Casotto
|
C'l artìcul chè 'l è scrit in
Miranduléś |
 Casotto
| ||
 Michele Placido e la Foster in na figùra dal film | ||
| Caśòt 1977 | ||
|---|---|---|
| Regìa: Sergio Citti | ||
| Scritōr: Vincenzo Cerami • Sergio Citti | ||
| Atōr: Jodie Foster • Gigi Proietti • Michele Placido Catherine Deneuve • Franco Citti • Ninetto Davoli Mariangela Melato • Paolo Stoppa • Ugo Tognazzi Flora Carabella • Anna Melato • Massimo Bonetti | ||
| Müsica: Gianni Mazza | ||
| Léngua: Itagliàṅ | ||
| Dürä dal film: 106 minüt | ||
| Nasiōṅ: Itàglia | ||
Casotto (Caśòt) l'è na cumèdia dal 1977 ad Sergio Citti.
L'è stada preśentàda a 'l 67śum Fèstival ad Venèsia in dla raségna dla vècia cumèdia itagliàna ciamàda "La situazione comica (1910-1988)".
Sunt
Un guardòṅ (Ninetto Davoli) al gira par la spiàgia 'd Òstia in na Dméndga 'd Agóst e pò c'n un tràp'n a maṅ al fà dū buś in dal mur dal caśòt nùmar daśnóṿ par tgnir 'd òć la gint ch'la gh và dèntar par cavàr-as śò. Al prim a druàr-al 'l è 'n alenadōr (Gianni Rizzo) dna squàdra ad basket ad dóni ma 'l à śbaliâ pòst parchè 'l suo 'l è 'l vint. A dir-'g-al 'l è Carlo (Carlo Croccolo) ch'l al vōl paràr via parchè al vōl armàgnar da par lò in dal caśòt cun la Ketty (Cathy Marchand) par far 'l amōr sèg par la prima vòlta ma al n gh la cava mia parchè in dal caśòt a gh'è 'n caśèṅ ad c'l àtar mónd da tuta la gint ch'la gh pasa.
A gh'è 'n prēt ingléś cun dū cas (McKenzie Bailey) e dū benśinàr rumàṅ, Nando (Franco Citti) e Gigi (Gigi Proietti), ch'i vōlan divertìr-as cun dū ragàsi cgnusùdi da pôc, la Iole (Clara Algranti) e la Gloria (Julie Sebestyen), ch'invéci i n vōlan minga dar-'g-li ma sōl far-as pagàr al pranś da qualchidòṅ. Pò i rìvan dū suldâ tuscàṅ (Gino Barzacchi e Massimo Bonetti) cun sèg un cagnulèṅ biànc minga tant gustóś ch'i pénsan sōl a i sò mùscui e a far-i védar e dū surèli milanéśi, la Giulia (Mariangela Melato) e la Bice (Anna Melato), ch'i vōlan mét'r-as 'd acòrd in na manéra basta ch'a sia, anc dand-la via, cun 'l asicuradōr Alfredo Cerquetti (Ugo Tognazzi) par ciapàr più bèsi par la mòrt dal marè dla prima.
Pò a gh'è la Teresina Fedeli (Jodie Foster), na ragasōla sénsa muróś ch'la spéta 'n putèṅ da tri méś ma ch'la n pōl minga aburtìr p'r un prubléma mèdag e alóra i sò nunòṅ (Paolo Stoppa e la Flora Carabella), cun sèg 'n àt'r anvōd pìcul (Marco Marsili), i próan a catàr 'n óm ch'al la pòs spuśàr par paràr via 'l scàndal. I aṅ pinsâ a 'n cuśèṅ abruséś ad muntàggna dla Teresina, Vincenzino (Michele Placido), ma chi lò 'l è tròp imbambî par capìr i quèi a 'l vōl, invéci che gusàr-'s-la al pénsa sōl a métar-'s al salvagìnt p'r andàr a nudàr e 'l custùm a l'arvèrsa (fra 'l àtar lasànd da spés dasquaciâ un maròṅ).
Méntar la Iole e la Gloria i s cumpàgnan c'n i culturìsta parchè i védan che chi àtar dū i n gh'aṅ minga bèsi, a sucéd che Gigi al s fà mâł a la tèsta ciapànd incòst a na barca e pò al s insùnia na bèla dóna (Catherine Deneuve) in dal méntar ch'al próa a durmìr cuntànd al pégri. Al nunòṅ al decìd ad far-ag cgnósar la Teresina par cambiàr galét parchè Vincenzino 'l è tròp minciòṅ p'r i sò gust e s'l armàgn a spétar che lò al faga quèl, scampa cavàl che l'èrba la crés.
Quànd a taca a piōvar fòrt, tut chi persunàǵ lè i càtan ripàr in dal caśòt, i s vistìs'n e i tórnan a cà.