Generazione zero
|
C'l artìcul chè 'l è scrit in
Miranduléś |
 Terminal Virus
| ||
| Generazione zero | ||
 «I putèṅ!» la siga la Greenwood in na figùra dal film | ||
| Generasiòṅ śèr 1995 | ||
|---|---|---|
| Regìa: Dan Golden | ||
| Scritōr: Jeff Pulice • Daniella Purcell • Joe Sprosty | ||
| Atōr: Susan Africa • James Brolin • Chris Atkins Bryan Genesse • Hank Cronkite • Nikki Fritz Hank Cronkite • Kehli O'Byrne • Elena Sahagun Chad Frontiere • Bobby Greenwood • Eric Lambert | ||
| Müsica: Tim Wynn | ||
| Léngua: Ingléś | ||
| Dürä dal film: 89 minüt | ||
| Nasiōṅ: Stat Unî | ||
Generazione zero (Generasiòṅ śèr) 'l è 'n film fantàstic americàṅ dal 1995 ad Dan Golden fat par la televiśiòṅ e girâ in dal Filipìni.
Sunt
In dal cōrs dal XXI sécul al gèn'r umàṅ 'l è mis dimóndi mâł par via dal guèri cun di armi atómichi ch'i aṅ tacâ e p'r un brut vìrus murtàł invintâ da i siensiâ ch'al s traśmét c'n al gusàdi, in dal gir ad vint-quàt'r óri i purcùs i marsìsan tut. A sucéd acsè che di cristiàṅ in gir a gh 'n è armàś pôc, custrét a vìvar fra 'l àt'r in dal deśèrt par scampàr a 'l radiasiòṅ, e la lòta adès 'l è di masć cónt'r al fémni. Lawson (Nick Nicholson) al próa a viulentàr na dóna ciamàda Cassandra (Nikki Fritz) ma al vîṅ cupâ da i suo ch'i n vōlan mia andàr in a risć ad bcar-as quèl, stésa ròba anc par la sgnōra ch'la s ricév un cōlp ad pistòla in cô quànd la tórna in dla baś da fémni.
Al mìstar e studióś Samson (Chris Atkins) e sò mujér, la Linda (Bobby Greenwood), i próan a far curàǵ a i sōi sinc baghét ch'i gh'èṅ armàś in un vilàǵ bandunâ in du chi óm e cal dóni i vàn'n incóra 'd acòrd ma pò i rìv'n i óm suldâ ch'i màsan tut. A s salva sōl al fiōl dla còpia, Joe Knight (Bryan Genesse), parchè in dal mumènt dal masèl lò 'l éra via.
I óm suldâ, cmandâ par cla bruta ghigna 'd Calloway (Richard Lynch), i gh'aṅ n'atra misiòṅ da puràr a cumpimènt, qvéla ad far-'g-la pagàr a McCabe (James Brolin), òṅ di suo ch'l iva decìś ad far al diśertōr. Na vòlta i cumbatìv'n insém ma pò Calloway al s è invintâ cla guèra lè cun cal dóni e McCabe 'l à decìś ad mulàr-al parchè, anc s'al pōl ès'r anc 'd acòrd ad métar cal fémni a 'l sò pòst, a rivàr a cupàr-li tuti a gh in vōl!
Fat parśunēr, McCabe al farév na na bruta fiṅ s'a n rivìs minga Joe a salvàr-al. Al śōvan, ch'al gh'à vint an, 'l è nâ parchè i sò genitōr i aṅ gusâ tulénd prima 'n sêr, fat sù a baś 'd un vlèṅ ad sarpènt dimóndi râr, ch'l éra bòṅ ad cumbàt'r al mâł. Joe al vōl dar un futùr a 'l gèn'r umàṅ e al dmanda a McCabe ad far-'s inśdìr e 'd dvintàr un squasamarléti par far un muć ad putèṅ: la paś la gh pōl èsar dabòṅ ma se lò al 'l ajutìs, in dū i farév'n anc prima, mo invéci gnint! Prima però a gh'è da cumbàtar 'l eśèrcit ad Calloway e da purtàr da la sò banda la capléta dal dóni ch'i ubidìs'n a la regìna di amàśuni, la Jihane (Susan Africa). McCabe e Joe i rapìsan una dal sò dóni, la Shara (Kehli O'Byrne), incantànd-la cun na machinìna lètrica ch'la và da par lē, par psēr dar vita a 'l prugèt „a n al fag minga p'r al gudiōl mio ma par dar di fiōi a Dio“ ma a 'l ùltim, dòp vint-a-tri an sénsa ciulàdi, anc McCabe al s tira indrē. Par dar dū cōlp a la biónda McCabe al fà parśunēr Raleigh (Chad Frontiere), culaburadōr ad Calloway, pò al gh fà véd'r un pòran cum a s fà cun chi panda, giusà ch'a n gh végna vója...