Hostel
|
C'l artìcul chè 'l è scrit in
Miranduléś |
 Hostel
| ||
 Jay Hernandez in na figùra dal film | ||
| Ustèl 2005 | ||
|---|---|---|
| Regìa: Eli Roth | ||
| Scritōr: Eli Roth | ||
| Atōr: Jay Hernandez • Eyþór Guðjónsson Derek Richardson • Jan Vlasák • Jennifer Lim Jana Kaderabkova • Barbara Nedeljáková Petr Janis • Keiko Seiko • Takashi Miike | ||
| Müsica: Nathan Barr | ||
| Léngua: Ingléś • Cèc • Ulandéś • Giapunéś Śluvàc • Rus • Iślandéś • Spagnōl • Tedésc | ||
| Dürä dal film: 94 minüt | ||
| Nasiōṅ: Stat Unî • Repùblica Céca | ||
Hostel (Ustèl) 'l è 'n film ad scarésa dal 2005 scrit e dirèt p'r Eli Roth ch'al 'l à anc prudót insém a Quentin Tarantino. Al gh'à abû dū séguit: Hostel 2 dal 2007 e Hostel 3 dal 2011.
La pelìcula l'à fat sù utànta-dū migliòṅ ad dòlar dòp ès'r-an custàda sōl quàt'r e òt. In dal film a s sènt al braṅ Treti Galaxie dal cèc Michal David, cover ad Stella Stai 'd Umberto Tozzi.
Sunt
Paxton (Jay Hernandez) e Josh (Derek Richardson) i èṅ dū śuvnòt americàṅ in vacànsa in Ulànda insém a 'n ragàs iślandéś cgnusû in viàś, Oli (Eyþór Guðjónsson). Durànt na nòt ad sès e dròga in dal quartēr a luś rósi 'd Amsterdam, i sèntan da òṅ ciamâ Alexei (Lubomír Bukový) ch'in Śluvàchia a gh'è 'n ustèl darènt a Bratiślàva pîṅ 'd ragàsi bèli fighi d'l èst ch'i la dànan via sénsa prubléma. I tri i decìd'n ad partìr subìt p'r andàr-'s a divertìr invéci 'd andàr a Barcelóna cuma da prugràma.
Rivâ in cal pòst là, i tri śōvan i tōśan na cambra in d'l ustèl ch'i gh'aṅ da spartìr cun dū bunàsi, la Natalya (Barbara Nedeljáková) e la Svetlana (Jana Kaderabkova). Al dè dòp, quànd i dū americàṅ i s déśdan dòp avēr gusâ tuta nòt sèg, i n càtan piò Oli ch'l éra andâ via par ciavàr una ciamàda Vala (Jana Havlickova). Qvéi dla reception i gh dìśan ch'l è partî mo invéci qualchidòṅ al 'l à cupâ tajànd-ag la tèsta.
Josh e Paxton i vàn'n in discutéca c'n al dū ragàsi e i vìnan drugâ. I dū śōvan i s déśdan ligâ in na fàbrica bandunàda in du a gh'è di óm pîṅ 'd bèsi e sàdig ch'i pàgan par turturàr di ragàs. Paxton al finìs sóta 'l grinfi 'd un mèdag tedésc (Petr Janis) ch'al gh cata gust a sintìr gnulàr in ingléś al sò vitmi.
Pulèmichi a 'l èstar
Al film 'l è stâ dimóndi criticâ in Repùblica Céca mo specialmènt in Śluvàchia in dua di sò funsiunàri e di pulìtig i s èṅ dit daśgustâ par la manéra 'd figuràr al sò paéś cuma sóta-śvilupâ, pòvar e pîṅ 'd prustitusiòṅ, tèri lasàdi andàr e 'd delinquènt, un spèć brut e minga véra ch'l arév psû śluntànàr i turìsta. 'L ufìsi dal turìśum 'l à invidâ Roth a vgnir a véd'r ad parsòna ch'al paéś al n éra minga fat ad fàbrichi e 'd putèṅ ch'i màsan par na guma da biasàr.
Roth al s è diféś dgénd che gl'americàṅ i n sànan gnanc ch'la Śluvàchia la gh sia e che la gint la cuntìnua listés a 'ndàr in Tèxas anc s'a gh'è 'l film Non aprite quella porta.