Le inibizioni del dottor Gaudenzi, vedovo, col complesso della buonanima
|
C'l artìcul chè 'l è scrit in
Miranduléś |
 Le inibizioni del dottor Gaudenzi,vedovo, col complesso della buonanima | ||
 Carlo Giuffrè e la Marisa Bartoli in na figùra dal film | ||
| Gl'inibisiòṅ dal dutōr Gaudenzi, véduv, c'n al cumplès dla bonànma 1971 | ||
|---|---|---|
| Regìa: Giovanni Grimaldi | ||
| Scritōr: Giovanni Grimaldi | ||
| Atōr: Carlo Giuffrè • Katia Kristina • Saro Urzì Françoise Prévost • Marisa Bartoli • Carletto Sposito Francesca Benedetti • Paolo Carlini • Enrico Marciani Carla Romanelli • Renato Malavasi • Ilaria Guerrini | ||
| Müsica: Nico Fidenco | ||
| Léngua: Itagliàṅ | ||
| Dürä dal film: 105 minüt | ||
| Nasiōṅ: Itàglia | ||
Le inibizioni del dottor Gaudenzi, vedovo, col complesso della buonanima (Gl'inibisiòṅ dal dutōr Gaudenzi, véduv, c'n al cumplès dla bonànma) l'è na cumèdia dal 1971 ad Giovanni Grimaldi ch'al l'à anc scrita. La culòna sunóra l'è ad Nico Fidenco.
A 'l èstar 'l è cgnusû c'n i tìtui ad “Ao Diabo com a Fidelidade” in Braśìl, “Viudo... pero a la italiana!” in Spaggna, “Les obsessions sexuelles d'un veuf” in Frància e “Tentações de um Viúvo” in Purtugàl.
Sunt
Francesco Gaudenzi (Carlo Giuffrè) 'l è 'n sicigliàṅ femnàr ch'l à spuśâ p'r interès la Luisa (Marisa Fabbri), fiōla 'd un senadōr ad Róma pîṅ ad bèsi. Quànd chi lē l'è drē a murìr ad leucemìa, in punt ad mòrt, la gh fà prumétar ch'la sarà l'ultma dóna dla sò vita. Lò al giùra sénsa pinsàr-ag tròp, pò al vénd incòsa e al và a star a Catàgna par tgnir adrē na n'aśiénda ch'la vénd al lat di sò alevamènt ad vachi. Al sò ciòld fis però 'l è qvél ad cur'r adrē a 'l stanèli ad cal dóni ma tut al vòlti ch'l al fà o al gh'à di pinsēr purcùs a gh sucéd quèl ad brut tant ch'al s parsuàd che sò mujér la gh'àppia tirâ na maledisiòṅ. Esénd anc un cristiàṅ e 'n demucristiàṅ a gh vèṅ anc al cumplès dla bonànma e di inibisiòṅ cun cl'àtar sès parchè adès al gh'à sèmpar paùra. Al prufesōr Viscardi (Paolo Carlini) al gh ślunga dal madśìni par calmàr-al e a gh fà dir ad cuntìnuv ch'al malòć a n è minga 'n quèl véra. In cla manéra chè al pénsa ch'al pòsa armét'r-as dal tut.
Quànd al sò culaburadōr Serpieri (Carletto Sposito) al gh fà catàr na segretària nóva 'd Milàṅ, na śōvna ciamàda Lidia ch'la và in gir tuta scalvìda e ch'a s véd tut al còsi, lò al và in criśi parchè al fà fadìga a 'rmàgnar tranquìl e a guardàr da n'atra banda quànd la s piga par tōr śò gl'apûnt.
Durànt na fèsta al cgnós soquànt di sò culaburadōr cuma 'l cumendadōr sicigliàṅ andâ a vìv'r a Padva Salvatore Uzzeda (Saro Urzì) ch'al gh vénd di tap e di turàć. Ma Francesco al fà piutòst a mènt a sò mujér, la Laura (Françoise Prévost), e a sò fiōla, la Paola (Katia Kristina) e pò anc a la Clara Donatelli (Ilaria Guerrini), a la sgnōra Niscemi (Marisa Bartoli), a la Virginia, mujér d'l inśgnēr Fracassini, e a la mujér ad Serpieri in parsòna (Francesca Benedetti).
Al dutōr Gaudenzi al buta 'l òć specialmènt su la più pìcula dal grup, la Paola, e i sò genitōr i èṅ anc cuntènt. Però p'r al fat che lò al tóga dal madśìni e anc di urmòṅ par far-ag pasàr al cumplès ad sò mujér mòrta e par śmursàr al fōg ch'al gh'à in dal mudàndi, la Laura la taca a pinsàr ch'al pòsa anc èsar 'n invertî anc par via ad soquànt malintéś. Par capìr cum i stàn'n i fat, 'd acòrd c'n al sò amìghi ch'i gh'aṅ da far àtar tant e p'r al bèṅ ad sò fiōla, la decìd ad pruàr-ag sèg par védar s'l è 'n óm dabòṅ. A n gh'è gnint da far, Francesco al n céd briśa tant che lē la diś a sò marè ch'al n à mai sparâ 'n cōlp e gnanc alvâ 'l sćiòp. Salvatore al 'l invìda acsè a séna lò par védar s'l è ad cl'atra spónda. Quànd però la Paola la gh diś ch'al sò prēt, ch'l è anc 'n geśuìta e teòlug, al gh'à dit ch'al vōt p'r i véduv al n vâl briśa s'i decìd'n ad spuśàr-as, Gaudenzi al la pòrta a lèt subìt e al gh dà dènt'r acsè fòrt che tut qvéi dal cundumìni i crédan ch'a gh sia 'l taramòt.