Les biches - Le cerbiatte
|
C'l artìcul chè 'l è scrit in
Miranduléś |
 Les biches
| ||
| Les biches - Le cerbiatte | ||
 L'Audran e la Sassard in na figùra dal film | ||
| Al serviàti 1968 | ||
|---|---|---|
| Regìa: Claude Chabrol | ||
| Scritōr: Paul Gégauff • Claude Chabrol | ||
| Atōr: Jean-Louis Trintignant • Jacqueline Sassard Stéphane Audran • Nane Germon • Serge Bento Henri Attal • Henri Frances • Dominique Zardi | ||
| Müsica: Pierre Jansen | ||
| Léngua: Francéś | ||
| Dürä dal film: 100 minüt | ||
| Nasiōṅ: Frància • Itàglia | ||
Les biches - Le cerbiatte (literalmènt “Al serviàti” ma tacànd artìcul e sustantìṿ a salta fóra “Lèśbichi”) 'l è 'n film dramàtic francéś e itagliàṅ dal 1968 ad Claude Chabrol.
La Stéphane Audran par cal lavōr chè l'à purtâ a cà 'l Órs 'd Argìnt a 'l 18śum Fèstival ad Berlîṅ.
Sunt
La Frédérique (Stéphane Audran) l'è na dóna pîna 'd bèsi ch'la gh'à 'n cantēr navàl a Saint Tropez ma la viṿ da par lē. Un dè, faghénd dū pas in sal pònt ad gl'arti a Parì, la cgnós na śōvna ch'la tira avànti faghénd di diségn ad sèrvi in di marciapē. Chi lē, ch'la diś ad ciamàr-as Why (Jacqueline Sassard), la fà cólp dimóndi e la Frédérique la gh śibìs 'd andàr sèg par soquànt dè in dla vila ch'la gh'à a 'l mâr. La ragàsa la ciàpa 'l vōl l'ucaśiòṅ e 'l dū i tàcan na relasiòṅ, cun la Frédérique ch'la s inśégna par cumpàr di vistî cumpàgn di suo a la sò amànta.
Rivàdi là, la padròna 'd cà la gh preśènta Robèque (Henri Attal) e Riais (Dominique Zardi), dū bufòṅ dimóndi strâṅ ch'i vìv'n a 'l spali dla Frédérique cumpurtànd-as cuma dū artìsta 'd avanguàrdia. Un dè la Why la cgnós 'n amìg architét dla sò amànta, Paul Thomas (Jean-Louis Trintignant), e la s inamóra ad lò, andànd-'g anc a lèt. La Frédérique la n la tōś minga tant bèṅ e la próa a purtàr-'g-al via par pò finìr ch'la taca a vlér-ag bèṅ dabòṅ a sò vòlta.
A 'l inìsi i tri i vìv'n insém sénsa prubléma ma pò la Why la vîṅ misa da na banda. Quànd chi dū là i decìd'n ad partìr par Parì, la Why la fà sù 'l valìś e la i và a catàr parchè la n pōl minga mandàr śò al fat 'd armàgnar da par lē. Ma la Frédérique la la para via.