La pelle che abito
|
C'l artìcul chè 'l è scrit in
Miranduléś |
 La piel que habito
| ||
| La pelle che abito | ||
 L'Elena Anaya e Banderas in na figùra dal film | ||
| La pèl ch'a gh stag 2011 | ||
|---|---|---|
| Regìa: Pedro Almodóvar | ||
| Scritōr: Pedro Almodóvar Thierry Jonquet • Agustín Almodóvar | ||
| Atōr: Antonio Banderas • Elena Anaya • Buika Marisa Paredes • Roberto Álamo • Chema Ruiz Eduard Fernández • Ana Mena • Blanca Suárez Susi Sánchez • Bárbara Lennie • Fernando Cayo José Luis Gómez • Teresa Manresa • Jan Cornet | ||
| Müsica: Alberto Iglesias | ||
| Léngua: Spagnōl | ||
| Dürä dal film: 120 minüt | ||
| Nasiōṅ: Spaggna • Stat Unî | ||
La pelle che abito (La pèl ch'a gh stag) 'l è 'n film dramàtic dal 2011 ad Pedro Almodóvar trat da 'l rumànś „Taràntla“ ad Thierry Jonquet. A vint-i-òṅ an da Légami!, al regìsta manciàṅ al tórna a lauràr cun Antonio Banderas.
La pelìcula, vinsidōra 'd quàtar Prèmi Goya, l'è custàda trédas migliòṅ e mèś ad dòlar faghénd-an pò sù da piò ad trénta.
Sunt
A Tulēd, al cirùśig e risercadōr Robert Ledgard (Antonio Banderas) al lavóra su la sperimentasiòṅ dna pèl transgénica p'r i cristiàṅ, dimóndi fòrta, fata parténd da qvéla di nimài. Al mèdag al la próa adòs a na dóna ciamàda Vera (Elena Anaya) che lò al tîṅ parśunéra in dla sò cà, tgnuda 'd òć vint-quàt'r óri su vint-quàtar da dal tele-caméri fisi in dla sò cambra.
Un dè in dla strutùra, durànt la fèsta 'd carnevàł, a riva 'n rapinadōr psicupàtig vistî da tigra, Zeca (Roberto Álamo), ch'al vōl dascórar cun sò màdar Marilia (Marisa Paredes) ch'la fà da dóna di fat p'r al dutōr. Quànd chi lē la gh vèra, lò al la liga a na scrana, pò 'l s fà dir in du la tîṅ la ciàṿ dla cambra dla Vera che lò 'l véd in di monitor e ch'la gh pâr la Gal, èx mujēr 'd Robert. Zeca in dal pasâ al gh'iva abû na stòria sèg prima che lē la faśìs 'n incidènt ch'al gh'iva ruinâ la vita bruśànd-ag tut al còrp. Zeca al viulénta la śōvna ma pò al finìs masâ da 'l cirùśig turnâ a cà in dal méntar ch'al gusàva. Dòp avēr-al saplî, Robert al decìd ad lasàr libra la Vera dòp avēr-ag fat prumét'r ad tacàr na stòria insém.
Siē an prima la Gal la s éra tòlta la vita parchè la n psiva briśa cumpatìr-as la sò cundisiòṅ ad daśgrasiàda. A séguit ad cal fat lè sò fiōla Norma (Blanca Suárez), abùda da Robert, l'iva tacâ a 'vēr na fubìa par la gint. Na sira a na fèsta 'd matrimòni chi lē l'iva cgnusû Vicente (Jan Cornet), un ragàs che sóta 'l efèt d'l ecstasy 'l iva pruâ a ciavàr-la in dal bòsc. Cal tintatìṿ ad viulénsa lè, mis insém a i sò prubléma 'd prima, al l'iva fata dvintàr mata, finénd pò par far in manéra ch'la s tulìs la vita a sò vòlta cumpàgn a sò màdar. Par vindicàr-la, Robert 'l iva rapî 'l ragàs, tgnénd-'l in cadéni in cà sua, e pò al gh'iva fat dgl'uperasiòṅ una 'd drē a cl'atra, tacànd c'n al tiràr-ag via 'l cas par far-ag na figa a 'l sò pòst.