdes insém a i sò fedēi, al vîṅ farmâ da i servìsi segrét parchè 'l è cumpàgn a 'n óm ch'al turmènta tut al nòt gl'insùni dal prinsipésa Topazia (Francesca Dellera). Su presiòṅ dal cavalēr ch'la gh'à da spuśàr, Adalberto (Alfiero Toppetti), dal sò psicòlug (Enzo Garinei), dal munsgnōr (Vittorio Caprioli) e dal papa stés, Vittorino al gh'à d'impersunàr 'l óm dal sógn, ciamâ Dragòṅ, par far-ag pasàr cun la sò mòrt par finta la sò usesiòṅ e la sò angùstia, in manéra 'd a n far minga saltàr al matrimòni.