Labbra di lurido blu
|
C'l artìcul chè 'l è scrit in
Miranduléś |
 Labbra di lurido blu
| ||
 La Lisa Gastoni e Corrado Pani in na figùra dal film | ||
| Làbar 'd un blù malnét 1975 | ||
|---|---|---|
| Regìa: Giulio Petroni | ||
| Scritōr: Franco Bottari • Giulio Petroni | ||
| Atōr: Lisa Gastoni • Corrado Pani • Jeremy Kemp Pino Caruso • Hélène Chanel • Silvano Tranquilli | ||
| Müsica: Ennio Morricone | ||
| Léngua: Itagliàṅ | ||
| Dürä dal film: 120 minüt | ||
| Nasiōṅ: Itàglia | ||
Labbra di lurido blu (Làbar 'd un blù malnét) 'l è 'n drama eròtic dal 1975 ad Giulio Petroni ch'al 'l à anc prudót e scrit insém a Franco Bottari.
Sunt
L’Ely (Lisa Gastoni) e Marco Alessi (Corrado Pani) i èṅ spuśâ da 'n an. Chi lò al fà 'l prufesōr a l'università e al gh'à 'n amìg ingléś ch'al fà 'l antiquàri, George Stevens (Jeremy Kemp). Insém i aṅ cumprâ un sit ad tèra in dua i vànan par casàr i nàdar. Un dè lò al vèra na létra in dua a gh'è 'n bijét cun scrit insìma: «Spetàbil prufesōr, cun critèri a t ém tgnû infurmâ su tut' al rujàdi dla tò cara sgnōra. S'ta n t sē minga arvultâ a vōl dir ch'at sē armàś qvél ch'at sēr». Anc sò mujér la ricév un mesàǵ: «'L è turnâ da Lóndra 'l amōr véra ad tò marè. 'N amìg». Marco al diś a Róma a George ch'al n al vōl più védar pò al tórna a Perùśa da sò mujér ch'la 'l aspèta in stasiòṅ ma la sà incòsa.
Durànt na fèsta in paéś l’Ely, ch'l'è na ninfòmana ad prim órdan, la s fà gusàr p'r un vèć e pò la s litga cun sò marè ch'al gh dà dla putàna e lē dal fnòć. Quànd i s èṅ spuśâ, i 'l aṅ fat par tgnir-as sù 'l un cun l'atra, ma adès i gróp i rìv'n a 'l pètan. Lē l'è armàśa sgnada da pìcula vdénd qvél ch'la fava cla malnéta ad sò màdar (Hélène Chanel), lò da 'n pàdar padròṅ ch'al vliva ch'al dvintìs óm in présia cun na putàna budlòna in un fnil.
Par catàr un pôc ad paś, la dóna la decìd 'd andàr a tōr al sigaréti in un bar ch'l è drē saràr. Quànd l'è là la pèrd la tèsta vdénd tri óm vilàṅ śugàr a brìscula, òṅ al s arbàsa anc la sfésa par schèrs, mo pénsa tè, a n s pōl mai savēr. Insém a 'l barìsta, lì lōr i s la ciùlan ch'l è un piaśēr. George al s fà viṿ incóra par dmandàr a 'l sò èx amànt ad mulàr-la ma lò 'l al para via. In cal méntar la śōvna camaréra dla cà, la Nora (Margareta Veroni), la céd a la cōrt dal cuntadèṅ Alberto (Gino Santercole). Cla nòt lè lē la s cavarà śò par lò in dla sò cambra da lèt e pò la lasarà vèrti 'l fnèstri par far-al vgnir dèntar. A insfilsàr-as dèntar invéci 'l è 'n pugnitàri śbavóś che però l’Ely la n s al fà minga scapàr via. Quànd Alberto al riva a gh in vèṅ na gamba, cun lò ch'al siga «rója!» a la sò padròna in dal méntar ch'al gh tira 'n sćiafòṅ. Da cl'atra banda la Laura (Daniela Halbritter), na sò amìga da quànd i éran pìcui, la và nuda in dal cambra ad Marco dgénd ch'la 'l vōl jutàr ma, quànd la gh salta adòs, lò invéci ad dar-'g al cas al gh dà 'n casòt.
L’Ely la và a vudàr al sac, cuntànd tut ad lē, cun 'n óm ch'l à cgnusû soquànt tèmp prima, David Levi (Silvano Tranquilli), òṅ ch'l à pasâ soquànti stmani in parśòṅ. Sèg a pâr ch'la dóna l'àppia catâ 'l amōr e minga 'l sès "spurcaciòṅ" ma lò al vōl èsar lìbar, sénsa ligàm, e al gh diś che dmaṅ al partirà.