Rick Santorum
|
C'l artìcul chè 'l è scrit in
Miranduléś |
Richard John "Rick" Santorum (Winchester, 10 ad Maǵ dal 1958) 'l è un pulìtic americàṅ cunservadōr ch'l è stâ senadōr p'r al partî republicàṅ dal stat dla Pennsylvania dal 1995 a 'l 2007.
Biugrafìa
Mémbar dal Partî Republicàṅ, 'l è stâ Presidènt dla cunferénsa di Senadōr Republicàṅ, la tèrsa carga più impurtànta dal sò partî a 'l Senàt.
Al dè 'd adès Santorum al lavóra cuma avucàt e cunsulènt 'd aśiénda e al dascór anc p'r al canàŀ televiśìṿ Fox News.
Santorum al gh'à di urìgini itagliàni, par part ad pàdar (Aldo ch'al daśvèṅ da Riva dal Garda) e anc ad màdar (Catherine Dughi ch'la gh'à dal sangṿ emigliàṅ esénd mèśa irlandéśa e mèśa ad Bedògna, un cumùṅ ad Pärma). Rick 'l è spuśâ cun la Karen e sèg al gh'à 8 putèṅ. L'ultma putìna, Bella, i l'àṅ abùda quànd la sgnóra Santorum l'andàva p'r i sinquànt'an, n'età élta p'r avér di fiōi e difàti la putìna l'è nada listés anc se i sò genitōr i saìvan ch'la gh'iva un distùrub grâṿ ch'la gh lasa sōl al 10% ad pusibilità ad scampàr da piò ad sinc an. 'N àtar fiōl, nâ prima dal tèmp, 'l éra mòrt parchè malfurmâ geneticamènt ma sò màdar l'iva decìś 'd andàr avànti listés e ad parturìr andànd in a risć ad murìr anca lē. I dū i ìvan pò sarnî ad purtàr a cà al cadàvar dal masćét par far-al védar a chi àtar putèṅ e far acsè cgnósar Gabriel a i sò fradèi.
In di elesiòṅ dal 2006 p'r al Senàt 'l è stâ batû dal candidâ demucràtic Bob Casey, Jr. ciapànd al 41% di vōt còntra 'l 59%, pardénd acsè la sò scrana ad senadōr dla Pennsylvania ch'al tgniva stric da dod'ś an.
Al s è candidâ a 'l primàri republicàni dal 2012 p'r èsar numinâ uficialmènt sfidànt dal demucràtic Barack Obama par dvintàr presidènt di Stat Unî.
Al 10 'd Avrìl dal 2012, vilî p'r al cundisiòṅ ad salùt dla fiōla Bella misa mâŀ a 'l uśdàŀ, al fà però savér ch'al gh dà a muć, lasànd la strada vèrta dal tut a 'l sò rivàŀ Mitt Romney che, in cal mèntar, 'l iva muciâ sù al dópi di delegâ par la nomination a la Cà Biànca: «La mè campàggna presidensiàla la finìs chè anc se la mè batàja pulìtica la cuntìnua».
Idéi pulìtichi
Santorum, mémbar dal grup cristiàṅ tradisiunàŀ ciamâ The Family, 'l è a favōr dla péna ad mòrt e al pòrta avànti di idéi cunservadóri in camp suciàŀ, fiscàŀ e còntra i fnòć. Al dà tut al sò apòǵ a 'l idéa dal diśégn inteligìnt dal mónd còntra quél dla selesiòṅ naturàla. Al s è dâ da far dimóndi anc p'r al caś ad Terri Schiavo.
In dal córs dn'intervìsta a Piers Morgan dla CNN, in séguit a na dmanda su cuśa al pinsìs d'l abòrt in caś ad stuppro, lò 'l à rispòst che anc in cal caś lè al putèṅ al gh'à da èsar cunsiderâ un regàl ad Dio.