Ho paura di lui
|
C'l artìcul chè 'l è scrit in
Miranduléś |
 House on Telegraph Hill
| ||
| Ho paura di lui | ||
 La Valentina Cortese in na figùra dal film | ||
| A gh'ò paùra 'd lò 1951 | ||
|---|---|---|
| Regìa: Robert Wise | ||
| Scritōr: Dana Lyon • Elick Moll • Frank Partos | ||
| Atōr: Valentina Cortese • Richard Basehart Fay Baker • William Lundigan • Gordon Gebert Steven Geray • Herbert Butterfield • Mario Siletti | ||
| Müsica: Sol Kaplan | ||
| Léngua: Ingléś • Tedésc | ||
| Dürä dal film: 93 minüt | ||
| Nasiōṅ: Stat Unî | ||
Ho paura di lui (A gh'ò paùra 'd lò) 'l è 'n thriller dramàtic in biànc e négar dal 1951 ad Robert Wise candidâ a 'l Prèmi Òscar d'l an dòp par la diresiòṅ artìstica.
Durànt la lavurasiòṅ dal film i dū prutagunìsta, la milanéśa Valentina Cortese e 'l califurgnàṅ Richard Basehart, i s èṅ inamurâ e pò spuśâ.
Sunt
Durànt la secónda guèra mundiàla la pulàca Viktoria Kowalska (Valentina Cortese) la finìs in un camp ad stermìni naśìsta insém a n'àtra pulàca, la Karin Dernakova (Natasha Lytess). Chi lē, prima 'd èsar ciapàda, l'iva péna fat in tèmp a mandàr al sò putèṅ Christopher (Gordon Gebert) in di Stat Unî da na sò sîna ch'la viṿ su 'l culìni 'd San Francisco a Telegraph Hill.
Quànd a finìs la guèra la Viktoria, ch'l'à pardû incòsa e ch'la n vōl briśa turnàr in Pulògna, la decìd ad far-as pasàr par la Karin, ch'la n è minga scampàda, p'r arfàr-as na vita in Califòrgna dasfrutànd al fat che la sò amìga mòrta la n vdiva sò sîna da quànd l'éra pìcula. Quànd da la Germàgna la dóna la dmanda nutìsi dla sîna e 'd Christopher a gh riva 'n telegràma da 'n studi legàł americàṅ ch'al gh diś che lē l'è mòrta. La Viktoria la partìs listés p'r i Stat Unî e l'è decìśa a cumbàtar p'r avér 'l afidamènt dal putèṅ ch'adès 'l à ereditâ incòsa anc s'al sò patrimòni 'l è in dal maṅ 'd un tutōr, Alan Spender (Richard Basehart), méntar la badànta Margaret (Fay Baker), ch'a s véd ch'la gh'è cóntar e ch'la tîṅ un diàri segrét sarâ a ciàṿ in dla sò cambra, la 'l crés in dla vila 'd Telegraph Hill. A sucéd pò che la Viktoria, faghénd-as pasàr par la Karin, la spóśa pròpria Alan dvintànd acsè na sitadìna americàna cuma l'à sèmpar sugnâ.
Śugànd in giardèṅ cun Christopher, ch'al s liga dimóndi a lē, la dóna la véd un bascòmad da drē da la sēṿ e la fà a mènt ch'òṅ di sò mur in légn 'l è dal tut śbragâ e dònca la 'l vrév giustàr parchè 'l è periculóś, esénd a strapiómp su la culìna, ma la Margaret la fà da tut par cambiàr dascōrs acsè cuma sò marè. Un dè, tulénd la màchina p'r andàr in sità, la Viktoria la fà 'n incidènt parchè i frêṅ i aṅ pardû tut 'l òli e dònca i n funsiònan piò. La dóna la taca a pinsàr che sò marè al la vója far fóra insém a Christopher par psēr métar-'s in bisàca incòsa lò. La Viktoria la dmanda ajùt a 'l magiōr Marc Bennett (William Lundigan), 'n óm inamurâ 'd lē ch'al l'iva cgnusùda durànt la liberasiòṅ in Germàgna.