Mimic 2
|
C'l artìcul chè 'l è scrit in
Miranduléś |
 Mimic 2
| ||
 Brian Leckner in na figùra dal film | ||
| Imitadōr 2 2001 | ||
|---|---|---|
| Regìa: Jean de Segonzac | ||
| Scritōr: Donald A. Wollheim • Joel Soisson | ||
| Atōr: Alix Koromzay • Jon Polito • Will Estes Paul Schulze • Edward Albert • Bruno Campos Jim O'Heir • Brian Leckner • Gaven E. Lucas Michael Tucci • Alex Draper • Joseph Hodge | ||
| Müsica: Walter Werzowa | ||
| Léngua: Ingléś | ||
| Dürä dal film: 82 minüt | ||
| Nasiōṅ: Stat Unî | ||
Mimic 2 (Imitadōr 2) 'l è 'n film ad scarésa fantàstic dal 2001 ad Jean de Segonzac ch'al tōś ispirasiòṅ da 'n racònt cic ad Donald A. Wollheim e da la pelìcula Mimic dal 1997 dal regìsta Guillermo del Toro. Al gh'à abû 'n séguit dū an dòp: Mimic 3: Sentinel.
Sunt
L'entumòluga e insgnànta 'd New York Remi Panos (Alix Koromzay) l'è dimóndi dasfurtunàda in amōr esénd ch'la n gh la cava briśa a catàr 'l óm giùst. Dòp avēr dascargâ Jason Mundy (Brian Leckner), ch'al s éra parmìs 'd purtàr-'g un mas ad fiōr ad nòt, adès l'à tacâ a 'ndàr fóra c'n un ragàs ciamâ Phillip (Paul Schulze). A séna la dascór sèmp'r ad scaravàś e lò 'l cuntìnua a scultàr-la sprand pò in dal “dòp-séna” che però al n riva minga parchè lē la và a cà subìt quànd lò al taca a tgnir-la par maṅ. Lasâ lè cuma 'n salàm, subìt dòp a riva 'n móstar ch'al gh mòla tri cōlp par pò traśàr-al via sèg.
Chi lò al n è minga la prima vitma dal móstar, na criatùra a fórma 'd insèt nada da 'n esperimènt 'd inśgnerìa genética, anc dutōr Lincoln Trahm (Bill Cho Lee) 'l è stâ cupâ soquànt tèmp prima. Esénd chi lò 'n culéga dla Remi, al detective Klaski (Bruno Campos) al decìd ad far dal dmandi a l'entumòluga, pò i sàltan fóra i cadàvar sénsa ghigna ad Jason e 'd Phillip dònca la puśisiòṅ dla Panos la s cómplica dimóndi anc parchè lì lē la n andàva briśa tant 'd acòrd cun Trahm. Al detective Clecknal (Jody Wood) 'l è sicûr ch'la dóna la sia na lèśbica serial killer ch'la masa i óm par pò cavàr-ag via i grugn.
Sōl in séguit a s capìs ch'i masamènt i èṅ stâ fat da 'l móstar ch'al vōl anc acupiàr-as cun la Remi. Méntar la dóna l'armàgn parśunēra in dla sò scōla insém a Klaski e a sò dū studènt, al cap dl'unità dal fòrsi speciàli, Darksuit (Edward Albert), al decìd ad diśinfestàr 'l edifìsi druànd un gas velenóś.