Distùrub depresìṿ
|
C'l artìcul chè 'l è scrit in
Miranduléś |
.jpg)
Al Distùrub depresìṿ, cgnusû anc cuma Depresiòṅ, 'l è 'n brut mâł ch'al culpìs al caràt'r e la tèsta dla gint e ch'al gh fà calàr la vója 'd tgnir adrē a i piaśēr dla vita insém a di àtar distùrub cuma 'l magòṅ, la lòrgna, vilimènt, stufìśia, vója 'd lasàr-'s andàr e 'd tgnir adrē a gnint, brut pinsēr e làgarmi. Al parsòni ch'i patìsan la depresiòṅ i n gh la càvan piò a tgnir bòta e a tiràr avànti ch'a s'a vgnis un “vèra e sèra” par lōr a sarév anc méj. Dal vòlti chi malâ chè i decìd'n anc ad tōr-as la vita par dar-'g un taj e dir abàsta.
Da spés i deprès i càtan cunfòrt in dla butìglia parchè i próan a 'ndgàr i daspiaśēr in dal bévar anc se pò 'l è pèś.
A i deprès a s dà dal madśìni cuma 'l Prozac par tiràr-i sù o sinò i s fànan dal terapìi psichiàtrichi. Na vòlta a s druàva anc 'l elettroshock o la lubumutiśasiòṅ mént'r un quàlc ajùt mudèr'n a pōl èsar dâ da la fototerapìa, butàr-ag dla luś in di òć a la matìna, o d' a n far-i minga durmìr a la nòt acsè al còrp 'l è bòṅ ad stramnàr in gir dla serutunìna.