La paura mangia l'anima
|
C'l artìcul chè 'l è scrit in
Miranduléś |
 Angst essen Seele auf
| ||
| La paura mangia l'anima | ||
 La Mira, la Valentin e ben Salem in na figùra dal film | ||
| La paùra la magna l'anma 1974 | ||
|---|---|---|
| Regìa: Rainer Werner Fassbinder | ||
| Scritōr: Rainer Werner Fassbinder | ||
| Atōr: Brigitte Mira • El Hedi ben Salem • Kurt Raab Barbara Valentin • Irm Hermann • Ingrid Caven Rainer Werner Fassbinder • Gusti Kreissl Lilo Pempeit • Hark Bohm • Elma Karlowa | ||
| Müsica: Peer Raben | ||
| Léngua: Tedésc • Àrab | ||
| Dürä dal film: 93 minüt | ||
| Nasiōṅ: Germàgna | ||
La paura mangia l'anima (La paùra la magna l'anma) 'l è 'n film dramàtic tedésc dal 1974 ad Rainer Werner Fassbinder ch'al 'l à anc scrit e prudót. In Itàglia 'l è cgnusû anc c'n al tìtul ad “Tutti gli altri si chiamano Alì” (Tut chi àt'r i s ciàm'n Alì).
La pelìcula l'è stada preśentàda fóra cuncōrs a 'l 27śum Fèstival ad Cannes.
Sunt
L’Emmi (Brigitte Mira) l'è na dóna védva ad ssant'an a 'l incìrca ch'la tira avànti faghénd al pulisìi in dal cà e in dal sò cundumìni. Un dè, méntar la tórna a cà, a taca a piōvar e lē la cata ripàr in un bar in dua, fra i cliènt, a gh'è 'n śōvan maruchèṅ imigrâ par lavōr, Alì (El Hedi ben Salem), ch'a pâr avér-ag vint an manc. Na dóna (Katharina Herberg), dagnóra par śōg, la gh dìś 'd invidàr la vècia a balàr e lò 'l al fà pò al gh śibìs anc ad cumpagnàr-la a cà. Quànd i èṅ là la dóna la gh dmanda ad muntàr sù e 'd armàgn'r a durmìr sèg. Alì 'l è 'd acòrd. Fra i dū a nas 'l amōr.
L’Emmi la cònta incòsa a sò fiōla Krista (Irm Hermann) e a sò śéndar Eugen (Rainer Werner Fassbinder) ma chi lōr i n la ciàpan minga su 'l sèri e i rìd'n ad gust. Ma lē la fà dabòṅ e la 'l spóśa. 'L óm al và a star in cà sua. 'L è lè ch'i tàc'n i guàj. Al drughēr Angermayer (Walter Sedlmayr) al i para via dgénd ch'al n vōl piò chi vàg'n in dal sò negòsi, al sò culéghi e qvéi dal cundumìni e i gh tìran na cróś insìma (i dìśan ch'al palàs 'l è dvintâ muśnènt) mént'r i sò tri fiōi i n la vōlan piò védar. Òṅ al diś ch'l'è dvintàda mata, la fiōla fémna invéci la gh dà dla rója nimàla malnéta e la diś ch'al sò apartamènt l'è dvintâ 'n ciûś. L’Emmi e Alì i partìsan par na vacànsa sprand ch'i quèi i pòsan cambiàr in dal méntar. E in na quàlc manéra a sucéd pròpria acsè. Òṅ di sò fiōi al s davśìna incóra a sò màd'r anc parchè al n sà mia in du lasàr al sò putèṅ mént'r al sò culéghi, ch'i gh'aṅ da purtàr avànti na càuśa sindacàla, i tōr'n incóra a dascórar sèg. Un dè i vàn'n a cà sua e quànd i véd'n Alì in majéta i dìśan s'l è pulî e che bèi mùscui ch'al gh'à. Quànd l’Emmi la li cùcia a tastàr-'g al bras, cuma s'al fus un śavàj da śibìr, lò al s ufénd e al và via. 'L àrab al taca pò na relasiòṅ cun la barìsta Barbara (Barbara Valentin), na biónda ch'la sumìlia dimóndi a l'Ela Weber.
L’Emmi la n s mét mia 'l cōr in paś e la và a pascàr al sò Alì da di sò culéga 'd lavōr ma chi lōr i gh rìd'n adrē par via di sò an. Na sira però la 'l cata incóra in dal bar in du la 'l à cgnusû e la dmanda 'd métar sù la canta ch'i ìvan balâ cla sira là. Alì al gh cònta ch'al gh'à mis i còran ma ch'al vōl bèṅ sōl a lē e ch'al gh vōl turnàr insém. L’Emmi la 'l pardòna.