Generàł Birdler

C'l artìcul chè 'l è scrit in Miranduléś

Al Generàł Birdler, cgnusû anc cuma Lord Vardallah, 'l è 'n persunàǵ d'l anime Gran Mazinga, creâ p'r al senegiadōr Gō Nagai.

Birdler, cmandànt di móstar gueriēr uśèi, 'l è òṅ di sèt generài dal Gran Maresiàl dal Demòni e prima incóra dal Generàł Négar in fiṅ tant che chi lò al mōr in un cumbatimènt a l'arma biànca cun Tetsuya Tsurugi.

A séguit dal prucès ad rubutiśasiòṅ di abitànt dal pòpul ad Mikenes, Birdler 'l è finî dènt'r a 'n robot cun la tèsta 'd un rapàś cun di lung cavìi biànc, méntar la sò ghigna, ch'la pâr na mascra africàna, la salta fóra da 'l pèt.

Al generàł al sparìs da la sèrie cun 'l epiśòdi 47, pò al n s véd piò. 'L è fàcil ch'al sia mòrt a séguit d'l atàc dal super-raś ch'l à patî mént'r al s catàva su la furtésa Demonica.

In Itàglia 'l è stâ ardupiâ p'r Aldo Barberito.