Halloween Killer
|
C'l artìcul chè 'l è scrit in
Miranduléś |
 Satan's Little Helper
| ||
| Halloween Killer | ||
 Alexander Brickel in na figùra dal film | ||
| Al sasèṅ 'd Halloween 2004 | ||
|---|---|---|
| Regìa: Jeff Lieberman | ||
| Scritōr: Jeff Lieberman | ||
| Atōr: Alexander Brickel • Katheryn Winnick Stephen Graham • Amanda Plummer • Dan Ziskie Wass Stevens • Melisa McGregor • Joshua Annex | ||
| Müsica: David Horowitz | ||
| Léngua: Ingléś | ||
| Dürä dal film: 96 minüt | ||
| Nasiōṅ: Stat Unî | ||
Halloween Killer (Al sasèṅ 'd Halloween) 'l è 'n film ad scarésa dal 2004 scrit e dirèt par Jeff Lieberman.
La pelìcula l'à vins la tèrsa edisiòṅ dal Nightmare Film Fest ad Ravèna, fèstival rumagnōl ligâ a i film horror indipendènt.
Sunt
Douglas Whooly (Alexander Brickel) 'l è 'n putèṅ americàṅ 'd nóṿ an ch'al viṿ insém a sò màdar Merrill (Amanda Plummer). In di ùltim tèmp chi lò 'l à mis sù n'usesiòṅ p'r un śōg vìddeo ciamâ Satan's Little Helper in du 'l gh'à da masàr più gint ch'al pōl par far sù di punt, in di pagn dal jutànt śōvan dal Diàvul. P'r al dè 'd Halloween, in du lò al s è mis adòs un vistî rós da satanèṅ, a tórn' a cà sò surèla Jenna (Katheryn Winnick) insém a 'l sò muróś Alex Martin (Stephen Graham) in manéra 'd psēr festegiàr in famìja.
Dòp ès'r-as litgâ cun la Jenna, Douglas al và a far un gir p'r al paéś e acsè al véd un mat mascrâ da Sàtana (Joshua Annex) ch'al śibìs in dal sò giardèṅ un cadàvar ch'l à péna scurtlâ a la góla. Al baghét, tut cuntènt, al gh'admànda 'd psēr far-ag da jutànt. Quànd 'l óm al gh fà 'd sè cun la ghigna, Douglas al gh śibìs ad masàr Alex ch'al gh astà dimóndi su i maròṅ.
In cal méntar la Jenna, su cunsìli 'd sò màdar, la spiàna 'n custùm da rója méntar la Merrill la s mét in tèsta 'd trucàr-'s invéci da Carmen Miranda. Par far cōlp su 'l fradèl dla sò muróśa, Alex al decìd 'd andàr a tōr un vistî da Sàtana in un negòsi dal sèntar insém a lò, ma l'è sōl na trapla parchè al masćèṅ 'l al pòrta da 'l mat ch'al próa a masàr-'l a fòrsa 'd insturlàdi ch'al gh fà far cónt'r a 'l mur. Cardénd-al mòrt, 'l óm 'l al lasa lè p'r andàr a cupàr di àtar cuma 'n negusiànt (Declan Mulvey), na vècia ch'la finìs impicàda, la sgnōra Sylvia Tishbaum (Joyce R. Korbin), al pàdar 'd Alex, Vernon (Dan Ziskie), e la sò amànta Nicole (Melisa McGregor).