L'ultimo inganno
|
C'l artìcul chè 'l è scrit in
Miranduléś |
 Deadfall
| ||
| L'ultimo inganno | ||
 Nicolas Cage in na figùra dal film | ||
| 'L ùlt'm ingàn 1993 | ||
|---|---|---|
| Regìa: Christopher Coppola | ||
| Scritōr: Christopher Coppola • Nick Vallelonga | ||
| Atōr: Michael Biehn • Sarah Trigger • Ron Taylor Nicolas Cage • James Coburn • Charlie Sheen Talia Shire • Michael Constantine • Peter Fonda | ||
| Müsica: Jim Fox | ||
| Léngua: Ingléś | ||
| Dürä dal film: 98 minüt | ||
| Nasiōṅ: Stat Unî | ||
L'ultimo inganno (’L ùlt'm ingàn) 'l è 'n film śal dramàtic americàṅ dal 1993 ad Christopher Coppola.
Custâ déś migliòṅ ad dòlar, al film al 'n à fat pò sù daśdòt-mila a 'l incìrca.
Sunt
Joe Donan (Michael Biehn) 'l è 'n śōvan delinquènt ch'al lavóra insém a sò pàdar Mike (James Coburn) in soquànt tràfic muśnènt, cuma di gir ad dròga, ma specialmènt p'r infnuciàr chi àtar cun dal traplàdi strulgàdi bèṅ par fargàr-ag di bèsi. Durànt òṅ ad chi cōlp lè Joe al spara sénsa vlēr a sò pàdar cardénd che la pistòla la fus “a salve”. Àrdùt dimóndi mâł, Mike al fà sōl in tèmp a dir-ag ch'a gh sarév 'n afâr bèl grôs da far da sò fradèl Lou (James Coburn) ch'al stà a Santa Monica. I dū i èṅ daśgustâ da 'n muć ad tèmp da quànd Mike al gh'à purtâ via la sò dóna che pò 'l è dvintàda la màd'r ad Joe.
Dòp al funeràł, urganiśâ da i óm ad Mike, Joe al riva in Califòrgna in du al cgnós sò sîṅ, ch'al pâr cumpàgn a sò pàdar, la sò dóna Blanche (Gigi Rice), dimóndi più śōvna e minga tant un chilo, e 'l sò culaburadōr Eddie (Nicolas Cage), na canàja ch'l al juta in di sò lavursèṅ cóntar la léǵ. C'n al tèmp Joe al próa a guadagnàr-as la fidùcia 'd Lou, par pò fargàr-al méj in d'l afâr ch'al gh'iva cuntâ sò pàdar, ma in cal mént'r al taca anc a 'ndàr a lèt cun la dóna ad c'l insiminî 'd Eddie, la Diane (Sarah Trigger). Quànd chi lò al naśa i còran, cardénd anc che Joe al vója dvintàr al bras dèst'r ad Lou fargànd-'g al pòst, al próa a masàr-al ma Joe 'l è śvélt a ficàr la sò tèsta in d'l òli bujènt par frìś'r al patàchi friti e acsè 'l al cópa.
A cal punt lè, armàś sénsa 'l sò óm ad fidùcia, Lou al śibìs a sò anvōd ad jutàr-'l in un cōlp ch'al gh'à in mènt ad far, véndar par finta na partìda 'd diamànt ch'i scòtan e tgnir-'s i bèsi listés.