Mariangela Melato

C'l artìcul chè 'l è scrit in Miranduléś Emiliàn

La Mariangela Melato tòlta śò a teàtar

La Mariangela Melato (Milàn, 19 ad Setémbar dal 1941, Róma, 11 ad Śnar dal 2013), l'è stada n'atōra itagliàna, lavurànd anc in teàtar e par la televiśiòṅ.

In dla sò caréra l'à vins quàtar Dàvid ad Dunatèl, sinc Nàstar 'd Argìnt e di àtar prèmi incóra. Al Presidènt dla Repùblica al l'à numìnada Cumendadōr d'l Órdan a 'l Mèrit al 28 ad Maǵ dal 2003.

Biugrafìa

La Mariangela Melato da śóvna la stùdia pitùra a l’Acadèmia ad Bréra par pò tacàr a lauràr a teàtar, ch'la n gh'iva gnanc vint an, in dla cumpagnìa ad Fantasio Piccoli. In séguit la lavóra anc cun Dario Fo e Luchino Visconti.

In dal 1970 la fà al sò debùt a 'l cìnema cun un film ad Pupi Avati, Thomas e gli indemoniati (Thomas e gl'indemuniâ) e la in girà dimóndi àtar, specialmènt in di an Stanta cuma Basta guardarla (Basta véd'r-la) ad Luciano Salce, Lo chiameremo Andrea (A 'l ciamarém Andrea) ad Luciano Salce, Film d'amore e d'anarchia, ovvero stamattina alle 10 in via dei Fiori nella nota casa di tolleranza (Film 'd amōr e 'd anarchìa, in atri paròli stamatìna a déś óri in via di Fiōr in dal burdèl cgnusû bèṅ) e Travolti da un insolito destino nell'azzurro mare d'agosto (Mis sóta da 'n destîṅ minga cumùṅ in dal mâr aśùr 'd Agóst) ad Lina Wertmüller, Sterminate "Gruppo Zero" (Sterminâ al "Grup Śèr") ad Claude Chabrol, Di che segno sei? (Ad che ségn sē't?) ad Sergio Corbucci, Casotto (Caśòt) ad Sergio Citti e Dimenticare Venezia (Daśmingàr Venèsia) ad Franco Brusati.

I an Utànta i s vèran cun al Flash Gordon ad Mike Hodges, pasànd pò p'r Il petomane (Al scurśòṅ) ad Pasquale Festa Campanile e, in dal 1999, par Panni sporchi (Pagn muśnènt) ad Mario Monicelli. Al sò ùltim film 'l è Vieni via con me (Vîṅ via mèg) ad Carlo Ventura dal 2005.

Malàda da tèmp ad càncar a 'l pàncreas, la mōr a 71 an in 'n uśdàl rumàṅ.

Culegamènt estéran