I delitti del gatto nero
|
C'l artìcul chè 'l è scrit in
Miranduléś |
 Tales from the Darkside:The Movie | ||
| I delitti del gatto nero | ||
 Al gat négar prutagunìsta in na figùra dal film | ||
| I masamènt dal gat négar 1990 | ||
|---|---|---|
| Regìa: John Harrison | ||
| Scritōr: Stephen King • Michael McDowell George A. Romero • Arthur Conan Doyle | ||
| Atōr: David Johansen • Matthew Lawrence Debbie Harry • Steve Buscemi • Michael Deak Christian Slater • James Remar • David Forrester Julianne Moore • William Hickey • Mark Margolis Robert Sedgwick • Dolores Sutton • Robert Klein | ||
| Müsica: John Harrison • Donald Rubinstein Chaz Jankel • Jim Manzie • Pat Regan | ||
| Léngua: Ingléś | ||
| Dürä dal film: 93 minüt | ||
| Nasiōṅ: Stat Unî | ||
I delitti del gatto nero (I masamènt dal gat négar) 'l è 'n film ad scarésa fat a epiśòdi dal 1990 ad John Harrison.
'L à fat sù da piò ad sédas migliòṅ ad dòlar in di sōi Stat Unî esénd-an custâ tri e mèś a 'l incìrca.
Sunt
La stria Betty (Deborah Harry) la tórna a cà, dòp ès'r andàda a far dal còmpri, par magnàr-as Timmy (Matthew Lawrence), un putèṅ mis in cadéni in dla sò cuśina. Chi lò, par far in manéra ad śluntanàr da lò l'óra dla mòrt, al gh cònta dal stòri ad scarésa, lèti da 'n lìbar ch'al gh'à sèg, ciamâ “Tales from the Darkside”, par far pasàr al tèmp e spràr acsè ad far-la franca.
In dal prim epiśòdi (Lot 249) Bellingham (Steve Buscemi), un studènt universitàri, al fà turnàr incóra in vita na mùmmia par vindicàr-as ad dū di sò culéga, la Susan (Julianne Moore) e Lee (Robert Sedgwick) ch'i gh'ìvan fat un tòrt. Al móstar al pòrta a cumpimènt i pinsēr catìṿ dal sò padròṅ tirànd fóra al sarvèl p'r al naś ad Lee e scurtlànd a la schina la pòvra Susan. Sò fradèl Andy (Christian Slater) al vèṅ però a savér incòsa e par Bellingham al ròbi i ś métan mâl.
In dal secónd epiśòdi (Cat From Hell), Drogan (William Hickey), un vèć pîṅ ad bèsi ardùt a vìvar in sna scrana a rudèli, al mét sóta paga, par sènt-mila dòlar, Halston (David Johansen) par masàr un gat négar ch'al viṿ lè 'd intóran. Cla bistiàsa lè, al diś al ricàstar, 'l arév bèla masâ tri dla cà, sò surèla Amanda (Dolores Sutton), faghénd-la strabucàr śò da 'l scali, la sò amìga Carolyn (Alice Drummond), rubànd-'g al fiâ, e al magiurdòṁ dla famìja Richard Gage (Mark Margolis), faghénd-ag far 'n incidènt in màchina. Tut i masamènt i èṅ sucès a meśanòt e Drogan al créd che la bèstia, purtàda a cà pròpria da sò surèla, 'l al vója punìr parchè la śò aśiénda 'l à masâ sinc-mila gat par far gnir fóra un fàrmag nóṿ. Halston al ś mét acsè 'd inśégn par cupàr-al ma a n è briśa un quèl fàcil. 'L è pròpria al gat négar invéci a vindicàr-as e 'l al fà insfilsànd-as ad dèntar dla sò bóca, fin in fónd a 'l magòṅ. Quànd pò al péndul al sòna la meśanòt, la bistiàsa la vèṅ fóra da 'l grugn 'd Halston p'r andàr incónt'r a 'l vèć ch'al n pōl far àtar che carpàr par la paùra, cun al sò cōr ch'al gh mòla.
In dal tèrs epiśòdi (Lover's Vow), un pitōr piutòst vilî dla vita ch'al s ciàma Preston (James Remar) al véd un masamènt fat da 'n móstar ch'al par un gargoyle. Qvést chè al gh diś ch'l al lasarà in vita se lò al n cuntarà mai a ninsòṅ quél ch'l à vdû. Dòp avér dâ la sò paròla, Preston al cgnós na dóna dimóndi bèla ad nóm Carola (Rae Dawn Chong) e al la spóśa, avénd anc sèg dū fiōi. Dèś an dòp, a n psénd piò tgnir dènt'r al sò segrét, 'l óm al cònta a sò mujér quél ch'l éra sucès in alóra. A cal punt lè, Carola la càmbia pèl dvintànd incóra al gargoyle dna vòlta e l'è custréta a cupàr-al.