Full Monty
|
C'l artìcul chè 'l è scrit in
Miranduléś |
 The Full Monty
| ||
| Full Monty - Squattrinati organizzati | ||
 Robert Carlyle in na figùra dal film | ||
| Servìsi cumplét - Buletàri urganiśâ 1997 | ||
|---|---|---|
| Regìa: Peter Cattaneo | ||
| Scritōr: Simon Beaufoy | ||
| Atōr: Robert Carlyle • Mark Addy • Paul Barber Tom Wilkinson • Steve Huison • William Snape Lesley Sharp • Hugo Speer • Paul Butterworth | ||
| Müsica: Anne Dudley | ||
| Léngua: Ingléś | ||
| Dürä dal film: 95 minüt | ||
| Nasiōṅ: Régn Unî • Stat Unî | ||
Full Monty - Squattrinati organizzati (Servìsi cumplét - Buletàri urganiśâ) 'l è na cumèdia ingléśa dal 1997 ad Peter Cattaneo ch'l'à vins al Prèmi Òscar par la culòna sunóra 'd Anne Dudley ch'la dróa anc di pès dla Donna Summer (Hot Stuff), ad Tom Jones (You Can Leave Your Hat On), di M People (Moving on Up), dal Sister Sledge (We Are Family) e àt'r incóra.
L'è custàda tri migliòṅ ad sterlìni ma la 'n à purtâ a cà da piò ad sènt-a-ssànta.
La manéra ad dir ingléśa “Full Monty” la vōl dir “Servìsi Cumplét” e la s riferìs a quànd a la fiṅ dal film i óm i s càvan śò dal tut armagnénd nûd sénsa gnint adòs.
Sunt
Gaz (Robert Carlyle) e Dave (Mark Addy), dū sénsa lavōr ad Sheffield, i s inśégnan par catàr di espedînt par tiràr avànti dòp ch'la criśi l'à fat saràr dimóndi fàbrichi. Gaz, ch'al gh l'à cun la sgnóra Thatcher, 'l è separâ da sò mujér e al gh'à 'n fiōl da mantgnìr, Nathan (William Snape), e al và in di guàj quànd al n è più bòṅ ad pagàr gl'alimènt. Dave invéci 'l è 'n budlòṅ dimóndi śò e 'l è spuśâ cun la Jean (Lesley Sharp). Quèl da far par ciapàr di bèsi a n s cata minga e dònca chi lōr dū i próan a purtàr via di trâv 'd aśàl da na fàbrica saràda da tèmp.
Un dè, pasànd davśèṅ a 'n lucàl in dua a gh'è 'n spetàcul 'd óm ch'i s càvan śò e vdénd che 'd fóra 'l è pîṅ ad dóni ch'i faṅ a gara par tōr di bijét p'r i pòst davànti, a Gaz a gh vèṅ n'idéa, qvéla ad far anca lò un strip-tease ad masć ma cun più curàǵ ad qvi là ch'i tìn'n al mudàndi a la fiṅ. Gaz al vōl far al “Full Monty”, al “Servìsi Cumplét”. Insém a Dave, chi lò al cata sù àtar quàt'r óm in buléta cuma lò: Gerald (Tom Wilkinson), ex capstasiòṅ sénsa fiōi ch'al fà finta 'd andàr a lauràr tut i dè parchè al n gh la cava mia a dir a sò mujér qvél ch'a gh'è sucès, Barrington Mitchell (Paul Barber) dit "cavàl" parchè 'l è 'n umòṅ négar, Lomper (Steve Huison), ch'al fava al custòdi, e Guy (Hugo Speer) ch'al gh 'l à dimóndi grôs.
Dòp soquànt dè ad próvi, 'l è rivàda par lōr l'óra ad śibìr-as in frònt a quatarsènt dóni c'n al diav'l adòs. In sal nòti ad You can leave your hat on, i óm i gh'àṅ da cavàr-as via incòsa.