I segreti di Filadelfia
|
C'l artìcul chè 'l è scrit in
Miranduléś |
 The Young Philadelphians
| ||
| I segreti di Filadelfia | ||
 Paul Newman e l'Alexis Smith in na figùra dal film | ||
| I segrét ad Filadèlfia 1959 | ||
|---|---|---|
| Regìa: Vincent Sherman | ||
| Scritōr: James Gunn • Richard Powell | ||
| Atōr: Paul Newman • Barbara Rush • Brian Keith Alexis Smith • Diane Brewster • Robert Vaughn Billie Burke • John Williams • Adam West | ||
| Müsica: Ernest Gold | ||
| Léngua: Ingléś | ||
| Dürä dal film: 136 minüt | ||
| Nasiōṅ: Stat Unî | ||
I segreti di Filadelfia (I segrét ad Filadèlfia) 'l è 'n film dramàtic americàṅ dal 1959 ad Vincent Sherman, candidâ a tri Prèmi Òscar, trat da 'l rumànś bestseller del 1956 L'uomo di Filadelfia ad Richard Powell, scritōr nâ dabòṅ a Filadèlfia.
Sunt
La Kate Judson (Diane Brewster), spuśàda cun William Judson Lawrence III (Adam West) sōl par far-as na puśisiòṅ a 'l intéran dla Filadèlfia ch'a cònta, la vîṅ a savēr da sò marè durànt la prima nòt ad matrimòni che lò al n è minga bòṅ ad gusàr-la e ch'al l'à tòlta cuma mujēr sōl par cuntintàr sò màdar Dewitt (Isobel Elsom) ch'la vliva a tut i cóst di anvōd da lò. La dóna la scapa via andànd a sfugàr-as da 'n sò vèć muróś ch'al fà 'l uperàj, Mike Flanagan (Brian Keith), armagnénd gravda da lò. Al dè dòp i gh dìśan che William 'l è mòrt in 'n incidènt in màchina e la Kate la decìd ad far nàsar sò fiōl Anthony dit Tony (Paul Newman) faghénd finta ch'al sia un Judson Lawrence par tgnir-as stric cal cugnóm lè impurtànt.
Pasâ i an e dvintâ 'n śuvnòt, Tony al taca a studiàr léǵ a l'università, dvintànd amìg ad Chester Gwynn dit Chet (Robert Vaughn), faghénd in dal stés tèmp anc al muradōr par mantgnìr-as. Un dè al cgnós la Joan (Barbara Rush), na ragàsa visiàda e pîna 'd bèsi fiōla 'd 'n avucàt impurtànt dla Pennsylvania, Gilbert Dickinson (John Williams). I dū śōv'n i s inamōran e i decìd'n ad spuśàr-as ma Gilbert al vōl che prima lò al tóga la làurea e ch'al s faga i òs in dal sò studi legàł. Sinténd che Tony 'l à decìś ad cuntintàr sò pàd'r invéci che lē, la Joan la 'l mòla ligànd-'s a 'l sò vèć muróś migliardàri Carter Henry (Anthony Eisley).
Tony al gh armàgn dimóndi mâł e c'l epiśòdi lè 'l al séggna par sèmpar faghénd-al dvintàr più cìnig. Quànd al sènt da 'n sò cumpàgn dal cōrs ad studi, Louis Donetti (Paul Picerni), che 'l avucàt John Marshall Wharton (Otto Kruger) al pésca 'n asistènt par scrìvar na relasiòṅ, al decìd ad fargàr-'g al pòst, pò al fà inamuràr 'd lò sò mujēr Carol (Alexis Smith), più granda 'd Tony ma dimóndi più śōvna dal sò spóś.