L'Uomo che verrà

 Miranduléś

 Bulgnaiṡ

C'l artìcul chè 'l è scrit in Miranduléś

«

Inusénsa devastàda da la guèra, gint misa insém da la spransa.»

(Tagline dal film)

L'uomo che verrà (L óm ch'al vgnarà) 'l è 'n film dal 2009 ad Giorgio Diritti gnû fóra in dal sali itagliàni al 22 ad Śnar dal 2010. 'L è stâ girâ in Dialètt bulgnais, cun di pès in itagliàṅ e in tedésc.

Ambintâ in dal 1944, al film al cònta gl'avenimènt ch'i èṅ gnû prima dal masèl ad Marzabòt, vist cun i òć dna putìna 'd òt an. 'L è stâ girâ a Radicondoli in pruvìnsa ad Siena e in Pruvénzia ed Bulåggna, cun un budget ad 3 migliòṅ 'd euro e 'l apòǵ ad Rai Cinema e dal Ministēr di bèṅ culturài.

L'uomo che verrà 'l è stâ preśentâ al Festival dal film ad Róma in dal 2009 in du 'l à vins al prèmi Marc'Aurelio 'd òr dal pùblic e anc al prèmi dla giurìa. 'L à anc vins tri David di Donatello e tri Nàstar 'd argènt.

In dla cupertìna dal disiunàri di film dal 2011 di Morandini, ch'i gh'an dat 4 stéli, a gh'è in sima na foto dal film.

Sunt

Na préda p'r arcurdàr al vitmi dal stermìni 'd Marzabòt

In d'l invèran dal 1943 in s'l apenèṅ emigliàṅ, la pìcula Martina (Greta Zuccheri Montanari), 'd òt an, la viṿ cun i genitór e cun la sò famìja numróśa, ch'la fà fadìga a tiràr avànti.

Da quànd al sò fradlèṅ più pìcul 'l è mòrt, Martina l'à śmis ad dascórar e i sò amig i la tóśan in gir, ma al sò duciàdi dal mónd ch'a gh'è lè 'd intóran i èṅ dimóndi prufóndi. Purtròp la guèra la riva anc in dal sò muntàgni quaciàdi dla néṿ, i rìvan i tedésc, sèmpar più invadènt, e anc di grup ad partigiàṅ.

Lena (Maya Sansa), la màdar dla putìna, la rèsta incóra préggna e Martina la tèṅ 'd òć i nóṿ méś dla gestasiòṅ. In cal mèntar al vicéndi dla guèra i ś mìsćian sèmpar da piò cun quéli dla vita ad tut i dè: al bucâ, i sést fat in dla stala, i caplét fat in cà p'r al dóni cun tant ad tulér e canèla, la pcarìa dal ninèṅ, i amór di śóvan e la prima cumugnòṅ.

Al fradèl ad Martina al nas in cà a la fiṅ ad Setémbar dal 1944, ma quand a nas al dè, i naśìsta i rìvan in cal campàgni lè faghénd di rastrelamènt e i màsan sensa cór 560 parsòni, principalmènt di vèć, dal dóni e di putèṅ dòp ch'i i aṅ muciâ sù in di simitèri, in dal cèśi e in di caśulàr, par quél ch'l è pasâ a la stòria cuma al stermìni dal Mònt Sōl.

Martina, ch'la gh l'iva fata a scapàr via, la vèṅ catàda li stés e saràda dèntar a na ciślìna insém a di àtri parsòni. Dòp avér sarâ i us, i tedésc i gh fìcan dèntar dal bómbi e i faṅ na carnificìna. La putìna, p'r un mìracul, la n s fà gnint e la tórna a cà ma la cata sól sò fradlèṅ e al cambri vódi. Dòp avér catâ sù la sésta cun al putèṅ dèntar e avér-ag cantâ la nana, la cata incóra la paròla.

Fra la véra e la finsiòṅ

Anc s'in di tìtui dal film a s diś ch'i persunàǵ e i fat i èṅ frut ad fantaśìa, al regìsta e al scritór i aṅ sercâ ad métar insém verità e finsiòṅ, cuma méj i psìvan. Difàti, soquànt di prutagunìsta dla pelìcula i èṅ visû dabòṅ:

• Don Giovanni Fornasini 'l éra un śōvan prevòstar antifasìsta.
• Don Ubaldo Marchioni 'l è stâ masâ in s'l altâr dla céśa ad Casaglia. La pìsside ch'al tgniva in maṅ in cal mumènt la gh'à incóra un buś e un bòsul dèntar e l'è tgnuda da cat anc incō in dla céśa.
• Al partigiàṅ Lupo (Lóv), dla brigàda Stella Rossa.
• L'è véra la stòria ad dla dóna sòpa masàda in céśa parchè la n éra minga bòna 'd andàr fóra subìt cuma i gh'ìvan urdnâ i suldâ.
• 'L è vér al fat ch'utantaquàtar parsòni i èṅ stadi fati fóra cun al midrajadór in dal simitèri ad Casaglia e che un grup ad na stantìna ad dóni, vèć e putèṅ i èṅ stâ masacrâ a 'l intèran dna céśa dòp ch'i tedésc i gh'aṅ butâ adòs dal bómbi.

Culegamènt estéran

• (IT) Al sit ufisiàl dal film
• (IT) La schéda dal film in s'l IMDb
• (IT) La schéda dal film in sal FilmTV
• (IT) La schéda dal film in sal sit dla Cunferénsa Episcupàla
• (FR) Na lunga recensiòṅ dal film

St artéccol qué l é scrétt in bulgnaiṡ

«

Inuzänza devastè da la guèra, żänt mitó insàmm da la speranza.»

(Tagline dal féllm)

L'uomo che verrà (L'òmen ch'al vgnarà) al è un féllm dal 2009 ed Giorgio Diritti vgnó fòra int äl sèli itagliàni al 22 ed żnèr dal 2010. Al é stè girè in dialàtt bulgnaiṡ, cun di pèz in itagliàn e in tudàssc.

Ambintè int al 1944, al film al cånnta i avenimént ch'i éṅ vgnó prémma dal starméṅni ed Månt Såul, vésst con i ûc' 'd na céṅna 'd òt ân. L é stè girè a Radicondoli in pruvénzia ad Siena e in pruvénzia ed Bulåggna, cn un budget ad 3 miglión 'd èuro e al apòg' ad Rai Cinema e dal Ministêri di bén culturèl.

L'uomo che verrà l é stè preṡentè al Festival dal film ad Råmma int al 2009 in duv al vinzé al prèmi Marc'Aurelio 'd òr dal póbblic e anc al prèmi dla giurî. Al à anc vént trî David di Donatello e trî Nàsster 'd arżänt.

Int la cupertéṅna dal diziunèri di féllm dal 2011 ed Morandini, ch'i j'an dè 4 strèl, ai é in vatta na fòto dal féllm.

Sónnt

Na prêda pr arcurdèr äl véttmi dal starméṅni ed Månt Såul

Int l invêren dal 1943 'd in só 'l apenén emigliàn, la fangéṅna Martina (Greta Zuccheri Montanari), 'd òt ân, la vîṿ cun i genitûr e cun la sô granda famajja, ch'la fà fadîga a trèr in lóng.

Da quand al sô fradlén pió pizinén l é môrt, Martina l'à dṡmitó ed dscårrer e i sô amîg i la tôlen in gîr, mo äl sô ucè dal månnd ch'ai é lé 'd intûren i én dimónndi prufóndi. Purtròp la guèra la rîva anc int äl sô muntàgn cuêrti dla naiṿ, i rîven i tudàssc, sänper pió invadént, e anc di grópp ed partigiàn.

Lena (Maya Sansa), la mèder dla céṅna, la rèsta ancåura praggna e Martina la taggn 'd òc' i nôṿ mîṡ dla gestaziån. In cal mäntr äl vizannd dla guèra i s massclen sänper 'd pió cun quî dla vétta ed tótt i dé: al bucâ, i zésst fât int la stâla, i caplàtt fât in cà pr äl dòn, la pcarî däl ninén, i amûr di żûven e la prémma cumugnån.

Al fradèl ed Martina al nâs in cà a la fén ed stänbar dal 1944, mo quand a nâs al dé, i nazéssta i rîven in cal canpâgn lé fagannd di rastrelamént e i mâsan sänza côr 560 parsóṅni, prinzipalmänt di vîc', däl dòn e di cínno dåpp ch'i i én muciè só in di canpsànt, int äl cîṡ e in di caṡulèr, par quall ch'l é pasè a la stòria cme al starméṅni ed Månt Såul.

Martina, ch'la i l'iva fât a filèr vî, la vaggn catè l istass e srè däntr a na ciṡléṅna insàmm a däli ètri parsóṅni. Dåpp 'd avair srè i óss, i tudàssc i i fécchen däntr däl båmmb e i fân na carnifizéṅna. La céṅna, pr un mirâcuel, la n s fà gnìnta e la tåurna a cà mo la câta såul sô fradlén e äl cämri vûdi. Dåpp avair catè só al zasst cun al cínno däntr e avair-el cantè la nâna, la câta 'd nôv la parôla.