Jennifer's Body
|
C'l artìcul chè 'l è scrit in
Miranduléś |
 Jennifer's Body
| ||
 La Fox, Pratt e la Seyfried in na figùra dal film | ||
| Al còrp dla Jennifer 2009 | ||
|---|---|---|
| Regìa: Karyn Kusama | ||
| Scritōr: Diablo Cody | ||
| Atōr: Megan Fox • Amanda Seyfried • Chris Pratt Johnny Simmons • Adam Brody • J. K. Simmons Amy Sedaris • Juan Riedinger • Kyle Gallner | ||
| Müsica: Theodore Shapiro | ||
| Léngua: Ingléś | ||
| Dürä dal film: 97 minüt | ||
| Nasiōṅ: Stat Unî | ||
Jennifer's Body (Al còrp dla Jennifer) 'l è 'n film ad scarésa dal 2009 dla Karyn Kusama ch'l à tòlt al tìtul da na canta dal grup di Hole ch'in dal film i daṅ anc al braṅ Violet.
Al film 'l à fat sù da piò ad trént'òṅ migliòṅ ad dòlar in tut a frònt 'd un cóst ad sédas.
Sunt
La Jennifer Check (Megan Fox) l'è na pèpa ad c'l àtar mónd, na ragasōla che tut i studènt dla scóla i vrévan far-as e a dir-la tuta dimóndi ad lōr i gh l'aṅ anc cavàda parchè quàla lè l'è na purcùsa ch'la t magna viṿ s'ta gh finìs sóta, una ch'la gh dà dèntar da 'l tant ch'l'è rója. La sò amìga dal cōr, da quànd i éran pìculi, l'è la Needy Lesnicky (Amanda Seyfried), una minga tant bèla, specialmènt quànd i vànan fóra insém e i masć i fàn'n al cunfrònt. Chi lē però la gh'à almànc al murōs fis, Chip Dove (Johnny Simmons), ch'al n véd l'óra ad gusàr-'s-la.
Na sira al dū ragasōli i vàn'n a 'n cuncèrt dal grup indipendènt di Low Shoulder ch'i sònan in un bar dal pòst. La Jennifer la pèrd la tèsta p'r al cantànt Nikolai Cochenko (Adam Brody) e la decìd 'd andàr sèg e a i sò amìg quànd al spetàcul al finìs parchè al lucàl 'l iva ciapâ fōg. Chi lōr, cardénd-la vìrgin, i la pòrt'n in dal bòsc par masàr-la p'r un sacrifìsi a Sàtana sprand acsè 'd avér sucès in cambi. Ma p'r al fat che chi lē invéci l'è na malnéta ad prim órdan ch'la s 'n è fata un muć, a sucéd invéci ch'al demòni al tōś al sò cuntròl lasànd-l' in vita. Par vìvar e p'r armàgnar bèla la Jennifer la gh'à adès da magnàr da spés dla carna di ragàs.