Nude restaurant
|
C'l artìcul chè 'l è scrit in
Miranduléś |
 The Nude Restaurant
| ||
| Nude restaurant | ||
 Taylor Mead e la Viva in na figùra dal film | ||
| Risturànt nûd 1967 | ||
|---|---|---|
| Regìa: Andy Warhol | ||
| Scritōr: Andy Warhol | ||
| Atōr: Viva • Taylor Mead Louis Waldon • Billy Name | ||
| Müsica: / | ||
| Léngua: Ingléś | ||
| Dürä dal film: 100 minüt | ||
| Nasiōṅ: Stat Unî | ||
Nude restaurant (Risturànt nûd) 'l è 'n film grutésc americàṅ dal 1967 'd Andy Warhol ch'al 'l à girâ in na nòt d'l Utóbar dal 1967 in dal risturànt “Mad Hatter” (Caplàr mat) ad Manhattan.
Sunt
In un risturànt ad New York na dóna cavàda śò cun sōl dal mudandìni adòs (Viva) la dascór c'n al camarēr (Allen Midgette). Soquànt óm nûd i vànan via ma di àtar i rìvan lè a 'l pòst lōr mént'r òṅ al tira śò incòsa cun la càmera. I dū i sa spòstan da 'n tàv'l a c'l àtar par dascórar c'n i cliènt. A s davśìna pò 'n umèṅ piculèṅ (Taylor Mead) a 'l bânc par ciacaràr cun la sgnurìna e lē la taca na piva sèg ch'la n finìs piò. La gh cònta ad qvand l'éra pìcula e dal mónd catòlic in du la vivìva. 'L óm al la scólta ch'al pâr mèś indurminsâ pò al gh dà 'n taj e al s mét a dascórar c'n un suldâ (Julian Burroughs) ch'l iva fat la guèra in Vietnam.
In cal méntar la camarēra la và incóra adrē cun cla stòria di prēt spurcaciòṅ prima 'd dmandàr ad śmursàr la càmera. P'r un pôc la vèṅ cuntintàda ma pò c'l àt'r al tac' incóra a giràr e la dóna la cuntìnua acsè a dascórar da par lē di sò fat.
Cumènt
Un crìtic 'd alóra, Stephen Koch, 'l à scrit ad cal film chè: «Un grup ad soquànt óm e na dóna sōla i èṅ sintâ cavâ śò in un risturànt parchè 'l è tròp ad mòda armàgnar nûd cun cal pòran nóṿ 'd al dè 'd incō. I dascóran, i dascóran, i dascóran e anc s'ta t sfòrs ad capìr quèl, ta n gh cat gnint 'd interesànt... la cunfesiòṅ tròp lunga dla sgnurìna Hoffman a riguàrd dla sò giuinésa in d'l ambînt catòlic e al nutìsi su 'l prēt purcùs i riguàrdan più gl'usesiòṅ persunàli dl'atōra ch'i fat par qvéi ch'i èṅ». Invéci a Achille Bonito Oliva al film al gh'è piaśû: «'L òć cìnic ad Warhol al dà indrē na cundisiòṅ véra d'l óm mèdi americàṅ, e anc lò in na manéra pragmàtica al n gh scapa minga via, e gnanc 'l al vōl, esénd ch'i mudèi e i mèś druâ i n èṅ minga 'd fóra dla realtà americàna, ma dèntar.».