Indagine su un cittadino al di sopra di ogni sospetto
|
C'l artìcul chè 'l è scrit in
Miranduléś |
 Indagine su un cittadinoal di sopra di ogni sospetto | ||
 Volonté e la Bolkan in na figùra dal film | ||
| Indàśin su 'n sitadèṅ ad sōv'r ad tut i suspèt 1970 | ||
|---|---|---|
| Regìa: Elio Petri | ||
| Scritōr: Elio Petri • Ugo Pirro | ||
| Atōr: Gian Maria Volonté • Florinda Bolkan Vittorio Duse • Gianni Santuccio • Salvo Randone Orazio Orlando • Arturo Dominici • Sergio Tramonti | ||
| Müsica: Ennio Morricone | ||
| Léngua: Itagliàṅ | ||
| Dürä dal film: 112 minüt | ||
| Nasiōṅ: Itàglia | ||
Indagine su un cittadino al di sopra di ogni sospetto (Indàśin su 'n sitadèṅ ad sōv'r ad tut i suspèt) 'l è 'n film dramàtic dal 1970 'd Elio Petri, vinsidōr dal Gran Prèmi Speciàł dla Giurìa a 'l 23śum Fèstival ad Cannes e dal Prèmi Òscar p'r al film furastēr.
In dal 1970 in Itàglia 'l à fat sù dagnóra dū migliàrd ad franc.
Sunt
„Al dutōr“ (Gian Maria Volonté) al gh'à cal scutmàj lè parchè 'l è a cap dla sesiòṅ dla pulisìa 'd Róma ch'la tîṅ adrē a i caś 'd umisìdi e tut qvéi ch'i lavóran sóta 'd lò, cuma 'l brigadér Biglia (Orazio Orlando), Mangani (Arturo Dominici) e Panunzio (Aldo Rendine), i gh pòrtan rispèt. Al dè ch'al dvènta cmandànt d'l ufìsi pulìtig dla questùra, lì lò al taja la góla a la sò amànta, l’Augusta Terzi (Florinda Bolkan), na dóna bèla, visióśa e spìrit lìbar ch'l'è la mujér 'd 'n architét fnòć (Massimo Foschi). Dòp avér-la cupàda, 'l óm al s fà na dócia e pò al stramna dapartùt al prói ch'l è stâ lò, al lasa par tèra dal sò pidàdi mój dal sangṿ dla vitma, al tóca incòsa e 'l mét un fił dla sò cruàta celèsta in n'ùngia dla maṅ dal cadàvar. Esénd lò 'n óm ad putēr e sōv'r ad tut i suspèt al la fà sèmpar franca, ninsòṅ a pōl gnanc pinsàr ch'a pòsa èsar stâ lò, a gh mancarév àtar.
A l’Augusta, quànd la stava sèg, a gh piaśìva sintìr i sò caś ad dóni cupàdi e lē la vliva far finta 'd èsar la vitma ma pò la n tgniva minga la léngua a 'l sò pòst, la 'l tratàva mâł e la gh dava dal putèṅ, anc a lèt, minga cuma c'l àt'r amànt ch'la gh'iva, 'l anàrchig ad Ravéna dal piàṅ ad sōvar Antonio Pace (Sergio Tramonti). Umiliâ da na dóna e da 'n rivulusiunàri cuma Pace, al dutōr, fasìsta 'd dèntar cum 'l éra, 'l iva decìś ad dar-'g un taj.