Giovani, belle... probabilmente ricche
|
C'l artìcul chè 'l è scrit in
Miranduléś |
 Giovani, belle...probabilmente ricche | ||
 Gammino e la Russo in na figùra dal film | ||
| Śōvni, bèli... anc richi 'l è fàcil 1982 | ||
|---|---|---|
| Regìa: Michele Massimo Tarantini | ||
| Scritōr: Michele Massimo Tarantini • Tito Carpi | ||
| Atōr: Michele Gammino • Gianfranco D'Angelo Nadia Cassini • Carmen Russo • Franco Diogene Olinka Hardiman • Ugo Fangareggi • Nino Terzo Lucio Montanaro • Gianni Ciardo • Sergio Leonardi Alessandra Canale • Adriana Facchetti | ||
| Müsica: Fabio Frizzi | ||
| Léngua: Itagliàṅ | ||
| Dürä dal film: 88 minüt | ||
| Nasiōṅ: Itàglia | ||
Giovani, belle... probabilmente ricche (Śōvni, bèli... anc richi 'l è fàcil) 'l è 'n film da rìdar dal gènar dla cumèdia malnéta a l'itagliàna dal 1982 ad Michele Massimo Tarantini ch'al l'à anc scrita insém a Tito Carpi. L'è stâ girâ in Ùmbria.
Ólt'r a la Carmen Russo e a la Nadia Cassini, cuma prutagunìsta a gh'è anc l'ex atōra ad film pòran di an Stanta Olinka Hardiman che chè la cumparìs druànd al nóm 'd “Olivia Link”.
A 'l èstar 'l è cgnusû c'n al nóm ad “Setenta y dos horas para pecar” in Spaggna, “Adorables infidèles” in Frància, “Jovens, Belas e Provavelmente Ricas” in Purtugàl e “Die sündige Erbschaft” in Germàgna.
Sunt
La castàgna Anna, la rósa Claudia (Carmen Russo), la biónda Caterina (Olinka Hardiman) e la bruna Rita (Nadia Cassini) i èṅ quàt'r amìghi par la pèl. La prima la n s è mai spuśàda e l'è andàda a star a 'l èstar a Acapûlc méntar chi atri tri i aṅ invéci tòlt marè, la Claudia cun 'l ùmbar Alberto (Sergio Leonardi) ch'al giùsta i televiśōr, la Caterina cun Gabriele (Michele Gammino) ch'al fà 'l dentìsta e la Rita cun 'l insgnànt Filippo (Gianfranco D'Angelo) che par divertìr-as al fà di putòć c'n al cas dûr.
Un dè al nutâr lìgur Baldelli (Franco Diogene) al ciàma al tri amìghi maridàdi par dir-ag che l’Anna l'è mòrta lasànd-'g un migliàrd ad Franc da spartìr-as par testamènt a cundisiòṅ che lōr, in dal gir ad tri dè a 'l màsim, i mèt'n i còran a i sò spóś. Cla malnéta dla Claudia la n s fà minga di prubléma (sò marè sè invéci esénd lò gelóś mat) parchè la 'l fà bèla cun Gabriele. Anc par la Caterina a pâr ch'a n sia mia 'n quèl difìcil parchè la còpia l'è vèrta. A gh'armàgn la Rita che invéci l'è na dóna a mōd ch'la s vargóggna dimóndi sōl a pinsàr ad far un quèl dal gènar anc se sò marè al sarév 'd acòrd par via di bèsi ch'la ciaparév e ch'i farésan còmad. S'al tri dóni però i n gùsan mia cuma cuncurdâ, la furtùna la spetrà a i vèć 'd un ricóvar.
Filippo al s dà da far par catàr 'n óm ch'al pòsa gusàr sò mujér e al ciàma òṅ ch'l iva mis 'n anùnsi in sna rivìsta spurcaciòna, Giovanni Boldrini (Gianni Ciardo), un sunadōr pugléś ad viulunsèl pròpria cuma la Rita. Par réndar-la malnéta pò al mét dal gósi d'l afrodiśìac “Erotin” in dal sò bicér ma invéci l'è la dóna di fat, la lumbàrda puta Giustina (Adriana Facchetti), ch'la 'l bév e acsè la dvènta na purcùsa ad prim órdan saltànd-'g adòs. In cal méntar la Caterina la manda fóra 'd cà sò marè parchè l'à savû da la Claudia che lò al và a lèt sèg, pò la decìd ad far-'s al rapreśentànt ad madśìni Giacomo Rotelli (Lucio Montanaro) dmandànd ad pruàr-ag ch'i guldòṅ nóṿ ch'al vénd i èṅ bòṅ dabòṅ. Purtròp la s daśmendga 'l rulèṅ dla màchina futugràfica e alóra a salta incòsa parchè la gh'à da purtàr al próvi dal tradimènt a 'l nutâr. La gh dà apuntamènt al dè dòp in dal parc. La Claudia la vōl andàr a ciulàr in dal studi dentìstic ad Gabriele ma a s mét in mèś la sò asistènta, la Gianna (Alessandra Canale), parchè la gh'à butâ 'l òć anc lē. Da 'l cant suo la Claudia la gh'à i sò prubléma parchè in dal parc un grup ad rój emigliàni i s arlìan sèg parchè i crédan ch'la sia na putàna ch'la gh vōl purtàr via i cliènt.
A finìs che l'ùnica ch'la mét i còran dabòṅ l'è pròpria la Rita.