La stagione della strega
|
C'l artìcul chè 'l è scrit in
Miranduléś |
 Hungry Wives
| ||
| La stagione della strega | ||
 La Jan White in na figùra dal film | ||
| La stagiòṅ dla stria 1972 | ||
|---|---|---|
| Regìa: George A. Romero | ||
| Scritōr: George A. Romero | ||
| Atōr: Jan White • Raymond Laine • Ann Muffly Joedda McClain • Bill Thunhurst • Neil Fisher Esther Lapidus • Dan Mallinger • Ken Peters | ||
| Müsica: Steve Gorn | ||
| Léngua: Ingléś | ||
| Dürä dal film: 104 minüt | ||
| Nasiōṅ: Stat Unî | ||
La stagione della strega (La stagiòṅ dla stria) 'l è 'n film ad scarésa dal 1972 ad George A. Romero. A i sò tèmp, quànd 'l è vgnû fóra, 'l è stâ 'n fiàsc clamuróś e i prudutōr i 'l aṅ distribuî cun quàtar nóm difarènt: Jack's Wife, Hungry Wives, Season of Witch e Witches.
In Itâglia 'l à vdû la luś sōl in di an Nuànta, in dal marcâ dal caséti vìddeo.
Sunt
La Joan Mitchell (Jan White) l'è la mujér timda 'd 'n óm 'd afâr, Jack (Bill Thunhurst). I viv'n in na cà granda in di dintór'n ad Pittsburgh cun na fiōla ad daśnóṿ an, la Nikki (Joedda McClain). Sénsa che ninsòṅ a sàppia gnint, gnanc al sò amìghi, la Joan, ch'l'è drē a 'vśinàr-as a i quarànt'an, la n è minga cuntènta dla sò vita da raśdóra. La n in pōl piò ad lavàr śò, stiràr al camìśi, far al sufrìt, dar śò a la pólvra e far al còmpri. Da 'l cant suo Jack al ténd sōl a 'l sò lavōr e al la lasa a cà da par lē par dal stmani.
Durànt na fèsta insém a dal sò amìghi, chi lē la vèṅ a savér che na dóna ch'l'à spatinâ lè in dal quartēr da pôc, la Marion Hamilton (Virginia Greenwald), la tîṅ a drē a la striarìa. Al grup al n pōl crédar ch'a gh sia na bórda in di paràǵ. La Joan e la sò amìga Shirley (Ann Muffly) i la vàn'n a catàr par védar se qvél ch'a s diś ad lē l'è la véra. La Marion l'è anc a cap 'd un grup segrét ad dóni ch'i èṅ dal strìi dabòṅ.
Turnàda a cà, la Joan la gh cata Gregg (Raymond Laine), un prufesōr śóvan dla Nikki, ch'al dascór e al fuma dl'èrba cun sò fiōla. Chi lò al próa a far al galét sèg ma la Joan la n gh dà mia a mènt e la 'l manda via arliàda. Al mìstar al và invéci a ciulàr-as sò fiōla. In di dè a vgnir, la Nikki, ch'la s éra incasàda cun sò màdar ch'l'iva sabû incòsa, la scapa via ad cà e la Joan la i tōś da sò marè parchè la n éra minga stada bòna ad far quèl par tgnir-la a 'l sò pòst.
La Joan la decìd acsè ad cumpràr un lìbar ch'al dascór 'd insteriarìa, da 'l tìtul “Cuma dvintàr na stria”. Dòp soquànt tintatìṿ p'r impratichìr-as, la dóna la fà na fatùra par far-as piaśér Gregg e la gh la cava. I dū i dvént'n amànt ma prèst la Joan la taca anc a 'vér di arbgàt a la nòt, cun 'n óm cun na mascra ad Sàtana adòs ch'al gh cur adrē.