L'esorcista
|
C'l artìcul chè 'l è scrit in
Miranduléś |
 The Exorcist
| ||
| L'Esorcista | ||
 La Linda Blair in na figùra dal film | ||
| 'L Eśurcìsta 1973 | ||
|---|---|---|
| Regìa: William Friedkin | ||
| Scritōr: William Peter Blatty | ||
| Atōr: Ellen Burstyn • Linda Blair • Max von Sydow Jason Miller • Lee J. Cobb • Jack MacGowran Kitty Winn • Peter Masterson • Robert Symonds William O'Malley • Barton Heyman • Arthur Storch | ||
| Müsica: Mike Oldfield • Jack Nitzsche | ||
| Léngua: Ingléś • Grèc • Latìn Francéś • Tedésc • Àrab | ||
| Dürä dal film: 132 minüt | ||
| Nasiōṅ: Stat Unî | ||
L'Esorcista (’L Eśurcìsta) 'l è 'n film ad scarésa dal 1973 ad William Friedkin trat da 'n rumànś ad William Peter Blatty ch'al firma anc la senegiadùra. Par via dal sò sucès cumerciàl (custâ 12 migliòṅ ad dòlar, al 'n à fat sù 441), al gh'à abû dū séguit (L'esorcista II - L'eretico dal 1977 e L'esorcista III dal 1990), un prequel (L'esorcista - La genesi dal 2004) e na riedisiòṅ dal 2000 ślungàda 'd ùndas minùt. 'L à vins dū Prèmi Òscar.
In dal 2010 'l è stâ mis in dla lista di film ch'i fànan part dal National Film Registry dla Bibliutéca dal Cungrès di Stat Unî.
Sunt
In un sit archeulògic dla sità ad Ninive in d'l Iràq dal Nòrd, durànt di scâv, a salta fóra na statṿa piculìna dal demòni Pazuzu. Un prevòstar ch'a gh'è là, al vèć e malâ ad cōr pàdar Lankaster Merrin (Max von Sydow), al gh rèsta mâl.
Da cl'atra part dal mónd, a Georgetown in di Stat Unî, l'atōra Chris MacNeil (Ellen Burstyn) la próa arliàda a telefunàr a Róma a sò marè separâ parchè al n s éra minga far sintìr in dal dè dal cumpléan ad sò fiōla, la Regan (Linda Blair). La nòt dòp chi lē la sènt al sò lèt cunàr da par lò e la taca a sigàr. 'L è 'l inìsi 'd un cambiamènt in dal sò cumpurtamènt parchè la taca a dvintàr arvèrsa e a śmadunàr e a dir dal purcarìi cuntinuamènt. Durànt na fèsta p'r avér finî al sò ùltim film, cun òspit Pàdar Dyer (William O'Malley) e al regìsta Burke Dennings (Jack MacGowran), tut 'd un trat a salta fóra in dal salòṅ la Regan ch'l'ingùra a chi lò la mòrt méntar l'è drē a pisàr-'s adòs. I dutōr i gh faṅ dal puntùri ad calmànt ma i n capìsan minga cuśa la gh'àppia.
Na sira la Chris, turnànd a cà, la n cata ninsòṅ e alóra la s arlìa cun la sò segretària Sharon (Kitty Winn) parchè la gh'iva da tgnir-'g a drē. Chi lē la s difénd dgénd ch'l'éra 'd acòrd cun Burke ch'al gh pinsìs lò. Ma chi lò al vèṅ catâ mòrt lè fóra, cun 'l òs dal còl scavśâ, quànd in cà a gh'éra sōl la fiōla. A n saénd piò cuśa far, e tgnénd a drē a 'n cunsìli dal dutōr Samuel Klein (Barton Heymen), la Chris la dmanda ajùt a 'l prevòstar di Geśuît Damien Karras (Jason Miller), 'n óm cun di sèns ad cólpa p'r avér lasâ tròp da spés da par lē sò màdar prima ch'la murìs par tgnir a drē a Geśù Crist e par cal mutìṿ lè 'l è drē a pèrdar la fēd. A vîṅ ciamâ p'r un eśurcìśum pàdar Merrin.