Il sentiero del pino solitario
|
C'l artìcul chè 'l è scrit in
Miranduléś |
 The Trail of the Lonesome Pine
| ||
| Il sentiero del pino solitario | ||
 La Sylvia Sidney in na figùra dal film | ||
| Al sintēr dal pèṅ sulitàri 1936 | ||
|---|---|---|
| Regìa: Henry Hathaway | ||
| Scritōr: Grover Jones • John Fox Jr. Harvey F. Thew • Horace McCoy | ||
| Atōr: Sylvia Sidney • Henry Fonda • Fred Stone Fred MacMurray • Nigel Bruce • Beulah Bondi George McFarland • Robert Barrat • Fuzzy Knight | ||
| Müsica: Gerard Carbonara • Hugo Friedhofer | ||
| Léngua: Ingléś | ||
| Dürä dal film: 102 minüt | ||
| Nasiōṅ: Stat Unî | ||
Il sentiero del pino solitario (Al sintēr dal pèṅ sulitàri) 'l è 'n film dramàtic americàṅ dal 1936 'd Henry Hathaway, candidâ a 'n Prèmi Òscar par la canta A Melody from the Sky.
A s trata dal secónd lungumetràg girâ a culōr in Technicolor, dagnóra tut in dal sud dla Califòrgna. Al film in alóra 'l à frutâ un migliòṅ e sèt ad dòlar a frònt 'd un cóst ad siesènt-vintmìla dòlar a 'l incìrca.
Sunt
In di mònt Apalàć dla regiòṅ ad Coalfield in Kentucky da sèmp'r al famìji di Tolliver e di Falin i s cumbàt'n a cōlp ad sćiòp esénd che fra i muntanàr biólc i cònt i s giùstan acsè e minga tgnénd adrē a la léǵ, cum a sà anc al sierìf dal pòst (Samuel S. Hinds). Di mòrt a gh 'n è stâ bèla soquànt da tuti e dū 'l bandi. Durànt 'l ùltim scóntar, Dave Tolliver (Henry Fonda) 'l è armàś frî a 'n bras ad òpra ad Wade Falin (Henry Brandon) ch'al gh'iva sparâ.
Un dè a riva in cal pòst lè 'l inśgnēr Jack Hale (Fred MacMurray) che, insém a 'l magiōr Thurber (Nigel Bruce) e par cònt dla sò suciètà, al gh'à da far-ag rivàr la feruvìa e anc far un sit par tiràr fóra 'l carbòṅ. Jack al śibìs sinc-mila dòlar a Judd (Fred Stone), al cap-famìja di Tolliver, par cumpràr dla sò tèra e qvéla dal sò anvōd Dave ch'al viṿ sèg e cun sò mujēr, la Melissa (Beulah Bondi), parchè al gh'à da spuśàr-as cun sò fiōla, dònca sò cuśìna, la June (Sylvia Sidney). Chi lē la salta sù parchè l'è stufa 'd vìv'r in dla miśèria e la vōl véndar ma Dave al gh siga adrē dgénd ch'al gh'arév da piciàr-la anc se pò al mét la firma su 'l cuntràt insém a Judd, dū ségn a dir dabòṅ parchè i n sànan minga scrìvar. Jack al cata 'l acòrd anc cun Buck Falin (Robert Barrat).
C'n al pasàr dal tèmp la June la sa śluntàna sèmpar da piò da 'l sò muróś parchè la s inamóra dal furastēr ch'al gh'à dla cultùra, anc al sò fradlèṅ pìcul, dit Pucci (George McFarland), al gh và adrē e al s mét in tèsta 'd imparàr a lèś'r e a scrìvar. La June la lasa la sò famìja p'r andàr a studiàr da di parènt ad Jack a Louisville. In cal méntar chi lò al s mét in mèś a la fàida fra Dave e Wade e i Falin i giùran ch'i gh la faràṅ pagàr. Dòp avēr dâ fōg a 'l caślìni dal cantēr, i Falin i métan na bómba sóta a 'l pònt sénsa savēr che lè insìma a gh'è Pucci su la scavadōra. Quànd al pònt al salta p'r ària, al baghét al gh mōr in mèś.
La June, turnàda da i suo, la s arlìa cun Jack ch'invéci 'd vendicàr sò fradèl, ch'l iva dit ch'al gh vliva bèṅ, 'l éra andâ a denunsiàr al fat a 'l sierìf. La dóna la dmanda a Dave ad far giustìsia da par lò, a la manéra di Tolliver.