Non è peccato - La Quinceañera
|
C'l artìcul chè 'l è scrit in
Miranduléś |
 Quinceañera
| ||
| Non è peccato - La Quinceañera | ||
 L'Emily Rios e Jesse Garcia in na figùra dal film | ||
| A n è mia pcâ - La fèsta di quind'ś an 2006 | ||
|---|---|---|
| Regìa: Richard Glatzer • Wash Westmoreland | ||
| Scritōr: Richard Glatzer • Wash Westmoreland | ||
| Atōr: Emily Rios • Jesse Garcia • Chalo González David W. Ross • Johnny Chavez • Jesus Castanos | ||
| Müsica: Victor Bock • Michael B. Jeter J. Peter Robinson • Micko Westmoreland | ||
| Léngua: Spagnōl • Ingléś | ||
| Dürä dal film: 90 minüt | ||
| Nasiōṅ: Stat Unî | ||
Non è peccato - La Quinceañera (A n è mia pcâ - La fèsta di quind'ś an) l'è na cumèdia dramàtica dal 2006 ad Richard Glatzer e ad Wash Westmoreland ch'i l'aṅ scrita e giràda insém. L'è stada prudóta par Todd Haynes.
La Quinceañera (a s lèś [kinseaˈɲeɾa] in spagnōl dònca Chinseagnéra da 'l nòstri bandi) l'è na fèsta dal tradisiòṅ di paéś sudamericàṅ in dua i s festégian al ragàsi ch'i cómpian quind'ś an.
Al film 'l è stâ preśentâ a 'l Sundance Film Festival dal 2006 in dua 'l à vins al prèmi p'r al film più bèl e anc qvél dal pùblic. Custâ quatarsènt-mila dòlar al 'n à pò fat sù dū migliòṅ e mèś.
Sunt
La Magdalena (Emily Rios) l'è na ragasōla 'd Los Angeles ch'la stà par cómpiar quìnd'ś an ma i sò genitōr, uriginàri dal Mèsic e uperàj, i n gh'aṅ minga di bèsi abàsta par mét'r in pē par lē na fèsta dla Quinceañera cum a s dév, cuma qvéla 'd sò cuśìna Eileen (Alicia Sixtos), e gnanc par tōr a nuléǵ na limousine.
A n sèrt punt la Magdalena la capìs 'd aspìtar un putèṅ ma la n 'l à mai fat dabòṅ, sōl na vòlta l'è stada c'n al sò amìg Herman (J.R. Cruz) sénsa però mét'r-al dèntar ma 'l risć a gh'è sèmpar quànd i s fànan dal purcarìi. Sò pàdar, ch'l è 'n ciśarōl sfegatâ, al n gh la cava minga a mandàr śò al ròsp e la ragasōla la và a star acsè da 'n sò sîṅ, Tomas Alvarez (Chalo González), e da 'n sò cuśèṅ, Carlos (Jesse Garcia), fradèl dl’Eileen e casâ via 'd cà anc lò. In cla manéra chè la pōl cuntinuàr a véd'r Herman ma pò sò màdar (Teresa Michelle Ruiz) la 'l manda a star via da di parènt parchè la n in vōl savēr dla Magdalena.
I vśèṅ e pruprietàri dla cà 'd Alvarez i èṅ Gary (David W. Ross) e James (Jason L. Wood), na còpia 'd gay. Sénsa dir gnint a 'l sò muróś, Gary al s pòrta a lèt Carlos ch'l éra stâ mandâ via da i suo pròpria parchè 'l éra fnòć a sò vòlta. Chi lò al s fà càr'g ad dar ajùt, anc ecunòmig, a sò cuśìna e al gh śibìs ad far da pàd'r a 'l sò putèṅ quànd al nas'rà. Quànd James al vèṅ a savēr di còran ch'l à patî, al s incàsa 'd brut e al decìd ad dar dl'ària a gl’Alvarez mandànd na létra in dua 'l gh dà i trénta dè par catàr 'n àtar pòst in du star. Catàr n'atra cà lè l'è dimóndi dûra, i prèsi i èṅ dimóndi élt, pò a mōr anc Tomas. Tut a s giùsta quànd la Magdalena la fà la paś c'n i suo ma sōl quànd al ginecòlug al garantìs ch'l'è incóra vìrgin. Carlos al la spóśa e a pōl tacàr la Quinceañera di sò sógn.